পত্নী ৰাধাক লৈ আৱেগিক ৰাজপাল যাদৱ: কঠিন সময়ৰ সংগ্ৰাম আৰু অভিনেতাগৰাকীৰ হিয়াভগা বেদনা

Nikimoni Kachari February 21, 2026

ডিজিটেল ডেস্কঃ বলিউডৰ অন্যতম জনপ্ৰিয় অভিনেতা ৰাজপাল যাদৱ বৰ্তমান তেওঁৰ জীৱনৰ এক জটিল আইনী যুঁজত ব্যস্ত। শেহতীয়াকৈ এক সাক্ষাৎকাৰত অভিনেতাগৰাকীয়ে তেওঁৰ বিগত দিনবোৰৰ যন্ত্ৰণা আৰু পত্নী ৰাধা যাদৱৰ অটল সমৰ্থনৰ কথা সোঁৱৰণ কৰি আৱেগিক হৈ পৰে।

ৰাজপাল যাদৱে পত্নী ৰাধাৰ ত্যাগৰ কথা উল্লেখ কৰি কয় যে তেওঁৰ আটাইতকৈ কঠিন সময়ত ৰাধাই তেওঁক যি সাহস দিলে, তাৰ ধাৰ তেওঁ কেতিয়াও পৰিশোধ কৰিব নোৱাৰে। অভিনেতাজনে স্বীকাৰ কৰে যে জে'লত থকা সময়ছোৱাত তেওঁ মানসিকভাৱে ভাগি পৰিছিল, কিন্তু ৰাধাই কেৱল ঘৰখনেই নহয়, তেওঁৰ সাহসকো ধৰি ৰাখিছিল।

এই সমগ্ৰ সমস্যাৰ আৰম্ভণি হৈছিল ৰাজপাল যাদৱৰ পৰিচালিত প্ৰথমখন ছবি 'আতা পাতা লাপাতা'ৰ নিৰ্মাণৰ সময়ত। ছবিখনৰ বাবে লোৱা এক ঋণৰ ৯ কোটি টকাৰ চে'ক বাউন্স হোৱাৰ বাবে অভিনেতাজন আইনী পাকচক্ৰত সোমাই পৰে আৰু কাৰাবাস খাটিবলগীয়া হয়।

অভিনেতাজনে উল্লেখ কৰে যে পৰিয়াল আৰু সন্তানৰ পৰা আঁতৰত থকাটো আছিল আটাইতকৈ বেদনাদায়ক। আইনী যুঁজত তেওঁৰ যথেষ্ট আৰ্থিক আৰু মানসিক ক্ষতি হৈছে। কিন্তু এই সময়ছোৱাত ৰাধাই এগৰাকী যোদ্ধাৰ দৰে পৰিয়ালটোক একত্ৰিত কৰি ৰাখিছে।

বৰ্তমান অন্তৰ্ৱৰ্তীকালীন জামিনত থকা ৰাজপালে কয় যে তেওঁ কাৰোৰে পৰা দয়া নিবিচাৰে। তেওঁৰ লক্ষ্য এতিয়া কেৱল কামত মনোনিৱেশ কৰা আৰু অভিনয়ৰ জৰিয়তে দৰ্শকৰ হৃদয় পুনৰ জয় কৰা। তেওঁ কয়, 'মই কেৱল এগৰাকী শিল্পী হিচাপে কাম কৰি যাব বিচাৰোঁ আৰু মোৰ ওপৰত থকা সকলো দায়বদ্ধতা পূৰণ কৰিব বিচাৰোঁ।'

 

উৎস: প্ৰাগ নিউজ ডিজিটেল

Share This