যুদ্ধোন্মাদনা

dainik janambhumi June 17, 2025

ডিজিটেল ডেস্ক : শান্তিৰ ভাষণেৰে মুখৰ হৈ থকা বিশ্বত যুদ্ধৰ সংখ্যা আৰু প্ৰৱণতা বৃদ্ধি পাই আহিছে। ৰাছিয়া-ইউক্রেইন, হামাছ-ইজৰাইলৰ যুদ্ধৰ অৱসাম নৌহওঁতেই ইজৰাইল-ইৰানৰ যুদ্ধই সমগ্র বিশ্বত কঁপনি তুলিছে। ইজৰাইল-ইৰানৰ যুদ্ধখন চাৰিটা দিনতে ইমান ভয়ংকৰ হৈ পৰিছে যে যিকোনো মুহূৰ্ততে ইয়াৰ পৰিসৰ বৃদ্ধি পাব পাৰে বুলি আশংকাৰ সৃষ্টি হোৱাৰ লগতে উল্লিখিত যুদ্ধবিলাকেই লাহে লাহে তৃতীয় বিশ্বযুদ্ধৰ সৃষ্টি কৰিব পাৰে বুলিও বিভিন্ন পক্ষই আশংকা নকৰাকৈ থকা নাই। অবিৰাম গতিত দুয়োখন দেশে নিক্ষেপ কৰি থকা ক্ষেপণাস্ত্ৰ আৰু বিমান-ড্র'নেৰে বৰ্ষণ কৰা বোমাই বিধ্বস্ত কৰি পেলাইছে দুয়োখন দেশৰ বহু অঞ্চল, প্রাণ হেৰুৱাইছে আৰু আহত হৈছে শ শ লোক। সর্বাধিক ক্ষতি হৈছে ইৰানৰ। এই লেখা যুগুত কৰি থকালৈকে দেশখনৰ ৭০ গৰাকী মহিলা আৰু শিশুকে ধৰি ২২৪গৰাকী লোকৰ মৃত্যু নিশ্চিত কৰাৰ উপৰি আহত হৈ চিকিৎসাধীন হৈছে ১,২৭৭ গৰাকী ব্যক্তি। ইৰানত নিহত অধিকাংশই সাধাৰণ মানুহ। পাৰমাণবিক অস্ত্ৰ আৰু ক্ষেপণাস্ত্র নির্মাণ প্রতিষ্ঠানবিলাকক লক্ষ্য কৰি ইজৰাইলে চলোৱা বিমান আৰু ক্ষেপণাস্ত্র আক্রমণতে প্রাণ হেৰুৱাইছে দেশখনৰ এইসকল লোকে। অন্যহাতে, ইৰানী ক্ষেপণাস্ত্ৰই নিৰৱচ্ছিন্নভাবে ইজৰাইলৰ টেল আভিভকে ধৰি বহুকেইটা আবাসিক এলেকাক লক্ষ্য কৰি লোৱাৰ পৰিণতিত তাৰ বহু ভৱন ধ্বংসস্তূপত পৰিণত হোৱাৰ লগতে কমেও ২০জন লোক নিহত আৰু প্রায়-৪০০ লোক আহত হোৱা বুলি প্রকাশ পাইছে। ইৰানে কিমানজন শীর্ষ সেনা আৰু ৰিভল্যুশ্যনাৰী গাৰ্ডছৰ বিষয়া আৰু পাৰমাণৱিক বিজ্ঞানীক হেৰুৱাব লগা হ'ল তাৰ বিতং খবৰো ইতিমধ্যে সংবাদ মাধ্যমত প্রকাশ হৈছে। 

এই যুদ্ধখনে প্ৰসাৰ লাভ কৰিব পাৰে বুলি আশংকাৰ এই বাবেই সৃষ্টি হৈছে যে দুখন ৰাষ্ট্ৰৰ যুদ্ধ যেন লাগিলেও এই যুদ্ধত অন্য ৰাষ্ট্ৰবোৰৰো স্বার্থ নিহিত হৈ আছে। আন কথাত ক'বলৈ গ'লে বিশ্বৰ ৰাষ্ট্ৰবিলাকৰ পুনৰ মেৰুকৰণ হৈছে। আমেৰিকাক কেন্দ্ৰ কৰি এটা শক্তিশালী মেৰু গঠন হোৱাৰ বিপৰীতে চীন-ৰাছিয়া-ইৰান-উত্তৰ কোৰিয়াৰ এই পৃথক মেৰুত অৱস্থানৰ বিষয়টো বিভিন্ন সংঘাতৰ সময়ত স্পষ্ট হৈ পৰিছে। যোৱা মাৰ্চ মাহত আমেৰিকাৰ 'অফিচ অব দ্য ডিৰেক্টৰ অব্ মিলিটেৰী ইন্টেলিজেন্স'ৰ এখন প্রতিবেদনত উক্ত চাৰিখন ৰাষ্ট্ৰই এটা 'ব্লক'ৰ সৃষ্টি কৰি, তেওঁলোকৰ মাজত সামৰিক সহযোগিতাৰ সৃষ্টি কৰি আন্তঃৰাষ্ট্ৰীয় বিভিন্ন বিষয়ত প্ৰভাৱ বৃদ্ধি কৰিবলৈ কৰা চেষ্টাত গভীৰ উদ্বেগ প্রকাশ কৰা হৈছে আৰু এই 'ব্লক'-এ আন্তঃৰাষ্ট্ৰীয় ক্ষমতাৰ বিন্যাসক এক নতুন ৰূপ দিব বুলি আশংকা ব্যক্ত কৰা হৈছে। ৰাছিয়া-ইউক্রেইনৰ যুদ্ধতে ইয়াৰ স্পষ্ট প্রতিফলন ঘটা বুলি প্রকাশ কৰি প্ৰতিবেদনখনত কোৱা হৈছে যে যুদ্ধখনৰ বাবে পশ্চিমীয়া দেশবোৰে ৰাছিয়াৰ বিৰুদ্ধে নিষেধাজ্ঞা আৰোপ কৰাৰ বিপৰীতে উত্তৰ-কোৰিয়াই ৰাছিয়াক অস্ত্র-শস্ত্র-ক্ষেপণাস্ত্ৰ আৰু সৈনিকৰ যোগান ধৰে, ইৰানে ড্র'ন দি সহায় কৰে আৰু চীনেও আগবঢ়ায় অস্ত্র-শস্ত্রকে ধৰি বিভিন্ন যুদ্ধকেন্দ্রিক সহযোগিতা। ৰাছিয়া-চীনৰ মাজত বাণিজ্যিক সম্পর্কও এই যুদ্ধৰ পাছত লক্ষণীয়ভাৱে বৃদ্ধি পাইছে। এই প্রতিবেদনৰ আধাৰতে আমেৰিকাই আশংকা ব্যক্ত কৰিছে যে বিশ্বৰ আটাইতকৈ প্ৰভাৱশালী 'ছুপাৰ পাৱাৰ'ৰ আসনৰ পৰা আমেৰিকাক্‌ আঁতৰাবলৈ চীনে কাম কৰি আছে। আনহাতে, ইউক্রেইনৰ বিৰুদ্ধে যুদ্ধই ৰাছিয়াক বহু ক্ষতিৰ সন্মুখীন কৰালেও দেশখনে নিজৰ পাৰমাণৱিক শক্তিক অধিক উন্নত কৰি তোলাৰ প্ৰচেষ্টা চলাই আছে। 

ইজৰাইল-ইৰানৰ যুদ্ধখনতো এই চাৰি শক্তিৰ ঐক্যবদ্ধ ভূমিকা স্পষ্ট। ৰাষ্ট্ৰসংঘৰ মজিয়াত চীন আৰু ৰাছিয়াই ইজৰাইলৰ ইৰান আক্রমণক সজোৰে প্ৰতিবাদ কৰিছে। আনকি চীনে ইৰানক অস্ত্ৰৰ সহযোগিতা আগবঢ়োৱা বুলিও খবৰ ওলাইছে। ইয়াৰ বিপৰীতে আমেৰিকায়ো মধ্য প্রাচ্যলৈ যুদ্ধাস্ত্ৰ পৰিবাহী বিমান প্ৰেৰণ কৰা বুলি আন্তঃৰাষ্ট্ৰীয় সংবাদ মাধ্যমে বাতৰি প্ৰকাশ কৰিছে। ইজৰাইল-ইৰানৰ যুদ্ধৰ তীব্রতা বৃদ্ধি পাই গৈ থকাৰ লগে লগে সংশ্লিষ্ট ৰাষ্ট্ৰসমূহৰ মাজত সকীয়নি-ভাবুকি প্রদানৰ যিবোৰ ঘটনা ঘটি আছে সেয়া অতিশয় উদ্বেগজনক। ইৰানৰ নেতাসকলে আমেৰিকাক ভাবুকি দিছে যে যদি আমেৰিকাই ইজৰাইলক যুদ্ধত সহায়-সহযোগ কৰে তেনেহ'লে ইৰানে আমেৰিকাতো আক্ৰমণ চলাব। প্রত্যুত্তৰত আমেৰিকাই কৈছে- ইৰানে যদি কেনেবাকৈ আমেৰিকা আক্রমণ কৰে তেনেহ'লে তাৰ পৰিণতি কি হ'ব সেয়া ইবানে কল্পনাও কৰিব নোৱাৰিব।
ইফালে, চীনে ভাবুকি দিছে যে ইৰানৰ পাৰমাণৱিক প্রতিষ্ঠানত ইজৰাইলে কৰা আক্ৰমণৰ পৰিণতি অতি ভয়াৱহ হ'ব। এই ভাবুকি-প্রতি ভাবুকিবিলাকৰ অৰ্থ স্পষ্ট যে বিশ্বৰ নেতাসকলে সংযম হেৰুৱালেই যিকোনো মুহূৰ্ততে পৰিস্থিতি নিয়ন্ত্ৰণৰ বাহিৰ হৈ যাব পাৰে। যদি সংশ্লিষ্ট ৰাষ্ট্ৰৰ নেতাসকলৰ সংযমহীনতাৰ বাবে কেনেবাকৈ তৃতীয় বিশ্ব যুদ্ধৰ সৃষ্টি হয়, তেনেহ'লে ইয়াৰ পৰিণতিত হ'ব পৰা ক্ষয়-ক্ষতি প্রথম দুখন বিশ্ব যুদ্ধতকৈ কেইবাগুণ বেছি আৰু ভয়াৱহ হ'ব বুলি বিশ্বৰ বিশেষজ্ঞসকলেই মত প্ৰকাশ কৰিছে। গতিকে, যোৱা এটা বছৰত যুদ্ধৰ প্ৰসাৰ ঘটি থকাটোৱে বিশ্ববাসীক উদ্বিগ্ন কৰাটো স্বাভাৱিক। বিশ্বৰ নেতাসকলে শান্তিৰ ভাষণ দি থাকে। দ্বিতীয়বাৰ ক্ষমতালৈ আহি মার্কিন ৰাষ্ট্ৰপতি ড'নাল্ড ট্রাম্পে ঘোষণা কৰিছিল- তেওঁ বিশ্বক যুদ্ধমুক্ত কৰিব। কিন্তু আমেৰিকা-ইৰানৰ মাজত পাৰমাণৱিক নিৰস্ত্ৰীকৰণৰ আলোচনা হ'বলৈ আগবঢ়া অৱস্থাতে ইজৰাইলে ইৰান আক্ৰমণ কৰি দিলে। এই যুদ্ধৰ সৃষ্টিৰ পৰা পৰম বন্ধু ইজৰাইলক বিৰত ৰাখিব নোৱৰাটো আমেৰিকা তথা ৰাষ্ট্ৰপতি ট্রাম্পৰ ব্যর্থতা বুলিয়েই ক'ব লাগিব। এতিয়া মধ্য প্রাচ্যৰ যুদ্ধৰ জুইকুৰা নুমুৱাবলৈ বিশ্বৰ নেতাসকলে কি ভূমিকা লয় তালৈ সকলোৱে আগ্ৰহেৰে বাট চাইছে।

Share This