মণিপুৰৰ ৰাজপথত নিষিদ্ধ প্ৰতিবাদ 

Dainik janambhumi March 02, 2025

ডিজিটেল ডেস্ক: প্রতিবাদ-ক্ষোভ প্রকাশৰ উপায় হিচাপে মণিপুৰত এতিয়াৰ পৰা পথ অৱৰোধ কৰিব নোৱাৰিব। কেন্দ্ৰীয় গৃহ মন্ত্রী অমিত শ্বাহে শনিবাৰে নিৰাপত্তা বাহিনীক এই সন্দর্ভত নির্দেশ দিয়ে। অহা ৮ মাৰ্চৰ পৰা মণিপুৰৰ সকলো পথতে জনসাধাৰণৰ যাতায়াত নিশ্চিত কৰিবলৈ নিৰাপত্তা বাহিনীক নির্দেশ দিয়াৰ উপৰি শ্বাহে পথ অৱৰোধ কৰাসকলৰ বিৰুদ্ধে কঠোৰ ব্যৱস্থা ল'বলৈ বাহিনীক নির্দেশ দিয়ে। মণিপুৰৰ নিৰাপত্তা পৰিস্থিতিৰ বিষয়ত এখন বৈঠকত অধ্যক্ষতা কৰি তেওঁ কয় যে ৰাজ্যখনলৈ দীর্ঘস্থায়ী শান্তি ঘূৰাই অনাত কেন্দ্ৰীয় চৰকাৰ সম্পূৰ্ণ দায়বদ্ধ। 

উল্লেখযোগ্য যে ২০২৩ চনৰ মে'ৰ পৰা গোষ্ঠীগত সংঘৰ্ষত জৰ্জৰিত মণিপুৰত ৰাষ্ট্ৰপতিৰ শাসন বলৱৎ কৰাৰ পাছত এয়া আছিল নিৰাপত্তা বিষয়ক এনে উচ্চস্তৰীয় প্রথম বৈঠক। ইয়াৰ উপৰি, শ্বাহে নির্দেশ দিয়ে যে মণিপুৰৰ আন্তঃৰাষ্ট্ৰীয় সীমান্তৰ 'নিৰ্দিষ্ট প্রৱেশ পথ'ত দুয়োটা ফালে ফেন্সিঙৰ কাম সোনকালে সমাপ্ত কৰিবলৈও নির্দেশ দিয়ে। 

গৃহ মন্ত্রীজনে আৰু কয় যে মণিপুৰক নিচাযুক্ত দ্রব্য (ড্রাগ্‌ছ) মুক্ত কৰিবলৈ নিচাযুক্ত দ্ৰব্যৰ ব্যৱসায়ত জড়িত সমগ্ৰ নেটৱৰ্ক ধ্বংস কৰিব লাগিব। এ‌ই উচ্চ স্তৰীয় বৈঠকত ৰাজ্যপাল অজয় কুমাৰ ভাল্লা, কেন্দ্রীয় গৃহ সচিব গোবিন্দ মোহন, ইন্টেলিজেন্স ব্যুৰ'ৰ সঞ্চালক তপন ডেকা, ডেপুটি চীফ অব্ আর্মি ষ্টাফ আৰু সেনাৰ ইষ্টার্ন কমাণ্ডৰ কমাণ্ডাৰৰ সৈতে আন বিষয়াসকল উপস্থিত আছিল। উল্লেখযোগ্য যে ৰাজ্যখনৰ বিজেপি নেতৃত্বাধীন চৰকাৰৰ মুখ্যমন্ত্ৰী এন বীৰেন সিঙে পদত্যাগ কৰাৰ পাছত যোৱা ১৩ ফেব্ৰুৱাৰীত ৰাষ্ট্ৰপতিৰ শাসন বলবৎ কৰা হৈছিল।

Share This