নতুন দিল্লী ৰে’ল ষ্টেছনত অঘটন! পদপিষ্ট হৈ মৃত্যু মহাকুম্ভ অভিমুখে যোৱা ১৮ যাত্ৰীৰ

Kakali Deka February 16, 2025

ডিজিটেল ডেস্কঃ দেশৰ ৰাজধানী চহৰ নতুন দিল্লীৰ ৰে'ল ষ্টেছনত অঘটন । বৰ্তমান সময়লৈকে লাভ কৰা তথ্য মতে, ৰে'ল ষ্টেছনত পদপিষ্ট হৈ ১৮গৰাকী লোকৰ মৃত্যুৰ খবৰ পোৱা গৈছে । নিহতসকলৰ ভিতৰত আছে ১০ গৰাকী মহিলা, ৩ টা শিশু আৰু ২ জন পুৰুষ। আনহাতে ১২ গৰাকী আহতক চিকিৎসালয়ত ভৰ্তি কৰোৱা হৈছে ।

শনিবাৰে নিশা নতুন দিল্লীৰ ৰে’ল ষ্টেছনত সংঘটিত হয় এই ঘটনা ৷ ষ্টেছনত ভিৰ কৰা প্ৰায়সংখ্যক লোকৰে গন্তব্যস্থান আছিল মহাকুম্ভ । শনিবাৰে নিশা প্ৰায় ৯-৫৫ বজাত সংঘটিত হয় এই মৰ্মান্তিক ঘটনা। উল্লেখ্য যে নতুন দিল্লীৰ পৰা প্ৰয়াগৰাজলৈ যোৱা দুখন ৰে’ল পলম হৈছিল। লগতে দুখন ৰে’ল বাতিল কৰা হৈছে বুলিও দাবী কৰিছিল একাংশই । ফলত ষ্টেছনটোত অতিমাত্ৰা যাত্ৰীৰ ভিৰ হৈছিল।

ঘটনাটো ১৪/১৫ নম্বৰৰ প্লেটফৰ্মত সংঘটিত হৈছিল । যাত্ৰীসকলে প্ৰয়াগৰাজ অভিমুখে যোৱা দুখন ৰে'লৰ বাবে অপেক্ষা কৰি আছিল । কিন্তু এই ৰে'লকেইখন আহি পোৱা নাছিল, যাৰ ফলত প্লেটফৰ্মত যাত্ৰীৰ ভিৰ অধিক হৈছিল । বাৰাণসী অভিমুখী শিৱগংগা এক্সপ্ৰেছ প্লেটফৰ্মত আহি ৰোৱাৰ লগে লগে যাত্ৰীসকল প্লেটফৰ্মত উপস্থিত হ'বলৈ আৰম্ভ কৰে । যাৰ ফলত ভিৰ বৃদ্ধি পাইছিল আৰু ভিৰ নিয়ন্ত্ৰণ কৰাৰ ব্যৱস্থাৰ অভাৱৰ বাবে অৱশেষত পদপিষ্ট হৈ বহু লোক বাগৰি পৰে ।

ৰে'ল মন্ত্ৰী অশ্বিনী বৈষ্ণৱে ঘটনাটোক লৈ প্ৰতিক্ৰিয়া প্ৰকাশ কৰি সামাজিক মাধ্যম এক্সত লিখিছে, "নতুন দিল্লী ৰে'ল ষ্টেছনৰ পৰিস্থিতি নিয়ন্ত্ৰণত আছে । দিল্লী আৰক্ষী আৰু আৰ পি এফ ঘটনাস্থলীত উপস্থিত আছে । আহতসকলক চিকিৎসালয়লৈ লৈ যোৱা হৈছে । আকস্মিক ভিৰ কমাবলৈ বিশেষ ৰে'লৰ ব্যৱস্থা কৰা হৈছে ।"

এজন আৰক্ষী বিষয়াই জনোৱা মতে, প্ৰয়াগৰাজ এক্সপ্ৰেছ ১৪ নম্বৰ প্লেটফৰ্মত ৰৈছিল। সেই প্লেটফৰ্মত ইতিমধ্যে ভিৰ কৰিছিল যাত্ৰীয়ে । ইয়াৰ বাহিৰেও পলমকৈ চলি থকা ৰে'ল দুখন আছিল স্বতন্ত্ৰ সেনানী এক্সপ্ৰেছ আৰু ভুৱনেশ্বৰ-ৰাজধানী এক্সপ্ৰেছ। এই দুয়োখন ৰে'ল প্ৰয়াগৰাজৰ মাজেৰে পাৰ হৈ যায়। এই দুয়োখন ৰে’লৰ যাত্ৰীসকলেও ১২, ১৩ আৰু ১৪ নং প্লেটফৰ্মত ৰৈ আছিল। সেই সময়ত ভিৰ কৰা যাত্ৰীৰ হেঁচা-ঠেলাত সংঘটিত হৈছিল এই ঘটনা।

এই ঘটনা সন্দৰ্ভত শোক প্ৰকাশ কৰি প্ৰধানমন্ত্ৰী নৰেন্দ্ৰ মোদীয়ে এক্স হেণ্ডেলত লিখিছে, “নতুন দিল্লী ৰে’ল ষ্টেছনত সংঘটিত হোৱা ঘটনাক লৈ গভীৰভাৱে দুখী। নিহতসকলৰ পৰিয়াললৈ সমবেদনা জ্ঞাপন কৰিলোঁ। আহতসকলৰ আশু আৰোগ্য কামনা কৰিলোঁ।” প্ৰধানমন্ত্ৰীয়ে এই কথাও উল্লেখ কৰে যে চৰকাৰী বিষয়াসকলে ভুক্তভোগীক সকলো প্ৰকাৰে সহায় কৰি আছে।

দিল্লীৰ প্ৰাক্তন মুখ্যমন্ত্ৰী আতিশীয়ে এক্সৰ এটা প'ষ্টত লিখিছে, "প্ৰয়াগৰাজৰ কুম্ভ মেলালৈ যাবলগীয়া তীৰ্থযাত্ৰীসকলৰ সৈতে এনে ঘটনা অত্যন্ত দুৰ্ভাগ্যজনক । কেন্দ্ৰীয় চৰকাৰৰ জনসাধাৰণৰ সুৰক্ষাৰ প্ৰতি কোনো চিন্তা নাই, উত্তৰ প্ৰদেশ চৰকাৰৰো নাই । প্ৰয়াগৰাজত কোনো ব্যৱস্থা নাই আৰু দেশৰ বিভিন্ন ৰাজ্যৰ পৰা অহা তীৰ্থযাত্ৰীসকলৰ বাবে কোনো দৃঢ় পৰিবহণৰ ব্যৱস্থা কৰা হোৱা নাই । মই ৰে'ল বিভাগক যিমান সম্ভৱ সোনকালে লোকসকলক সহায় আগবঢ়াবলৈ অনুৰোধ জনাইছোঁ ।"

নতুন দিল্লী ৰে'ল ষ্টেছনত সংঘটিত এই মৰ্মান্তিক ঘটনাৰ ৯ জনকৈ বিহাৰ আৰু দিল্লীৰ আৰু এজন হাৰিয়ানাৰ লোক ৷ ভুক্তভোগীৰ সম্পূৰ্ণ তালিকা-

১) আহা দেৱী (৭৯ বছৰ), বিহাৰৰ বাক্সাৰ নিৱাসী ৰবিন্দি নাথৰ পত্নী
২) দিল্লীৰ সংগম বিহাৰ নিৱাসী উপেন্দ্ৰ শৰ্মাৰ পত্নী পিংকী দেৱী (৪১ বছৰ)।
৩) দিল্লীৰ সৰিতা বিহাৰ নিৱাসী উমেশ গিৰিৰ পত্নী শীলা দেৱী (৫০ বছৰ)।
৪) দিল্লীৰ বাৱানা নিৱাসী ধৰ্মবীৰৰ পুত্ৰ ব্যোম (২৫ বছৰ)।
৫) পুনম দেৱী (৪০ বছৰ), মেঘনাথৰ পত্নী, বিহাৰৰ সাৰণ নিৱাসী।
৬) ললিতা দেৱী (৩৫ বছৰ), বিহাৰৰ পৰানা নিৱাসী সন্তোষৰ পত্নী।
৭) সুৰুচি (১১ বছৰ), বিহাৰৰ মুজাফ্ফৰপুৰ নিৱাসী মনোজ শ্বাহৰ কন্যা।
৮) কৃষ্ণা দেৱী (৪০ বছৰ), বিহাৰৰ সমস্তিপুৰ নিৱাসী বিজয় শ্বাহৰ পত্নী।
৯) বিহাৰৰ সমস্তিপুৰ নিৱাসী ৰাম সৰু সাহৰ পুত্ৰ বিজয় সাহ (১৫ বছৰ)।
১০) বিহাৰৰ বৈশালী নিৱাসী ইন্দ্ৰজিৎ পাছৱানৰ পুত্ৰ নীৰজ (১২ বছৰ)।
১১) শান্তি দেৱী (৪০ বছৰ), বিহাৰৰ নৱাড়া নিৱাসী ৰাজ কুমাৰ মাঞ্জীৰ পত্নী।
১২) বিহাৰৰ নৱাদা নিৱাসী ৰাজ কুমাৰ মাঞ্জীৰ কন্যা পূজা কুমাৰ (৮ বছৰ)।
১৩) সংগীতা মালিক (৩৪ বছৰ), হাৰিয়ানাৰ ভীৱানী নিৱাসী মোহিত মালিকৰ পত্নী।
১৪) দিল্লীৰ মহাবীৰ এনক্লেভৰ বাসিন্দা বীৰেন্দ্ৰ সিঙৰ পত্নী পুনম (৩৪ বছৰ)।
১৫) দিল্লীৰ নাংলয় নিৱাসী বিপিন ঝাৰ পত্নী মমতা ঝা (৪০ বছৰ)।
১৬) দিল্লীৰ সাগৰপুৰ নিৱাসী ওপিল সিঙৰ কন্যা ৰিয়া সিং (৭ বছৰ)।
১৭) দিল্লীৰ বিজৱাসন নিৱাসী প্ৰভু শ্বাহৰ কন্যা কেঁচুৱা কুমাৰী (২৪ বছৰ)।
১৮) দিল্লীৰ নাংলয় নিৱাসী পঞ্চদেৱ কুশৱাহাৰ পুত্ৰ মনোজ (৪৭ বছৰ)।

উৎসঃপ্ৰাগ নিউজ ডিজিটেল