জটিল ব্যাধি

dainik janambhumi July 11, 2025

ডিজিটেল ডেস্ক : চিকিৎসা বিজ্ঞানৰ চমকপ্রদ উত্থানৰ সময়তো দুৰাৰোগ্য কৰ্কট ৰোগত আক্রান্ত লোকৰ সংখ্যা সমগ্র বিশ্বজুৰি ভয়ংকৰভাৱে বৃদ্ধি পাইছে। প্রতি বছৰে লাখ লাখ লোক এই ৰোগত আক্রান্ত হৈ অকালতে মৃত্যুমুখত পৰে। বিশ্বত মৃত্যু হোৱা প্ৰতি ৬জন লোকৰ মাজৰ এজনৰ মৃত্যু হয় এই ব্যাধিত। ব্যয়বহুল এই ৰোগৰ চিকিৎসাৰ বাবে থানবান হৈ যায় একো একোটা পৰিয়াল।

বিশ্ব স্বাস্থ্য সংস্থাৰ তথ্য অনুসৰি, ২০২২ বৰ্ষত সমগ্ৰ বিশ্বতে ১ কোটি লোকৰ মৃত্যু ঘটে এই ৰোগত। ইয়াৰে ভিতৰত সৰ্বাধিক লোকৰ মৃত্যু হয় স্তন কৰ্কটত। ২০২২ বর্ষত স্তন কর্কটত ২.২১ নিযুত লোক আক্রান্ত হয়। দ্বিতীয় স্থানত আছে হাঁওফাঁওৰ কৰ্কট। এই ৰোগত আক্ৰান্তৰ সংখ্যা ২৩ লাখ। তৃতীয় স্থানত আছে কল'ৰেক্টেল কৰ্কট। ১৯ লাখ লোক এই ৰোগত আক্ৰান্ত হৈছিল ২০২২ বর্ষত।

মৃত্যুৰ ক্ষেত্ৰত হাঁওফাঁওৰ কৰ্কটত আক্ৰান্তৰ সংখ্যাই শীর্ষস্থান দখল কৰে। হাঁওফাঁওৰ কৰ্কটত ১৮ লাখ লোকৰ মৃত্যু হোৱাৰ বিপৰীতে ৯ লাখ মৃত্যুৰে কল'ৰেক্টেল কৰ্কটে দ্বিতীয় স্থানত থাকে। ভাৰতৰ প্ৰেক্ষাপটলৈ চালে দেখিম যে ২০২২ বর্ষত দেশত ১৪,৬১,৪২১ গৰাকী লোকৰ দেহত ধৰা পৰে কৰ্কট ৰোগ। ইয়াৰ পূৰ্বৰ বৰ্ষ ক্ৰমে ২০২১-ত এই সংখ্যা আছিল ১৪,২৬,৪৪৭আৰু ২০২০ চনত আছিল ১৩,৯২,১৭৯। ৰাজ্যিক ভিত্তিত চালে উত্তৰ প্ৰদেশ আছিল কৰ্কট আক্ৰান্তৰ শীৰ্ষত। ৰাজ্যখনত ২.১০ লাখ লোক আক্রান্ত হৈছিল কৰ্কটত। ইয়াৰ বিপৰীতে ১,২১,৭১৭জন আক্ৰান্তৰ সংখ্যাৰে মহাৰাষ্ট্ৰ দ্বিতীয় স্থানত আৰু ১,০৯,২৭৪গৰাকী আক্রান্তৰে বিহাৰ তৃতীয় স্থানত থাকে।

আনহাতে, ২০২২ বৰ্ষত ভাৰতত ৮,০৮,৫৫৮জন লোক কর্কটত আক্রান্ত হৈ মৃত্যুমুখত পৰে। ইয়াৰ মূল কাৰণ হৈছে অসম তথা উত্তৰ-পূৰ্বাঞ্চলত চিগাৰেট তথা ধঁপাত সেৱন কৰা লোকৰ সংখ্যা দেশৰ ভিতৰতেই সর্বাধিক। এই ধঁপাত সেৱন ইমানেই বিপজ্জনক যে বিশ্ব স্বাস্থ্য সংস্থাই সদৰী কৰা তথ্য মতে, প্রতি বছৰে বিশ্বত ৭০ লাখ লোকৰ মৃত্যু হয় এই ধঁপাত সেৱনৰ ফলতেই। ভাৰতত ধঁপাত সেৱনৰ ফলত বছৰি ১৩ লাখ লোকৰ মৃত্যু হয়। ধঁপাত সেৱনৰ ফলত শ্বাস-প্রশ্বাসজনিত ৰোগ আৰু কৰ্কট ৰোগত আক্ৰান্ত হৈ এইদৰে বিশ্বত বছৰি লাখ লাখ লোকৰ অকাল মৃত্যু ঘটে। কিন্তু ইমানৰ পাছতো দেশত প্রতিদিনে কোটি কোটি টকাৰ চিগাৰেট নাইবা ধঁপাতজাতীয় সামগ্রী বিক্রী হৈয়ে আছে। চৰকাৰে এই সামগ্ৰীসমূহৰ বিক্ৰীৰ ওপৰত নিষেধাজ্ঞা জাৰি কৰিব পৰা নাই। ফলত ধঁপাত আসক্তৰ সংখ্যা প্রতিদিনে বৃদ্ধি হৈ গৈ আছে। চিগাৰেট আৰু ধঁপাতজাতীয় সামগ্ৰীৰ দাম চৰকাৰে যথেষ্ট পৰিমাণে বৃদ্ধি কৰি বুজন পৰিমাণৰ কৰ সংগ্ৰহ কৰিবলৈ সক্ষম হৈছে। একেদৰে সমগ্ৰ উত্তৰ-পূৰ্বাঞ্চলত সুৰাপান কৰা লোকৰ সংখ্যাও সর্বাধিক বুলি ক'লে ভুল কোৱা নহ'ব। অর্থাৎ এই অঞ্চলৰ পৰা বছৰি কোটি কোটি টকা ধঁপাত কোম্পানীসমূহৰ পকেটলৈ যোৱাই নহয়, চৰকাৰেও এক বৃহৎ পৰিমাণৰ ৰাজহ লাভ কৰে। একেদৰে ধঁপাত, সুৰা আদিয়ে মানৱ শৰীৰলৈ কঢ়িওৱা দুৰাৰোগ্য ৰোগৰ চিকিৎসাৰ নামত বছৰি এই অঞ্চলৰ পৰা দেশৰ বিভিন্ন প্রান্তলৈ ওলাই গৈছে কোটি কোটি টকা। চিকিৎসাৰ নামত একো একোটা পৰিয়ালে ঘৰৰ ভেটি পর্যন্ত বিক্ৰী কৰিব লগীয়া হৈছে। কিন্তু ইমানৰ পাছতো চৰকাৰে এক কঠোৰ ব্যৱস্থা গ্রহণ কৰিবলৈ সক্ষম হোৱা নাই একমাত্ৰ ৰাজহ লাভৰ স্বাৰ্থত। জনসাধাৰণো যি ধৰণে সজাগ হ'ব লাগিছিল হোৱা নাই। বন্ধ হোৱা নাই এই সামগ্ৰীসমূহৰ বিজ্ঞাপন। বছৰি মাত্ৰ এটা দিনত ধঁপাত-বিৰোধী দিবস পালন কৰিয়েই যেন প্ৰতিখন চৰকাৰে দায়িত্ব সামৰিছে। ধঁপাতৰ ব্যৱসায়ৰ সৈতে জড়িত কোম্পানীসমূহৰ বিৰুদ্ধে যিধৰণে ব্যৱস্থা গ্রহণ কৰিব লাগিছিল সেয়া কৰিব পৰা নাই চৰকাৰে। অৱশ্যে চৰকাৰে কৰ্কট ৰোগৰ চিকিৎসাৰ বাবে ব্যয়বহুল চিকিৎসালয় স্থাপনৰ ক্ষেত্ৰত যথেষ্ট গুৰুত্ব আৰোপ কৰিছে। ২০২৫-২৬ বৰ্ষৰ কেন্দ্ৰীয় বাজেটত কৰ্কট ৰোগৰ চিকিৎসাক বিশেষ প্রাধান্য দি স্বাস্থ্য আৰু পৰিয়াল কল্যাণ মন্ত্রালয়ক ৯৯,৮৫৮.৫৬ কোটি টকা আবণ্টন দিয়া হৈছে। ই সঁচাকৈয়ে প্রশংসনীয়। কিন্তু ইয়াৰ সমান্তৰালভাৱে যদিহে এনে দুৰাৰোগ্য ব্যাধিত আক্রান্ত নোহোৱাকৈ কিদৰে থাকিব পাৰি নাইবা কিধৰণৰ জীৱনশৈলীয়ে আমাক এই ৰোগত আক্রান্ত নোহোৱাকৈ ৰাখিব পাৰে, তাৰ প্ৰতি সজাগতামূলক ব্যৱস্থাৰ লগতে আন বিভিন্ন পদক্ষেপ গ্রহণ কৰিলেহেঁতেন, তেতিয়া এনে এক অৱস্থা নহ'লহেঁতেন। কিন্তু ইয়াৰ বিপৰীত ছবিহে আমি দেখিবলৈ পাওঁ। আমাৰ দেশত এতিয়াও ধঁপাতৰ উৎপাদন হৈয়ে আছে। বিশ্বৰ ধঁপাত উৎপাদনকাৰী শীর্ষ দহখন দেশৰ ভিতৰত ভাৰতো এখন। গতিকে এই খেতিৰ সৈতে লাখ লাখ লোক জড়িত হৈ আছে। আৰু ইয়াৰ বাবেও চৰকাৰে ধঁপাতৰ খেতি হয়তো বন্ধ কৰিব পৰা নাই। কিন্তু যিয়েই নহওক, চৰকাৰে অতি শীঘ্ৰে এক কঠোৰ ব্যৱস্থা গ্ৰহণ নকৰিলে অনাগত দিনত অসম তথা উত্তৰ-পূৰ্বাঞ্চলত দুৰাৰোগ্য ৰোগত আক্রান্ত লোকৰ সংখ্যা আৰু ভয়ংকৰভাৱে বৃদ্ধি পাব।

Share This