মুম্বাইৰ বলিউড জগতত পুনৰ এক শিহৰণকাৰী ঘটনা

Kakali Deka January 23, 2025

ডিজিটেল ডেস্কঃ  মুম্বাইৰ বলিউড জগতত পুনৰ এক শিহৰণকাৰী ঘটনা সংঘটিত হৈছে!বলিউডৰ জনপ্ৰিয় কমেডিয়ান কপিল শৰ্মা, প্ৰসিদ্ধ অভিনেতা ৰাজপাল যাদৱ, বহুমুখী প্ৰতিভাৰ শিল্পী সুগন্ধা মিশ্ৰ আৰু প্ৰখ্যাত নৃত্য পৰিচালক ৰেমো ডিছুজা এতিয়া গভীৰ সংকটত  পৰিছে।  এই চাৰিগৰাকী জনপ্ৰিয় তাৰকাই মৃত্যুৰ ভাবুকি থকা ইমেইল লাভ কৰাৰ অভিযোগ উত্থাপন কৰিছে, যিয়ে সমগ্ৰ ইণ্ডাষ্ট্ৰীতে তীব্ৰ চাঞ্চল্যৰ সৃষ্টি কৰিছে৷

উল্লেখ্য যে পাকিস্তানৰ পৰা "don99284@gmail.com" নামৰ ইমেইলৰ জৰিয়তে এই ভাবুকি প্ৰেৰণ কৰাৰ কথা জানিব পৰা গৈছে। ইমেইল কৰাজনে নিজৰ নাম "বিষ্ণু" বুলি উল্লেখ কৰি কয় যে তেওঁ চেলিব্ৰিটিসকলৰ শেহতীয়া কাৰ্যকলাপত চকু ৰাখি আছে। ইমেইলটোত স্পষ্টকৈ কোৱা হৈছে— "আমি আপোনাৰ শেহতীয়া কাৰ্যকলাপৰ সূক্ষ্ম নিৰীক্ষণ কৰি আহিছোঁ। এইটো কোনো প্ৰচাৰৰ ষ্টাণ্ট নহয়"৷
 ইমেইলটোক গুৰুত্বসহকাৰে নল’লে ফল অত্যন্ত ভয়ংকৰ হ'ব পাৰে বুলিয়ো বাৰ্তাবাহকে উল্লেখ কৰে৷

এই ভাবুকিৰ পিছতে ৰাজপাল যাদৱে মুম্বাই আৰক্ষীত আনুষ্ঠানিকভাৱে অভিযোগ দাখিল কৰে। লগতে সুগন্ধা মিশ্ৰ আৰু ৰেমো ডিছুজায়ো একেটা বিষয়ত আৰক্ষীৰ ওচৰত গোচৰ ৰুজু কৰে। ৰাজপাল যাদৱৰ পত্নীয়ে দাখিল কৰা এজাহাৰৰ ভিত্তিত মুম্বাইৰ আম্বোলি আৰক্ষীয়ে BNSS ৩৫১(৩) ধাৰাৰ অধীনত এই অচিনাকি ব্যক্তিৰ বিৰুদ্ধে এফ আই আৰ ৰুজু কৰিছে।আৰক্ষীয়ে এতিয়া এই গোচৰ সন্দৰ্ভত  তদন্ত আৰম্ভ কৰিছে।
প্ৰাৰম্ভিক অনুসন্ধানৰ তথ্য অনুসৰি ইমেইলটো বিদেশী উৎসৰ, বিশেষকৈ পাকিস্তানৰ পৰা আহিছে। মুম্বাই আৰক্ষীয়ে ইমেইল কৰাজনৰ বিষয়ে অধিক তথ্য সংগ্ৰহৰ চেষ্টা কৰি আছে আৰু সম্ভাব্য আন্তঃৰাষ্ট্ৰীয় সংস্থাৰ সহায় লোৱাৰ কথাও বিবেচনা কৰিছে।

উল্লেখযোগ্য যে বলিউডৰ তাৰকাসকললৈ মৃত্যুৰ ভাবুকি অহা এয়া নতুন ঘটনা নহয়। আগতে ছলমান খান, শ্বাহৰুখ খান, এ. পি. ধিলন আদিৰ দৰে তাৰকাসকলেও এনে সংকটৰ সন্মুখীন হৈছিল। গেংষ্টাৰ লৰেন্স বিষ্ণইৰ গোষ্ঠীয়ে ছলমান খানক ভাবুকি দিয়াৰ পিছতে তেওঁৰ ঘৰৰ বাহিৰত গুলীচালনাৰ ঘটনাও সংঘটিত হৈছিল। আনহাতে, শ্বাহৰুখ খানেও ছট্টিশগড়ৰ ৰায়পুৰৰ এজন ব্যক্তিৰ পৰাও মৃত্যুৰ ভাবুকি লাভ কৰিছিল, যিয়ে তেওঁৰ পৰা ৫০ লাখ টকা দাবী কৰিছিল।

এই ঘটনাসমূহে বলিউডৰ তাৰকাসকলৰ জীৱন কেনেদৰে সংকটজনক হৈ পৰিছে তাকেই প্ৰতিপন্ন কৰে। বৰ্তমান, মুম্বাই আৰক্ষীয়ে তেওঁলোকৰ নিৰাপত্তা কঠোৰ কৰিছে আৰু ইমেইল কৰা ব্যক্তিৰ অনুসন্ধান চলাই আছে। বৰ্তমান, সকলোৰে চকু আৰক্ষীৰ তদন্তৰ ফলাফলৰ ওপৰত থাকিব৷

Share This