গৌৰৱৰ দিন

dainik janambhumi May 28, 2025

গৌৰৱ গগৈ অসম প্রদেশ কংগ্ৰেছ কমিটীৰ সভাপতি নির্বাচিত হোৱাটো সাম্প্রতিক ৰাজ্যৰ ৰাজনীতি তথা কংগ্ৰেছৰ বৰ্তমানৰ অৱস্থাৰ পৰিপ্ৰেক্ষিতত প্রত্যাশিত ঘটনা বুলি ক'ব পাৰি। ২০১৬ চনত তৰুণ গগৈ নেতৃত্বাধীন চৰকাৰৰ পতনৰ পাছৰে পৰা ৰাজ্যত কংগ্ৰেছৰ দুৰ্গটো ইমান ক্ষিপ্র গতিত খহি আহিছে আৰু এই খহনীয়াই দলটোক কর্কট আক্রান্ত ৰোগীৰ দৰে জীর্ণ-শীর্ণ কৰি আনিছে যে এই সময়ত এগৰাকী শক্তিশালী আৰু জনসাধাৰণে বিশ্বাস কৰিব পৰা নেতাই নেতৃত্ব নিদিলে দলটো অস্তিত্বহীন হৈ পৰিলেও আচৰিত হ'ব লগীয়া নহ'লহেঁতেন।

প্রয়াত অঞ্জন দত্তৰ পাছত ৰিপুন বৰাৰ পৰা ভূপেন বৰালৈকে প্রদেশ কংগ্ৰেছৰ নেতাসকলৰ কাৰ্যকালত ইটোৰ পিছত সিটো নিৰ্বাচনত পৰাজিত হোৱাৰ পৰিপ্ৰেক্ষিতত দলটোৰ সক্ষমতাক লৈ জনসাধাৰণৰ মাজত প্রশ্ন উত্থাপিত হৈছিলেই। দলত্যাগৰ গড্ডালিকা প্ৰৱাহে দলটোৰ প্ৰতি বিশ্বাসযোগ্যতাও কমাই আনিছিল। দলটোৰ একাংশ নেতা-কৰ্মীৰ এটা ভৰি কংগ্ৰেছত আৰু আনটো ভৰি বিজেপিত থকা বুলি দলৰ নেতৃত্বৰ পৰাই অভিযোগ উত্থাপিত হৈছিল। এনে অৱস্থাত এগৰাকী সবল আৰু বিশ্বাসযোগ্য নেতাৰ প্ৰদেশ কংগ্রেছত প্রয়োজন হৈছিল আৰু সেই নেতাজন যে গৌৰৱ গগৈৰ বাদে আন কোনো হ'ব নোৱাৰে সেইটো সাম্প্ৰতিক সময়ৰ বিচাৰ-বিবেচনাই নির্ণয় কৰি দিছিল। নিখিল ভাৰত কংগ্ৰেছ কমিটীৰ হাইকমাণ্ডে মাথোঁ সময়ৰ সেই বিচাৰৰ ৰায়ত ছীল-মোহৰহে মাৰিলে।

কেইবাটাও অৰ্হতাই গৌৰৱ গগৈক এই সময়ত অসমত কংগ্রেছক নেতৃত্ব দিবলৈ আটাইতকৈ যোগ্য নেতা বুলি বাছনিত তুলিবলৈ সমর্থন দিছে। ইয়াৰে প্ৰথমটো হৈছে 'ফে'চ ভেল্যু' অর্থাৎ তেওঁৰ অভিব্যক্তিৰ মূল্য। এক নিষ্কলুষ মুখাবয়ৱ আৰু অতি অমায়িক আচৰণ তথা ব্যৱহাৰ। এগৰাকী প্রাক্তন মুখ্যমন্ত্ৰীৰ পুত্ৰ হোৱা সত্ত্বেও তেওঁৰ ব্যৱহাৰত অহংকাৰ দেখা পোৱা নাযায়। সৰ্বসাধাৰণক আকৰ্ষণ কৰিবলৈ এগৰাকী নেতাৰ এইটো এটা ডাঙৰ গুণ। দ্বিতীয় অৰ্হতাটো হৈছে তেওঁৰ প্ৰদৰ্শন। সমগ্র দেশত বিজেপিৰ জয়জয়-ময়ময় অৱস্থাত সংসদৰ মজিয়াত ক্ষুৰধাৰ-যুক্তিসমৃদ্ধ ভাষণেৰে সদনক তভক মনাব পৰা, প্ৰধানমন্ত্ৰী নৰেন্দ্ৰ মোদী, গৃহ মন্ত্রী অমিত শ্বাহৰ দৰে অতি শক্তিশালী নেতাৰ চকুত চকু থৈ কথা ক'ব পৰাটোৱে গৌৰৱ গগৈক জনসাধাৰণৰ মাজত জনপ্ৰিয় কৰি তুলিছে। এই শক্তিৰ বাবেই কম বয়সীয়া গৌৰৱ গগৈ লোক সভাৰ বিৰোধী উপ দলপতি হ'ব পাৰিছে। এই দুটা অৰ্হতাৰ জোৰতে তেওঁ বিজেপিৰ প্ৰবল প্ৰতিৰোধকো নেওচি যোৱাটো লোক সভাৰ নিৰ্বাচনত প্রবল জনসমর্থনেৰে যোৰহাট সমষ্টিৰ পৰা বিজয়ী হ'বলৈ সক্ষম হৈছিল। বিজেপিৰ প্ৰবল গণ-ভিত্তিৰ মাজতো যে গৌৰৱ গগৈয়ে কংগ্ৰেছৰ বিজয় ধ্বজা উৰুৱাব পাৰে, সেইটো প্রতিপন্ন কৰিব পৰাটোৱে তেওঁৰ সক্ষমতাৰ প্ৰতি জনসাধাৰণৰ বিশ্বাস দুগুণে বঢ়াই তুলিলে। অসমত কংগ্ৰেছৰ অৱক্ষয় ঘটিলেও গৌৰৱ গগৈৰ জনপ্রিয়তা দ্রুতগতিত বাঢ়ি গৈ আছে।

গতিকে, তেওঁৰ কান্ধত প্ৰদেশ কংগ্ৰেছৰ দায়িত্ব তুলি দি দলৰ হৃত গৰিমা ঘূৰাই আনিবলৈ সক্ষম হ'ব বুলি হাইকমাণ্ডে ভাবিছে। লগতে গৌৰৱৰ আছে এটা মূল্যৱান পৰিচয়। তেওঁ অসমৰ এগৰাকী জনপ্রিয় মুখ্যমন্ত্ৰীৰ সন্তান, যাৰ বৰাক-ব্ৰহ্মপুত্ৰ উপত্যকা নির্বিশেষে সমগ্র ৰাজ্যত আছিল অতুলনীয় প্রভাৱ। এই সকলোবিলাক মিলি গৌৰৱ গগৈক এগৰাকী গ্রহণযোগ্য নেতা ৰূপে প্রতিষ্ঠা কৰিছে। কিন্তু গৌৰৱ গগৈ এতিয়াহে আচল প্রত্যাহ্বানৰ সন্মুখীন হ'ব। কাৰণ নেতা ৰূপে গ্রহণযোগ্য হ'লেও তেওঁৰ বাবে ক্ষেত্রখন এতিয়া মসৃণ হৈ থকা নাই। প্রথম কথা, তেওঁ বিধ্বস্ত, জৰ্জৰিত দল এটাক নেতৃত্ব দি ২০২৬-ৰ বিধানসভাৰ নিৰ্বাচনৰ সন্মুখীন হ'ব লাগিব। দ্বিতীয়তে, বিজেপিৰ প্ৰবল আৰু সবল গণ-ভিত্তিৰ লগতে মুখ্যমন্ত্রী ড° হিমন্ত বিশ্ব শৰ্মাৰ অতি চতুৰ, বিচক্ষণ ৰাজনীতিৰ সন্মুখত কংগ্রেছক আগুৱাই নিয়াৰ ক্ষুৰৰ সাঁকোৰ ওপৰেদি খোজকাঢ়ি আগুৱাই যাব লাগিব। গৌৰৱ গগৈৰ ৰাজনৈতিক জীৱনৰ ইতিবাচক দিশ বহুত যদিও তেওঁ সাংসদ ৰূপে প্রতিনিধিত্ব কৰা অৱস্থাত পঞ্চায়ত নিৰ্বাচনত যোৰহাট লোক সভা সমষ্টিত কংগ্ৰেছৰ অতি শোচনীয় পৰাজয় হোৱাটো তেওঁৰ বাবে এক নেতিবাচক অধ্যায় ৰূপে গণ্য হৈছে আৰু অহা দিনবোৰত তেওঁ ইয়াৰ প্ৰভাৱৰ পৰা মুক্ত নহ'ব। তৰুণ গগৈৰ আমোলত উজনিৰ সমগ্র চাহ শ্রমিকৰ ভোট বেংক কংগ্ৰেছৰ লগত আছিল, এতিয়া নাই। অন্য জাতি-জনগোষ্ঠীসমূহৰো বিজেপিৰ প্রতি আনুগত্য কিমান নির্বাচনবিলাকে প্রমাণ কৰি দিছে। অন্যহাতে, মুখ্যমন্ত্রী ড° হিমন্ত বিশ্ব শর্মাই গৌৰৱ গগৈ আৰু পৰিয়ালৰ বিৰুদ্ধে পাকিস্তান তথা আই এছ আইৰে সংযোগৰ অভিযোগটো আনি এই কথাই বুজাই দিছে যে গগৈৰ নতুন যাত্ৰা বৰ সহজ নহ'ব। ড° শৰ্মাই পাকিস্তানৰে সংযোগৰ অধ্যায়টো বিশেষ তদন্তকাৰী গোট গঠনেৰে এনেকৈ উপস্থাপন কৰিছে যে ই তথ্য-ভিত্তিক অভিযোগ নে ৰাজনৈতিক অভিযোগ তাক একে আষাৰে কৈ দিব পৰা অৱস্থাত নাই। সন্মুখত ১০ ছেপ্টেম্বৰত এটা সময়সীমা মুখ্যমন্ত্ৰীগৰাকীয়ে বান্ধি দিছে। গতিকে, সেই সময়ত বিষয়টো চয়-নিচয় হোৱালৈকে গৌৰৱ গগৈয়ে এই অভিযোগটো কঢ়িয়ায়ে নতুন ৰাজনৈতিক দায়িত্ব আগবঢ়াই নিব লাগিব। এতিয়ালৈকে অৱশ্যে গৌৰৱ গগৈয়ে অতি কৌশলেৰে অভিযোগটোৰ পৰা নিজক সুৰক্ষিত কৰি ৰাখিবলৈ সক্ষম হৈছে। মুখ্যমন্ত্রীয়ে পতা জালখনত তেওঁ এতিয়ালৈকে সোমাই পৰা নাই। এনেদৰে ভিন্নমুখী প্রত্যাহ্বানৰ সন্মুখীন হৈ আৰম্ভ হ'ব গৌৰৱ গগৈৰ নতুন যাত্রা।

১৯৯৬ চনত ৰাজ্যত দ্বিতীয়বাৰলৈ প্ৰফুল্ল কুমাৰ মহন্তৰ চৰকাৰ গঠনৰ পাছত পৰাজিত কংগ্ৰেছক নেতৃত্ব দিবলৈ দিল্লীৰ পৰা তৰুণ গগৈক আদৰি আনিছিল তদানীন্তন অসমৰ কংগ্ৰেছ নেতাসকলে। তাৰ পাছত কংগ্ৰেছক শক্তিশালী কৰি ২০০১ চনত গগৈয়ে যেনেকৈ ৰাজ্যৰ শাসনত অধিষ্ঠিত কৰিলে, ২০০১-ৰ পৰা ২০১৬ চনলৈকে ৰাজ্যৰ মুখ্যমন্ত্রী হৈ তৰুণ গগৈয়ে বিমলা প্রসাদ চলিহাৰ পিছত সর্বাধিক কালৰ মুখ্যমন্ত্ৰী হোৱাৰ অভিলেখ গঢ়িলে সেয়া এতিয়া ইতিহাস। পুত্র গৌৰৱ গগৈও একেদৰেই আহিছে প্রদেশ কংগ্ৰেছৰ শীৰ্ষ নেতৃত্বলৈ। পিতৃৰ পদাংক অনুসৰণ কৰি তেওঁ কংগ্ৰেছক দুৰ্যোগৰ পৰা উদ্ধাৰ কৰিব পাৰিবনে, পাৰিবনে পুনৰ ৰাজ্যৰ ক্ষমতাসীন কৰিব- তালৈ কৌতূহলেৰে বাট চাব ৰাজ্যবাসীয়ে। কিন্তু এইটোও ঠিক যে ১৯৯৬ আৰু ২০২৫-ৰ ৰাজনৈতিক পৰিৱেশত আছে আকাশ-পাতাল পার্থক্য।

Share This