ট্ৰাম্পে কি কৰিব?

dainik janambhumi January 22, 2025

ডিজিটেল ডেস্ক: আমেৰিকাৰ ৪৭সংখ্যক ৰাষ্ট্ৰপতিৰূপে শপতগ্ৰহণ কৰা ড’নাল্ড ট্ৰাম্পৰ কেইটামান বিশেষ বিষয়ত ভূমিকা কি হ’ব তাক লৈ বিশ্বৰ কেইখনমান ৰাষ্ট্ৰৰ আগ্ৰহ যেনেকৈ প্ৰচুৰ, তেনকৈ উদ্বেগো কম নহয়৷ ইয়াৰে প্ৰথম তথা অতি গুৰুত্বপূৰ্ণ বিষয়টো হৈছে প্ৰব্ৰজন সন্দৰ্ভত ট্ৰাম্পৰ কঠোৰ স্থিতি৷ ৰিপাব্লিকান দলৰ প্ৰাৰ্থীৰূপে ৰাষ্ট্ৰপতি নিৰ্বাচনত অৱতীৰ্ণ হোৱা প্ৰতিবাৰেই ট্ৰাম্পৰ শ্ল’গান আছিল– ‘মেক আমেৰিকা গ্ৰেট এগেইন’৷

জনপ্ৰিয় হৈ পৰা এই শ্ল’গানটোৰ অৰ্থ প্ৰায় স্পষ্ট৷ আমেৰিকাত শ্বেতাংগসকলৰ প্ৰভাৱ কমি গৈছে, সেই প্ৰভাৱ ঘূৰাই আনিব লাগিব৷ আমেৰিকাৰ আজিৰ এই পৰিস্থিতিৰ বাবে প্ৰব্ৰজন নীতিৰ শিথিলতাই দায়ী বুলি ভাবে ট্ৰাম্পে৷ সেয়েহে তেওঁ ৰাষ্ট্ৰপতিৰ দায়িত্বভাৰ লোৱাৰ সময়তো স্পষ্টভাৱে ঘোষণা কৰিছে যে আমেৰিকাত অবৈধভাৱে প্ৰৱেশ কৰা আৰু কম দিনৰ ভিছা লৈ প্ৰৱেশ কৰি দীৰ্ঘদিন বসবাস কৰা লোকসকলক দেশখনৰ পৰা বহিষ্কাৰ কৰা হ’ব আৰু অনুপ্ৰৱেশৰ প্ৰধান প্ৰৱেশদ্বাৰ হিচাপে চিহ্নিত মেক্সিকো সীমান্তৰে প্ৰব্ৰজন ৰোধ কৰিবৰ বাবে সমগ্ৰ সীমান্তত দেৱাল নিৰ্মাণ কৰা হ’ব৷ তদুপৰি জন্মসূত্ৰে নাগৰিকত্ব লাভ কৰা অবৈধ নাগৰিকৰ সন্তানৰ ক্ষেত্ৰতো কঠোৰ হ’ব বুলি ঘোষণা কৰিছে নতুন মাৰ্কিন ৰাষ্ট্ৰপতিগৰাকীয়ে। পূৰ্বৱৰ্তী ৰাষ্ট্ৰপতি জ’ বাইডেনৰ আমোলত ‘এপ’ৰ যোগেদি আৱেদন কৰি আমেৰিকাত প্ৰৱেশৰ অনুমতি পোৱা যি ‘চি পি বি ৱান এণ্ট্ৰি’ আঁচনি আছিল সেইখনেই অবৈধ প্ৰব্ৰজনত বেছি উৎসাহ যোগালে বুলি ট্ৰাম্পে অভিযোগ কৰিছে৷ আৰু সেই ব্যৱস্থা স্থগিত ৰখাৰ সিদ্ধান্ত লৈছে নতুন প্ৰশাসনে৷ এনে ব্যৱস্থাৰে ১৩/১৪ নিযুত বিদেশী নাগৰিকে আমেৰিকাত প্ৰৱেশ কৰা বুলি সন্দেহ কৰা হৈছে৷

সোমবাৰে ৰাষ্ট্ৰপতিৰ দায়িত্বভাৰ লৈয়ে ট্ৰাম্পে ‘পেণ্টাগন’ক, অৰ্থাৎ মাৰ্কিন সেনা বাহিনীক নিৰ্দেশ দিছে যে আমেৰিকাত ‘প্ৰব্ৰজন জৰুৰী অৱস্থা বলৱৎ হ’ব আৰু এইক্ষেত্ৰত হ’ব পৰা যিকোনো পৰিস্থিতিৰ সন্মুখীন হ’বলৈ সেনা বাহিনী সাজু হৈ থাকিব লাগিব৷ তেওঁ সেনা বাহিনীক সীমান্তলৈ যোৱাৰ বাবেও নিৰ্দেশ দিছে৷ দায়িত্ব গ্ৰহণ কৰাৰ পাছত দিয়া ভাষণত কঠোৰ ভাষাৰে ট্ৰাম্পে কয়, ‘দেশখনৰ কমাণ্ডাৰ ইন চীফ হিচাপে মোৰ যথেষ্ট দায়িত্ব আছে৷ ভাবুকি আৰু আগ্ৰাসনৰ পৰা দেশখনক ৰক্ষা কৰিব লাগিব আৰু মই সেইটোৱে কৰিবলৈ আগবাঢ়িছোঁ৷’ ট্ৰাম্পৰ এই বক্তব্যই ইংগিত দিছে যে অহা  দিনবোৰত আমেৰিকাত বসবাস কৰা বিদেশী লোকসকল অভূতপূৰ্ব কঠিন পৰিস্থিতিৰ সন্মুখীন হ’ব লাগিব৷ অবৈধভাৱে বসবাস কৰি থকা বুলি চিহ্নিত হোৱা লোকসকলক বলপূৰ্বভাৱে বহিষ্কাৰ কৰাৰ ব্যৱস্থা গ্ৰহণ কৰা হ’ব বুলি বিভিন্ন মাধ্যমত প্ৰকাশ পাইছে৷ ট্ৰাম্পৰ এই কঠোৰ স্থিতিয়ে অন্য কিছুমান দেশৰ লগতে ভাৰতকো যে প্ৰভাৱিত কৰিব সেইটো ইতিমধ্যে স্পষ্ট হৈ পৰিছে, কাৰণ আমেৰিকাৰ ইমিগ্ৰেশ্যন এণ্ড কাষ্টম্‌ছ এনফ’ৰ্চমেণ্টে দেশখনৰ পৰা আঁতৰোৱাৰ বাবে ১.৪৪৫ নিযুত ব্যক্তিৰ তালিকা প্ৰস্তুত কৰিছে, তাত বহু ভাৰতীয়ৰো নাম আছে৷ জনা মতে আমেৰিকাৰ এই আই ই চি বিভাগটোৱে যোৱা এটা বছৰত বছৰি প্ৰায় ৯ হাজাৰকৈ ভাৰতীয়ক আমেৰিকাত অবৈধভাৱে প্ৰৱেশ কৰিবলৈ চেষ্টা কৰোঁতেই ধৰা পেলাইছে৷ আমেৰিকাত অবৈধভাৱে নাগৰিকৰ প্ৰৱেশৰ চেষ্টা কৰা ২০খন দেশৰ মাজত ভাৰতৰ স্থান ১৩৷ কেৱল অনুপ্ৰেৱশৰ বিষয়টোহে নহয়, ‘ডলাৰ’ৰ বিষয়তো ট্ৰাম্পৰ নতুন ঘোষণাই ভাৰতক কিছু অস্বস্তিত পেলোৱাৰ আশংকা আছে৷ বাহ্যিক দৃষ্টিত ট্ৰাম্পৰ লগত আমাৰ প্ৰধানমন্ত্ৰী মোদীৰ বন্ধুত্ব থকাৰ কথাটো সকলোৱে জানে। মোদীয়ে কেইবাটাও প্ৰসংগত ট্ৰাম্পক ‘মোৰ বন্ধু’ বুলি মুকলিকৈ সম্বোধন কৰা দেখা গৈছে৷ কিন্তু ৰাষ্ট্ৰপতিৰ দায়িত্ব লোৱাৰ দিনাই ট্ৰাম্পে ডলাৰৰ প্ৰসংগত ‘ব্ৰিক্‌ছ’ ৰাষ্ট্ৰসমূহক যি ভাবুকি দিছে তাৰ পৰা ভাৰতো বাদ পৰা নাই৷ ট্ৰাম্পে কৈছে যে ব্ৰিক্‌ছ ৰাষ্ট্ৰসমূহে নতুন ‘ব্ৰিক্‌ছ মুদ্ৰা’ প্ৰচলন কৰি ডলাৰৰ মূল্য কমাব বিচাৰিছে৷ এই ধৰণৰ প্ৰচেষ্টা সহ্য কৰা নহ’ব৷ তেওঁলোকে এই চেষ্টা শীঘ্ৰে বন্ধ নকৰিলে ৰাষ্ট্ৰবোৰৰ বিৰুদ্ধে এশ শতাংশ শুল্ক (আমেৰিকাত কৰা ব্যৱসায়ৰ ক্ষেত্ৰত) আৰোপ কৰা হ’ব৷ উল্লেখযোগ্য যে আমেৰিকাক বাদ দি গঠন কৰা ‘ব্ৰিক্‌ছ’ ভাৰতৰ উপৰি ব্ৰাজিল, ৰাছিয়া, চীন আৰু দক্ষিণ আফ্ৰিকা অন্যতম মূল সদস্য ৰাষ্ট্ৰ। এনেকৈ ‘আমেৰিকাক পুনৰ মহান’ কৰি তোলাৰ ট্ৰাম্পৰ লক্ষ্য পূৰণৰ বাবে আগত দিনবোৰত যি ধৰণৰ কঠোৰ ব্যৱস্থা গ্ৰহণৰ ঘোষণা কৰা হৈছে বা ইংগিত দিয়া হৈছে সেই ব্যৱস্থাবোৰৰ কিছুমানে ভাৰতক পোনপটীয়াভাৱে ক্ষতি কৰাটো খাটাং৷

আটাইতকৈ ডাঙৰ কথাটো হৈছে যুদ্ধই হওক বা অন্য কিছুমান বিষয়তে হওক ভাৰতে আমেৰিকা আৰু ৰাছিয়াৰ লগত তাল মিলাই সম্পৰ্ক ৰক্ষা কৰি থকাটো ট্ৰাম্পৰ আমোলত সম্ভৱ হ’ব নে নহয়? ট্ৰাম্প প্ৰশাসনে ভাৰতক ৰাছিয়া, চীন বা ইৰানৰ সৈতে সু-সম্পৰ্ক ৰক্ষা কৰি থাকিবলৈ সুবিধা দিবনে? এইবোৰ গুৰুত্বপূৰ্ণ প্ৰশ্ন। এই প্ৰশ্নবিলাকৰ মীমাংসা অহা দিনবোৰত কেনেকৈ হয় তাৰ ওপৰত ভাৰতৰ অৰ্থনীতিৰ ভৱিষ্যতো বহুখিনি নিৰ্ভৰশীল৷

Share This