বিশ্ব প্ৰসিদ্ধ পুৰীৰ ৰথযাত্ৰা আৰু ৰথৰ বিশেষত্ব জানেনে?

Kakali Deka June 27, 2025

ডিজিটেল ডেস্কঃ দেশী-বিদেশী তীৰ্থযাত্ৰীৰে আৰম্ভ হ'ল পবিত্ৰ ৰথযাত্ৰা। বিশ্ব প্ৰসিদ্ধ ৰথযাত্ৰা আৰু ৰথৰ বিশেষত্ব জানেনে?

কেনেকৈ আৰম্ভ হৈছিল ৰথযাত্ৰা ? কোনে টানিব পাৰে ৰথৰ ৰছী? ৰথ নিৰ্মাণৰ বাবে কাঠ কেনেকৈ নিৰ্বাচিত কৰে ? তিনিখন ৰথৰ নাম আৰু ৰং কি কি? কি আছে বিশেষত্ব? এই প্ৰশ্নবোৰৰ উত্তৰ বহু মানুহেই জানিব বিচাৰে।

এতিয়া দেশজুৰি আৰম্ভ হৈছে জগন্নাথৰ ৰথযাত্ৰা। লাখ লাখ ভক্তৰ ধ্বনি আৰু ভক্তিময় পৰিৱেশৰ মাজেৰে ভগৱান জগন্নাথ, ভাতৃ বলভদ্ৰ আৰু ভগ্নী দেৱী সুভদ্ৰাই নিজ নিজ ৰথেৰে ৰাওনা হৈছে গুণ্ডিচা মন্দিৰ অভিমুখে।

পুৰীলৈ এই যাত্ৰা কেৱল ধৰ্মীয় অনুষ্ঠান নহয়, এয়া বিশ্বাস, প্ৰেম আৰু সমৰ্পণৰ এক জীয়া নিদৰ্শন।

কিংবদন্তি অনুসৰি এবাৰ দেৱী সুভদ্ৰাই পুৰী নগৰখন চাবলৈ ইচ্ছা প্ৰকাশ কৰিছিল। ভগৱান জগন্নাথ আৰু ভাতৃ বলভদ্ৰই সুভদ্ৰাক ৰথত উঠাই নগৰ ভ্ৰমণৰ বাবে ওলাই গৈছিল। বাটত কেইদিনমানৰ কাৰণে তেওঁলোকৰ মাহীৰ ঘৰ বুলি গণ্য কৰা শ্ৰীগুণ্ডিচা মন্দিৰত ৭ দিন জিৰণি লৈছিল। তেতিয়াৰ পৰাই এই ঘটনাৰ স্মৃতিত প্ৰতি বছৰে উলিওৱা হয় ৰথযাত্ৰা।

ৰথযাত্ৰাৰ তিনিখন ৰথৰ তিনিটা পৃথক ৰং

ভগৱান জগন্নাথৰ ৰথখনৰ নাম নন্দিঘোষ, ৰথখনৰ ৰং ৰঙা-হালধীয়া। ভাতৃ বলোৰামৰ ৰথখনৰ নাম তালাধ্বজ, ৰং ৰঙা-সেউজীয়া। দেৱী সুভদ্ৰাৰ ৰথখনৰ নাম দৰ্পদলন, ৰথখনৰ ৰং ৰঙা-ক’লা

এই ৰংবোৰৰ পৌৰাণিক আৰু সাংস্কৃতিক তাৎপৰ্য আছে। প্ৰতিটো ৰং দেৱতাৰ স্বভাৱ আৰু শক্তিৰ প্ৰতীক হিচাপে গণ্য কৰা হয়। উল্লেখ্য যে ধৰ্ম, জাতি, দেশ নিৰ্বিশেষে যিকোনো ব্যক্তিয়ে টানে ৰথৰ ৰছী।

ৰথ নিৰ্মাণৰ কাঠ ওড়িশাৰ ময়ূৰভঞ্জ, গঞ্জাম আৰু কেওনঝাৰ জিলাৰ অৰণ্যৰ পৰা অনা হয়। কাঠ কটাৰ আগতে পূজা কৰা হয় আৰু শুভ সময়ত কটা হয়।ৰথ নিৰ্মাণৰ বাবে বিশেষ প্ৰকাৰৰ গছ বাছনি কৰা হয়, য’ত ভগৱান জগন্নাথৰ লগত জড়িত চক্ৰ, শংখ, গদা, পদ্ম আদি ধৰ্মীয় প্ৰতীকৰ চিন দেখা যায়। ইয়াৰ বাহিৰেও যিবোৰ গছত চৰাইৰ বাহ বা কাষত পৱিত্ৰ স্থান যেনে নদী, মন্দিৰ ইত্যাদি থাকে, সেইবোৰ গছ কাটিব নোৱাৰি।

উৎস প্ৰাগ নিউজ ডিজিটেল