মণিপুৰত মেইটেই সংগঠনে নিৰাপত্তা বাহিনীক গতালে ২৪৬ অস্ত্র

dainik janambhumi February 28, 2025

ডিজিটেল ডেস্ক: অস্ত্র-শস্ত্ৰ ঘূৰাই দিয়াৰ সময়সীমা উকলি যোৱাৰ আগতে মেইটেইসকলৰ এটা প্রধান সংগঠন আৰাম্বাই টেংগলে বৃহস্পতিবাৰে স্বেচ্ছাই ২৪৬টা অস্ত্ৰ নিৰাপত্তা বাহিনীক গতাই দিয়ে। উল্লেখযোগ্য যে মণিপুৰৰ ৰাজ্যপাল অজয় কুমাৰ ভাল্লাই যোৱা ২০ ফেব্ৰুৱাৰীত জনসাধাৰণক লুণ্ঠন কৰা অস্ত্ৰসমূহ সাতদিনৰ ভিতৰত গতাই দিবলৈ আহ্বান জনাই কৈছিল যে এই সময়ছোৱাত অস্ত্র জমা দিলে কোনো শাস্তিমূলক ব্যৱস্থা গ্রহণ কৰা নহ'ব। 

আনহাতে আৰক্ষীয়ে এটা বিজ্ঞপ্তিত কয় যে চৰমসীমাৰ অন্তিম দিনটোত মণিপুৰত মুঠ ৩০৭টা অস্ত্ৰ জনসাধাৰণে নিৰাপত্তা বাহিনী-আৰক্ষীৰ হাতত গতাই দিয়ে। আনহাতে, হিংসা জৰ্জৰিত মণিপুৰৰ ছখন জিলাত জনসাধাৰণে স্বেচ্ছাই সর্বমুঠ ১০৪টা আগ্নেয়াস্ত্র আৰক্ষীক গতাই দিয়ে। আৰক্ষীয়ে বৃহস্পতিবাৰে এই কথা জনায়। 

লুণ্ঠন, কৰা আগ্নেয়াস্ত্ৰসমূহ গতাই দিবলৈ প্রশাসনে বান্ধি দিয়া চূড়ান্ত সাত দিন সময় অন্ত পৰিবলৈ এদিন থাকোঁতে বুধবাৰে এই অস্ত্রসমূহ জমা দিয়া হৈছে। ৰাজ্যখনৰ কাংপকপি, পুব ইম্মল, বিষ্ণুপুৰ, থৌবাল, পশ্চিম ইম্মল আৰু কাকচিঙত এই অস্ত্ৰসমূহ গতাই দিয়া হয়।

Share This