ৰাজ্যত ব্যাপক হাৰত হ্ৰাস পাইছে চাহৰ উৎপাদন 

Kakali Deka February 13, 2025

ডিজিটেল ডেস্কঃ সংকটৰ গৰাহত পৰিছে ৰাজ্যৰ অৰ্থনীতিলৈ বিশেষ অৱদান আগবঢ়াই অহা চাহ উদ্যোগটো। জলবায়ু পৰিৱৰ্তনৰ ফলত শেহতীয়াকৈ উদ্বেগজনকভাৱে ৰাজ্যখনত চাহৰ উৎপাদন হ্রাস পাইছে। এনে পৰিস্থিতিত চাহ উদ্যোগটোৰ সৈতে জড়িত হৈ থকা প্রায় ৭০ লাখ লোকৰ ভৱিষ্যতক লৈ প্রশ্ন আহি পৰিছে। ভাৰতীয় চাহ পৰিষদে প্রকাশ কৰা মতে যোৱা ডিচেম্বৰ মাহত

অভাৱনীয়ভাৱেহ্রাস পাই অসমত মাত্র ৬.৩৩ নিযুত কিল'গ্রাম চাহহে উৎপাদন হৈছে। ইয়াৰ বিপৰীতে ২০২৩ চনৰ ডিচেম্বৰ মাহত ৰাজ্যখনত উৎপাদন হৈছিল মুঠ ২৪.৭৪ নিযুত কিল'গ্রাম চাহ। অৰ্থাৎ যোৱা ডিচেম্বৰ মাহত ৰাজ্যখনত ৭৪.৪১ শতাংশ চাহৰ উৎপাদন হ্রাস পাইছে। তথ্য মতে, যোৱা ডিচেম্বৰ মাহত বৃহৎ চাহ বাগিচাসমূহে ৩.২৮ নিযুত কিল'গ্রাম আৰু ক্ষুদ্ৰ চাহ খেতিয়কসকলে ৩.০৫ নিযুত কিল'গ্রাম চাহ উৎপাদন কৰিছে। ইয়াৰ বিপৰীতে ২০২৩ চনৰ ডিচেম্বৰ মাহত বৃহৎ চাহ বাগিচাসমূহে ১২.৬০ নিযুত কিল'গ্রাম আৰু ক্ষুদ্র চাহ খেতিয়কসকলে ১২.১৪ নিযুত কিল'গ্রাম চাহ উৎপাদন কৰিছিল।

এই তথ্যৰ পৰাই স্পষ্ট হৈ পৰিছে ৰাজ্যখনত বৃহৎ চাহ বাগিচাৰ সমানে সমানে ক্ষুদ্র চাহ বাগিচাসমূহৰো উৎপাদন লক্ষণীয়ভাৱে হ্রাস পাইছে। আনকি ২০২৩ বৰ্ষৰ তুলনাত ২০২৪ চনত সামগ্রিকভাৱে ৰাজ্যখনত চাহৰ উৎপাদন বহুখিনি হ্রাস পাইছে। ২০২৩ চনত ৰাজ্যখনত মুঠ ৬৮৮.৩৩ নিযুত কিল'গ্রাম চাহ উৎপাদন হৈছিল। ইয়াৰ বিপৰীতে ২০২৪ চনত ৰাজ্যখনত উৎপাদন হয় ৬৪৯.৮৪ নিযুত কিল'গ্রাম চাহহে। মন কৰিব লগীয়া কথা যে সমগ্র দেশত আজিৰ তাৰিখত যিমান চাহ উৎপাদন হয় তাৰে প্ৰায় ৫২ শতাংশ চাহেই অসমে উৎপাদন কৰে। আনহাতে, ৰাজ্যত উৎপাদিত চাহৰ আধা অংশই উৎপাদন কৰে ক্ষুদ্র চাহ খেতিয়কসকলে। প্রণিধানযোগ্য যে অসমত চাহৰ উৎপাদনৰ সময় হৈছে মাৰ্চৰ পৰা ডিচেম্বৰ।

২০২৪ বৰ্ষত প্ৰথম অৱস্থাত চাহৰ উৎপাদন অভাৱনীয়ভাৱে হ্রাস পোৱাৰ পাছত শেষৰ ফালে কিছু বৃদ্ধি পাইছিল যদিও তাৰ আগৰ বৰ্ষতকৈ তুলনামূলকভাৱে উৎপাদন হ্রাস পায়। বিশেষজ্ঞসকলৰ মতে, জলবায়ু পৰিৱৰ্তনৰ বাবেই অসমত চাহৰ উৎপাদন হ্রাস পাইছে। বিশেষকৈ অতিপাত বৰষুণ আৰু অঞ্চলটোত গড় উষ্ণতা ক্রমান্বয়ে বৃদ্ধি পোৱাৰ ফলত চাহ উৎপাদনৰ ক্ষেত্ৰত গুৰুতৰ ভাবুকি আহি পৰিছে। সাধাৰণতে চাহ খেতিৰ বাবে গৰমৰ দিনত সর্বোচ্চ তাপমাত্রা ৩০ ডিগ্ৰীৰ ভিতৰত থাকিব লাগে।

কিন্তু অসমত আজিকালি গৰমৰ দিনত সর্বোচ্চ তাপমাত্রা ৪০ ডিগ্রী অতিক্ৰম কৰে। যাৰ বাবে উষ্ণতা সহ্য কৰিব নোৱাৰি চাহগছবোৰ মৰি যোৱাৰ দৰে অথবা প্ৰখৰ ৰ'দত কুমলীয় চাহপাতবোৰ জ্বলি যোৱাৰ দৰে ঘটনা সংঘটিত হ'বলৈ ধৰিছে। ইফালে, অসমত বাৰিষা কালত বৰষুণৰ পৰিমাণো ক্ৰমাৎ হ্রাস পাইছে। যাৰ বাবে চাহৰ উৎপাদনত বেয়া প্ৰভাৱ পৰিবলৈ ধৰিছে।  ক্ষতিৰ সন্মুখীন হোৱাৰ সম্ভাৱনাই দেখা দিছে।

Share This