কেগৰ প্ৰতিবেদনে উদঙালে দিল্লীত আপৰ শাসন , ১৪খন চিকিৎসালয়ত নাই আই চি ইউ

Dainik janambhumi March 01, 2025

ডিজিটেল ডেস্কঃ দিল্লীৰ স্বাস্থ্য সেৱা আন্তঃগাঁথনিৰ বিষয়ত নিয়ন্ত্রক আৰু মহালেখা পৰীক্ষকৰ (কেগ) প্রতিবেদনত উন্মোচিত হৈছে পূৰ্বৰ আম আদমি পার্টিৰ (আপ) চৰকাৰৰ ছবছৰীয়া বিত্তীয় কু-ব্যৱস্থাপনা, অৱহেলা আৰু প্ৰশাসনত দায়িত্বহীনতা।

শুকুৰবাৰে দিল্লী বিধানসভাত বিজেপি চৰকাৰে দাখিল কৰা প্ৰতিবেদনত দেখুওৱা হৈছে সা-সঁজুলি আৰু স্বাস্থ্য কৰ্মীৰ বুজন পৰিমাণৰ অভাৱ, মহল্লা ক্লিনিকত দুর্বল আন্তঃগাঁথনি আৰু জৰুৰী পুঁজিৰ কম ব্যৱহাৰ। দিল্লী মহানগৰীৰ ২৭খন চিকিৎসালয়ৰ ১৪খনতে নাই আই চি ইউৰ সুবিধা। আনহাতে ১৬খনত নাই ব্লাড বেংক। ইয়াৰ উপৰি ৮খন চিকিৎসালয়ত নাই অক্সিজেন যোগান আৰু ১৫খন চিকিৎসালয়ত নাই শৱগৃহ। প্রতিবেদনত কোৱা হৈছে যে মহানগৰখনৰ ১২খন চিকিৎসালয় এম্বুলেন্স নোহোৱাকৈ চলি আছে।

প্রতিবেদনৰ মতে, বহু মহল্লা ক্লিনিকত শৌচাগাৰ-প্ৰসাৱগাৰ, বিদ্যুতৰ বিকল্প ব্যৱস্থা (পাৱাৰ বেক-আপ) আৰু পৰীক্ষাৰ টেবুল নাই। আয়ুষ ডাক্তৰখানাতো একেই অভাৱ দেখিবলৈ পোৱা যায়। ইফালে দিল্লীৰ চিকিৎসালয়সমূহত কৰ্মচাৰীৰ অভাৱো লক্ষণীয়। চিকিৎসালয়বোৰত ২১ শতাংশ নাৰ্ছ আৰু ৩৮ শতাংশ পেৰামেডিকৰ অভাৱ দেখা গৈছে। কিছু চিকিৎসালয়ত ৫০-৯৬ শতাংশ চিকিৎসক-নাৰ্ছৰ অভাৱ আছে। কেন্দ্ৰীয়শাসিত অঞ্চলটোৰ ৰাজীৱ গান্ধী

আৰু জনকপুৰী ছুপাৰ স্পেচিয়েলিটি হস্পিটেলত আই চি ইউ বেড আৰু ব্যক্তিগত কোঠাবোৰ ব্যৱহাৰ নোহোৱাকৈয়ে আছে। আনহাতে ট্রমা চেণ্টাৰবোৰত জৰুৰী চিকিৎসাৰ বাবে নাই বিশেষজ্ঞ চিকিৎসক।

Share This