'পশ্চিম বংগৰ বাঙালীক অত্যাচাৰ সহ্য কৰা নহ'ব'

dainik janambhumi July 17, 2025

ডিজিটেল ডেস্কঃ বিজেপিৰ দ্বাৰা শাসিত ৰাজ্যসমূহত বাঙালী ভাষী লোকক কৰা তথাকথিত উৎপীড়নৰ প্ৰতিবাদত বুধবাৰে পশ্চিম বংগৰ মুখ্যমন্ত্রী তথা টি এম চিৰ নেত্রী মমতা বেনার্জীয়ে কলকাতাত এই বিশাল প্রতিবাদী পদযাত্রাত অংশগ্ৰহণ কৰে। 

বৰষুণ সত্ত্বেও প্রতিবাদত তৃণমূল কংগ্ৰেছৰ সাংসদ অভিষেক বেনাৰ্জীৰ লগতে দলটোৰ নেতা-কর্মীৰ লগতে হাজাৰ হাজাৰ লোকে অংশগ্ৰহণ কৰে। পদযাত্ৰাৰ পাছত মমতাই এখন জনসভাত ভাষণ দি কেন্দ্ৰীয় চৰকাৰ আৰু বিজেপিক কঠোৰ ভাষাৰে সমালোচনা কৰে। তেওঁ কয় যে বাঙালীসকলক কৰা অত্যাচাৰ সহ্য কৰা নহ'ব। মুখ্যমন্ত্ৰীগৰাকীয়ে এই বুলি অভিযোগ কৰে যে বিজেপিৰ দ্বাৰা শাসিত ৰাজ্যসমূহত বাঙালী ভাষী লোকক বাংলাদেশী তথা বিদেশী বুলি অভিহিত কৰি প্ৰতাৰিত কৰিছে। এই ৰাজ্যসমূহত বাঙালী ভাষী লোকসকলক বিদেশী সজাই কাৰাগাৰ তথা ডিটেশ্যন কেম্পলৈ প্ৰেৰণ কৰা হৈছে। মমতাই এই বুলি প্রশ্ন কৰে যে পশ্চিম বংগ ভাৰতৰ অংশ নহয় নেকি? তেওঁ লগতে এই বুলি অভিযোগ কৰে যে আন ৰাজ্যত থকা বঙালী ভোটাৰৰ নাম ভোটাৰ তালিকাৰ পৰা কৰ্তন কৰা হৈছে। মমতাই নির্বাচন আয়োগকো সমালোচনা কৰে।

নির্বাচন আয়োগে বিজেপিৰ দালালি কৰা বুলিও তেওঁ অভিযোগ কৰে। কলকাতাৰ কলেজ স্কোৱাৰৰ পৰা আৰম্ভ হোৱা পদযাত্রা ধর্মতলাত অন্ত পৰে। মুখ্যমন্ত্ৰীগৰাকীয়ে কয়, 'বঙালীসকলৰ প্ৰতি বিজেপিৰ দৃষ্টিভংগীত মই লজ্জানত আৰু হতাশ হৈছোঁ। এতিয়া মই অধিক বাঙালী কোৱাৰ সিদ্ধান্ত লৈছোঁ। আপোনালোকে মোক ডিটেনশ্যন কেম্পত ৰাখিলে ৰাখিব পাৰে।' কলকাতাৰ উপৰি ৰাজ্যখনৰ সকলো জিলাৰ সদৰত আজি টি এম চিৰ কৰ্মীসকলে প্রতিবাদী পদযাত্রা কৰে। মুখ্যমন্ত্ৰীগৰাকীয়ে কয়, 'বাঙালী ভাষা কোৱা ৰাজ্যখনৰ বাহিৰত থকা লোকসকলক ৰহিঙীয়া মুছলমান বুলি প্রমাণ কৰিবলৈ মই আপোনালোকক (বিজেপিক) প্রত্যাহবান জনাইছোঁ। পশ্চিম বংগৰ ২২ লাখ প্ৰৱাসী শ্রমিকে দেশৰ বিভিন্ন ৰাজ্যত কাম কৰি আছে আৰু তেওঁলোকৰ হাতত বৈধ নথি-পত্র আছে।'

তেওঁ কয়, 'আন ৰাজ্যত বহি পশ্চিম বংগৰ ভোটাৰৰ নাম কৰ্তন কৰা হৈছে। বিজেপিয়ে এনেকৈয়ে মহাৰাষ্ট্ৰৰ নিৰ্বাচনত জয়লাভকৰিলে। এতিয়া বিহাৰত সেই কাম কৰিছে।' উল্লেখযোগ্য যে কেইদিনমানৰ আগতে মমতাই এই বুলি অভিযোগ কৰে যে নির্বাচন আয়োগে ভোটাৰ তালিকাৰ সংশোধনৰ নামত পিছ দুৱাৰেৰে ৰাষ্ট্ৰীয় নাগৰিক পঞ্জী কাৰ্যকৰী কৰাৰ প্ৰচেষ্টা চলাইছে।

Share This