উজনিৰ 'জীৱনৰেখা' আৰু আমেৰিকাসদৃশ ঘাইপথ

dainik janambhumi March 24, 2025

ডিজিটেল ডেস্কঃ 'আমেৰিকাৰ দৰে হ'ব অসমৰ ৰাষ্ট্ৰীয় ঘাইপথ।' এই কথা প্রকাশ কৰিছে পথ পৰিবহণ আৰু ৰাষ্ট্ৰীয় ঘাইপথ মন্ত্ৰ্যালয়ৰ কেন্দ্ৰীয় মন্ত্রী নীতিন গডকাৰিয়ে। মন্ত্রীজনে লগতে কৈছে ইয়াৰ বাবে ৩ লাখ কোটি টকা বিনিয়োগ কৰাৰ পৰিকল্পনা কৰিছে কেন্দ্ৰীয় চৰকাৰে। অসমৰ ঘাইপথ নেটৱৰ্কক সম্পূৰ্ণৰূপে সলনি কৰিব বুলি জনাই মন্ত্ৰীজনে আৰু কৈছে- প্ৰধানমন্ত্ৰীৰ নেতৃত্বত আমি আন্তঃগাঁথনিৰ উন্নয়নৰ বাবে সর্বোচ্চ অগ্রাধিকাৰ দিছোঁ। বিশেষকৈ উত্তৰ-পূৰ্বাঞ্চলক আৰু অধিক গুৰুত্বসহকাৰে লোৱা হৈছে।

প্ৰসংগতে এয়াও উল্লেখযোগ্য যে বাট-পথ আমেৰিকাৰ বাট-পথৰ দৰে উন্নত হ'ব বুলি কেন্দ্ৰীয় পৰিবহণ মন্ত্ৰীগৰাকীয়ে এইবাৰেই প্ৰথম কোৱা নাই। ইয়াৰ পূৰ্বেও গুৱাহাটীত সংবাদমেল অনুষ্ঠিত কৰিও ২০২৬ চনৰ পূৰ্বে উত্তৰ-পূবৰ বাট-পথ আমেৰিকাৰ পথসদৃশ হ'ব বুলি ঘোষণা কৰিছিল।

কথাখিনি শুনি বৰ ভাল লগা কথা। আমেৰিকাৰ দৰে হ'ব অসমৰ পথ- সেইটো নিশ্চয় প্রতিজন অসমবাসীৰ এটা ভাল লগা সপোন। কিন্তু উজনি অসমত বাস কৰা লোকে দীর্ঘদিন ঘাইপথ পুনৰ নিৰ্মাণৰ অৰ্থাৎ ফ'ৰলেন নিৰ্মাণৰ নামত যি জীয়াতু ভুগিছে সেয়া বর্ণনাতীত। এনে সময়তে অৱশ্যে আশাৰ বাতৰিৰূপে মন্ত্ৰী গডকাৰিয়ে কৈছে ফ'ৰলেনৰ যোৰহাট-জাঁজীৰ অংশ আৰু ডিমৌ-মৰাণৰ মাজৰ অংশৰ কাম অহা ৩১ মাৰ্চৰ ভিতৰত সম্পূৰ্ণ হ'ব। বাকী অংশৰ কামো স্তৰে স্তৰে সম্পূৰ্ণ হৈ নৱেম্বৰৰ ভিতৰত যোৰহাটৰ পৰা বগীবিলৰ মাজৰ পথছোৱাৰ নির্মাণ সম্পূর্ণ হ'বগৈ। প্রসংগতে উল্লেখযোগ্য যে উজনি আৰু নামনি অসমক সংযোগ কৰা পথছোৱা, যিছোৱা ৩৭নং ৰাষ্ট্ৰীয় ঘাইপথ নামেৰে বহু পৰিচিত এই পথৰ উজনি অংশৰ ফ'ৰলেন সম্প্ৰসাৰণৰ কাম প্রায় এটা দশকতো সম্পূর্ণ নোহোৱাৰ প্ৰসংগৰে আৰু ঠিকাদাৰী প্ৰতিষ্ঠানৰ বেমেজালিৰ বাবে প্ৰায়ে বাতৰিৰ শিৰোনাম দখল কৰি থাকে। অৱশ্যে দীর্ঘদিনীয়া লেহেম গতিৰে নিৰ্মাণৰ বিপৰীতে শেহতীয়াকৈ এই পথৰ নিৰ্মাণৰ গতি খৰ হোৱা ৰাইজে প্রত্যক্ষ কৰিছে, এনে সময়তে গডকাৰিৰ এই মন্তব্য আশাব্যঞ্জকো। কিন্তু বাস্তৱ ছবিয়ে আন কিছুমান শংকাৰ সৃষ্টি কৰিছে। পথছোৱাৰ পুনৰ নিৰ্মাণ সম্পূৰ্ণ হোৱা অংশৰ কিছু কিছু পথ ইতিমধ্যে যান-বাহন চলাচলৰ বাবে মুকলি কৰি দিছে। ইয়াৰে অনেক অংশত কিন্তু যাতায়াত আৰম্ভ হোৱাৰ পাছত ঠায়ে ঠায়ে বহি যোৱা বা দ গাঁত সৃষ্টি হোৱা পৰিলক্ষিত হৈছে। সেইদৰে অলপ বৰষুণতে পথত পানী জমা হোৱাৰ অভিযোগ সুলভ। খাল-বিলৰ বোকা-মাটিতে নতুনকৈ মাটিভৰ্তি কৰি ঠায়ে ঠায়ে পথছোৱা পকীকৰণ কৰাৰো ৰাজহুৱা অভিযোগ উঠিছে, যাৰ বাবে সেইবোৰ ঠাইত পথ নিশাটোৰ ভিতৰতে ভাগি পৰাৰো অভিযোগ আছে।

 এনেবোৰ অভিযোগে পথ নিৰ্মাণৰ গুণগত মান সম্পৰ্কত ৰাইজৰ মনত সন্দেহ আৰু শংকাৰ সৃষ্টি কৰিছে। এই শংকা অমূলক নিশ্চয় নহয়।

৩৭নং ৰাষ্ট্ৰীয় ঘাইপথৰূপে অধিক জনাজাত এই পথছোৱা দৰাচলতে উজনি অসমৰ 'লাইফলাইন'- জীৱনৰেখা। বিমান সেৱাৰ কথা বাদেই, ৰে'ল সেৱাও বৰ জনপ্রিয় নোহোৱা উজনিত এই পথৰ গুৰুত্ব কিমান সেয়া কেৱল এই অঞ্চলৰ ৰাইজেহে বুজে। সেয়ে এই পথছোৱা ফ'ৰলেনলৈ সম্প্ৰসাৰিত হোৱা কথাটো ইয়াৰ নাগৰিকৰ বাবে আশাৰ বতৰা। কিন্তু এই সম্প্ৰসাৰণৰ নামত দীর্ঘদিন ৰাইজে যি অবর্ণনীয় কষ্ট ভুগিলে তাৰ পৰিপ্ৰেক্ষিতত ৰাজনীতিকৰ ছলাহী কথাত ভোল যাবলৈ উজনিৰ ৰাইজ এতিয়া প্রস্তুত নহয়। এনে সময়ত পথ নিৰ্মাণৰ বিসংগতিৰ বাতৰিবোৰে ৰাইজক স্বাভাৱিকতেই শংকিত কৰি তুলিছে। ৰাইজৰ মনত শংকা, দীঘলীয়া সময়ত অতি লেহেম গতিৰে কাম কৰি এতিয়া নির্বাচনী বৈতৰণী পাৰ হ'বলৈকে পথ নিৰ্মাণৰ গতি খৰতকীয়া হৈছে নেকি? আৰু এই গতি খৰতকীয়া হওঁতে গুণগত মানৰ কথালৈ বৰ গুৰুত্ব নিদি কেৱল নিৰ্ধাৰিত সময়ত কাম শেষ কৰি বাঃ বাঃ লোৱাতহে বেছি গুৰুত্ব দিয়া হৈছে নেকি?

ৰাইজৰ শংকা যুক্তিসংগত। ফ'ৰলেনৰ নামত দীর্ঘদিনৰ যন্ত্রণা, চৰকাৰৰ প্রতি অনুনয়-বিনয়, দাবী ৰাইজে পাহৰা নাই, পাহৰা নাই কণা হাঁহক পতান দিয়াৰ বহু কাহিনী। সেয়ে ৰাইজৰ মনৰ শংকা- এইবাৰ যদি পথছোৱা উপযুক্ত ৰূপত নির্মাণ নহয়, তেনেহ'লে কম সময়তে পুনৰ আৰম্ভ হ'ব যাতায়াতৰ নামত সেই নৰক যন্ত্রণা। আকৌ আৰম্ভ হ'ব পথ মেৰামতিৰ দাবী আৰু তাৰ বিপৰীতে আশ্বাসৰ এক দীঘলীয়া প্রক্রিয়া। এনেকুৱা প্রেক্ষাপটত কল্যাণকামী চৰকাৰৰ দায়িত্ব ৰাইজক আশ্বস্ত কৰিব পৰাকৈ, শংকামুক্ত হ'ব পৰাকৈ পথছোৱা নির্মাণ কৰা। পথ নিৰ্মাণৰ নামত উত্থাপিত বেমেজালি আৰু আসোঁৱাহৰ প্ৰসংগসমূহ গুৰুত্বসহকাৰে বিবেচনা কৰি ৰাইজক সন্তুষ্ট কৰিব পৰাকৈ পথ নির্মাণ হোৱাটো ৰাইজে বিচাৰিছে। আমেৰিকাসদৃশ পথ কেৱল এটা সপোন নহৈ জীয়া বাস্তৱ হওক- উজনিৰ ৰাইজৰ এয়া আন্তৰিক আশা, কাৰণ এইছোৱা পথ উজনিৰ ৰাইজৰ জীৱনৰেখা- ইয়াৰ বিসংগতি মানে সমগ্র উজনিৰ ৰাইজৰ জীৱন-জীৱিকাৰ বিসংগতি। আৰু এয়া প্রায় নিশ্চিত জীৱন-জীৱিকাত বিসংগতি হ'লে তাৰ প্ৰভাৱ নিৰ্বাচন-ৰাজনীতিৰ জমা-খৰচৰ হিচাপতো পৰাটো স্বাভাৱিক। চৰকাৰে এই কথা মনত ৰখা উচিত হ'ব।

Share This