নির্বাচনমুখী বাজেট

dainik janambhumi March 11, 2025

ডিজিটেল ডেস্ক : এবছৰৰ পাছতে ৰাজ্যত বিধানসভাৰ নিৰ্বাচন অনুষ্ঠিত হ'ব। সেয়েহে, সোমবাৰে (১০ মার্চ, ২০২৫) ৰাজ্যৰ বিত্ত মন্ত্রী অজন্তা নেওগে অসম বিধানসভাৰ মজিয়াত দাখিল কৰা ২০২৫-২৬ বৰ্ষৰ বাজেটখন ড° হিমন্ত বিশ্ব শৰ্মা চৰকাৰৰ ৫ বছৰীয়া বৰ্তমানৰ কাৰ্যকালৰ অন্তিমখন বাজেট আৰু বিত্ত মন্ত্রী হিচাপে শ্রীমতী নেওগৰ পঞ্চমখন বাজেট। গতিকে, প্রত্যাশিতভাৱে বাজেটখনক জনমোহিনী ৰূপ দিবলৈ চৰকাৰখনে তথা বিত্ত মন্ত্ৰীগৰাকীয়ে চেষ্টাত ত্রুটী কৰা নাই। বাজেট দাখিলৰ পূৰ্বেও বিত্ত মন্ত্ৰীগৰাকীয়ে ইংগিত দিছিল আৰু বাজেট ভাষণতো তেখেতে কৈছে- 'ই হৈছে জনমুখী কল্যাণকামী বাজেট'। 

বাজেটত যিবোৰ ধ্বজাবাহী আঁচনি ঘোষণা কৰা হৈছে তাৰ বেছিভাগেই পূৰ্বৰ আঁচনিৰ ধাৰাবাহিকতা, যিবোৰ আঁচনিয়ে চৰকাৰখনক আৰু শাসকীয় বিজেপি আৰু ইয়াৰ মিত্রদলসমূহক ৰাজনৈতিকভাবে যথেষ্ট উপকৃত কৰিছে। এই ধ্বজাবাহী আঁচনিবিলাকে ডেৰ কোটিৰো অধিক ৰাজ্যবাসীক সাঙুৰিছে। ২০২৬-ৰ নিৰ্বাচনৰ পূৰ্বে সেয়েহে বিজেপি মিত্ৰজোঁটৰ চৰকাৰখনে দাখিল কৰা বাজেটখনত এই ধ্বজাবাহী আঁচনিবোৰৰ পৰিৱৰ্তিত ৰূপবিলাকেই গুৰুত্ব পাইছে আৰু ইয়াক এখন নির্বাচনমুখী বাজেটত পৰিণত কৰিছে। এই অনুসৰি বাজেটে সৰ্বাধিক গুৰুত্ব দিয়া ধ্বজাবাহী আঁচনিখন হৈছে 'অৰুণোদয়', বাজেটত ইয়াৰ শিৰোনাম দিয়া হৈছে 'অৰুণোদয় ৩.০'। বিত্ত মন্ত্রীয়ে বাজেট ভাষণত উচ্ছ্বাসাৰে কৈছে- 'অৰুণোদয় মাথোঁ এখন আঁচনিয়ে নহয়, ই এক গণ আন্দোলন'। ২০২০ চনত ১৮ লাখ মহিলাক সাঙুৰি আৰম্ভ কৰা এই আঁচনিখনে ৰাজ্যৰ বিজেপি মিত্ৰজোঁট চৰকাৰক দিয়া ব্যাপক জনপ্রিয়তাৰ বাবে ২০২৫-২৬ বৰ্ষত আঁচনিখনৰ হিতাধিকাৰীৰ সংখ্যা ৩৭.২ লাখলৈ বৃদ্ধিৰ প্ৰস্তাৱ গ্ৰহণ কৰা হৈছে। বিত্ত মন্ত্ৰীয়ে মহিলা হিতাধিকাৰীসকলক অন্য এক আশাৰ বাণী দিছে যে বিধৱা পেঞ্চনৰ ধনৰ পৰিমাণো 'অৰুণোদয়'ৰ সমান কৰা হ'ব আৰু ইয়াৰ বাবে ৰাজ্য চৰকাৰে নিজাববীয়াকৈ 'টপ আপ' পেঞ্চনৰ ব্যৱস্থা বাজেটত ৰাখিছে। 

তদুপৰি, 'লাখপতি বাইদেউ' আঁচনি ৰূপে বিখ্যাত হৈ পৰা 'মুখ্যমন্ত্ৰীৰ মহিলা উদ্যমিতা অভিযান'ৰ বাবে বাজেটত পুঁজি ধাৰ্য কৰা হৈছে ৩,০৩৮ কোটি টকা। ৪.৩ লাখ ছাত্ৰী, যিসকল দেশৰ নতুন ভোটাৰো, তেওঁলোকৰ বাবে ৰূপায়ণ কৰা 'নিযুত মইনা' আঁচনিখনত এইবাৰ নতুনকৈ ৪.৩ লাখ ছাত্ৰীক অন্তৰ্ভূক্ত কৰা হ'ব আৰু বাজেটত এইখন ধ্বজাবাহী আঁচনিৰ বাবে ধাৰ্য কৰা হৈছে ৩৯১ 
কোটি টকা। অন্যহাতে, 'মুখ্যমন্ত্ৰীৰ জীৱন প্ৰেৰণা' আঁচনিৰ যোগেদি চৰকাৰী মহাবিদ্যালয়ৰ পৰা উত্তীর্ণ স্নাতকসকলক এবছৰৰ বাবে মাহে ২,৫০০ টকাকৈ অথবা বছৰত ২৫০০০ টকাৰ এককালীন সহায় আগবঢ়োৱাৰ ব্যৱস্থা বাজেটে কৰিছে। অনুৰূপভাৱে 'মুখ্যমন্ত্ৰীৰ আত্মনিৰ্ভৰ অসম' আঁচনিৰে অন্য এচাম যুৱ প্ৰজন্মক উদ্যমী ৰূপে গঢ়াৰ মানসেৰে কিস্তি ভিত্তিত ২ লাখ টকা পর্যন্ত ধন আগবঢ়োৱাৰ ধাৰা অব্যাহত ৰখাৰ প্ৰস্তাৱ লোৱা হৈছে। ইয়াৰ বাবে বাজেটত ধাৰ্য কৰা হৈছে ৭৭৩ কোটি টকা। কেৱল এয়াই নহয় বাজেটখনৰ পৃষ্ঠাই পৃষ্ঠাই সংযোজিত হৈছে হিতাধিকাৰীসকলক সন্তুষ্ট কৰি ৰাখিব পৰা বিভিন্ন দফা। যিসকলৰ ৰেছন কার্ড আছে তেওঁলোকে চাউল-আটাৰ উপৰি এতিয়াৰ পৰা পাব ৰাজসাহায্যযুক্ত মচুৰ দাইল, চেনি আৰু নিমখ। স্থায়ী-অস্থায়ী ৬.৮ লাখ চাহ শ্রমিকৰ প্ৰত্যেকেই পাব ৫০০০ টকাৰ এককালীন সাহায্য, ৪৮ লাখ বিদ্যুৎ গ্রাহকক সকাহ দি প্রতি ইউনিট বিদ্যুতৰ ১ টকাকৈ হ্রাস হ'ব বিদ্যুৎ মাচুল। ন্যূনতম সমর্থন মূল্যত ফচল ক্ৰয়ৰ উপৰি প্ৰতি কুইণ্টল ধান আৰু গোমধানৰ বিপৰীতে কৃষকক ৫০০ টকাকৈ সাহায্য দিয়াৰ প্রস্তাৱো সন্নিৱিষ্ট হৈছে বাজেটত। ইমানেই নহয়, 'মুখ্যমন্ত্ৰীৰ উৎকৰ্ষ যোজনা'ৰ অধীনত ৫০০টা কৃষক উৎপাদক গোটক ১০ লাখ টকাকৈ সাহায্য দিয়াৰ প্রস্তাৱো আছে বাজেটত। স্থানান্তৰত চৰকাৰৰ এনেধৰণৰ অন্য প্ৰস্তাৱবোৰৰ বিষয়েও উল্লেখ কৰা হৈছে। এই সকলোবোৰ দিশলৈ লক্ষ্য কৰিলেই দেখা যায় যে নিৰ্বাচনৰ পূৰ্বৰ এই বৰ্ষটোত জনসাধাৰণৰ মাজত এক সুখানুভূতি বৰ্তাই ৰখাত বিজেপি মিত্ৰজোঁটৰ চৰকাৰখনে বিশেষ গুৰুত্ব আৰোপ কৰিছে। 'ঝুমইৰ বিনন্দিনী', 'এডভান্টেজ আছাম'ৰ দৰে অনুষ্ঠানবোৰেৰে এটা ইতিবাচক পৰিৱেশ ইতিমধ্যেই ৰচনা কৰা হৈছে। কেইবা হাজাৰ কোটি টকা ঋণ লৈ মূলধনী ব্যয়ৰ পৰিমাণ দহ বছৰত ৮গুণ বঢ়াই উন্নয়নৰ দিশত দক্ষতাৰ এখন ছবিও তুলি ধৰিবলৈ চেষ্টা কৰা হৈছে। এইবাৰৰ বাজেটখনো জনসাধাৰণক মোহগ্রস্ত কৰি ৰখাৰ অন্য এটা ঢাপ।

Share This