সাংবাদিক নিগ্রহ প্রসংগত

dainik janambhumi March 29, 2025

ডিজিটেল ডেস্ক : স্বৰাজোত্তৰ অসমৰ ষাঠি-সত্তৰ দশকৰ অসমত সমবায় খণ্ডৰ বিকাশ হৈছিল। এই সমবায় আন্দোলনত জড়িত হৈছিল দেশৰ স্বাধীনতা আন্দোলনত অংশ লোৱা এচাম আদর্শবাদী নেতা আৰু সমাজকর্মী। পৰৱৰ্তীকালত তেনে আদর্শবাদী আৰু দায়বদ্ধ কৰ্মীৰ সংখ্যা হ্রাস পাই আহিল। নেতৃত্বৰ দুৰ্বলতা আৰু আন কেতবোৰ কাৰণত সমবায় আন্দোলনৰ আগৰ গৌৰৱময় দিনবোৰ আৰু নাথাকিল। সেয়ে হ'লেও সমবায় খণ্ডৰ দুই-এটা প্রতিষ্ঠান এতিয়াও চলি আছে। তাৰে এটা হ'ল অসম সমবায় এপেক্স বেংক। এই বেংকে বহুক্ষেত্ৰত অসমৰ বিভিন্ন অঞ্চলত ভালকৈয়ে সেৱা আগবঢ়াই আহিছে। অসম চৰকাৰৰ সমবায় বিভাগৰ দ্বাৰা পৰিচালিত এনে প্রতিষ্ঠানসমূহৰ পৰিচালনাত ব্যৱসায় পৰিচালনাৰ কৃতিত্ব সম্পন্ন লোকৰ পৰিৱৰ্তে চৰকাৰ চলোৱা দলৰ নেতা-পালি নেতাইহে আগস্থান পায়। 

বর্তমানো এই চৰকাৰৰ দিনত সমবায় এপেক্স বেংকত বিজেপিৰ বিধায়ক, মন্ত্রী বা মন্ত্ৰী-বিধায়কৰ মনোনীত লোকেই দায়িত্বত আছে। এই বেংকত সংঘটিত হোৱা নানা অনিয়ম তথা কেলেংকাৰি সম্পর্কত যোৱা বহু বছৰ ধৰি নানা বা-বাতৰি ওলাই আহিছে। দুর্নীতি-অনিয়ম, স্বজন-তোষণ সম্পর্কীয় প্রকাশিত বাতৰিসমূহৰ পৰা এই ধাৰণাও বহুতেই কৰে যে এই বেংকো আন তেনে বহু বিত্তীয় প্ৰতিষ্ঠানৰ দৰে অচিৰেই সংকটৰ গৰাহত পৰিব। সেইবাবেই দুই-এক সংগঠন আৰু সচেতন ব্যক্তিয়ে এই বেংকৰ ভিতৰচ'ৰাৰ ঘটনাৱলী সম্পর্কে উত্থাপন হোৱা অভিযোগ আৰু বেংকৰ ভিতৰচ'ৰাৰ এটি স্পষ্ট ধাৰণা পাবৰ বাবে চেষ্টা কৰি আহিছে। চৰকাৰৰ ওচৰতো এই সন্দৰ্ভত দাবী উত্থাপন কৰিছে। সেইবাবেই অলপতে অসমৰ এটা যুৱ সংগঠনে এটা প্রতিবাদী কাৰ্যসূচী গ্ৰহণ কৰে। এই সন্দৰ্ভত খবৰ সংগ্ৰহ কৰিবলৈ এটা প'ৰ্টেলৰ সাংবাদিক বেংকৰ কাৰ্যালয়লৈ দায়িত্বত থকা বিষয়াক লগ ধৰিব খোজোঁতে অথন্তৰ। সাংবাদিকজনক প্রথমে আটক কৰি পাছত গ্ৰেপ্তাৰ কৰা হয়। চৰকাৰৰ দুৰ্নীতি-অনিয়ম সম্পৰ্কত অনুসন্ধান কৰিবলৈ যোৱা সাংবাদিকৰ প্ৰতি যোৱা কেইটামান দশকত এনে আচৰণেই কৰি অহা দেখা গৈছে। অসমৰ সাংবাদিকসকলে যাতে চৰকাৰী অন্যায়-অনিয়ম সন্দৰ্ভত নির্বিকাৰ হৈ থাকে, চাপত থাকে, সেইবাবেই যে চৰকাৰৰ ফালৰ পৰা প্ৰায়ে এনে দমনমূলক ব্যবস্থা গ্ৰহণ কৰা হৈ আহিছে- সেই কথা এতিয়া সকলোৱে বুজি পোৱা হৈছে। 

সাংবাদিকসকল কেতিয়াও এটা বহতীয়া শ্রেণী হৈ উঠিব নোৱাৰে। সাংবাদিকৰ এয়া ঐতিহাসিক দায়িত্ব। কিন্তু স্বেচ্ছাচাৰী আৰু দাম্ভিক শাসকে সদায়েই বিষয়া কৰ্মচাৰীৰ পৰা সাংবাদিকলৈ সকলোৰে পৰা অন্ধ আনুগত্য আশা কৰে। কাৰণ দাম্ভিক আৰু স্বেচ্ছাচাৰী শাসকৰ বহু দোষ-দুৰ্বলতা থাকে, কেনেবাকৈ সেইবোৰ গোপন অধ্যায় মুকলি হৈ পৰে বুলি এটা ভীতি আৰু চাপে তেওঁলোকৰ মনত অহৰহ ক্ৰিয়া কৰি থাকে। সেইবাবেই অধিক সন্দেহপ্রবণ হৈ উঠে। ছাঁতে ভূত দেখে। শেহতীয়াকৈ 'দ্য ক্ৰছকাৰেণ্ট'ৰ সাংবাদিকগৰাকীক গ্ৰেপ্তাৰৰ ৰাজ্যজুৰি তীব্র প্রতিবাদ হৈছে। অৱশেষত তেওঁ জামিন লাভ কৰে। পিছত তেওঁৰ বিৰুদ্ধে পুনৰ এটা গোচৰ জাপি দি গ্ৰেপ্তাৰ কৰা হয়। ৰাষ্ট্ৰৰ চতুৰ্থ স্তম্ভ তথা মত প্ৰকাশৰ অধিকাৰৰ প্ৰতি চৰকাৰৰ মনোভাব, এই কথাই সুন্দৰকৈ প্ৰমাণ কৰিলে।অসমত সাংবাদিকতা এটা জীৱিকাৰূপে প্রতিষ্ঠিত হ'বলৈ এতিয়াও বহুত বাকী। বহু সাংবাদিকেই তুলনামূলকভাৱে কম দৰমহাতে কাম কৰি থাকিব লগা হৈছে। তদুপৰি আছে নানা চাপ আৰু অনিশ্চয়তা। অসমৰ মুষ্টিমেয় কেইটামান সংবাদ গোষ্ঠীয়েহে সাংবাদিক-সংবাদকর্মীক নিৰ্ধাৰিত নিৰিখত দৰমহা দিব পাৰিছে। জিলা আৰু আঞ্চলিক পৰ্যায়ৰ ছবিখন আৰু শোক লগা। সাংবাদিকতাৰ আয়ত নিৰ্ভৰ কৰিব নোৱৰাৰ একাংশই নিজাববীয়াকৈ ব্যৱসায় আদিও কৰে।
অসমৰ সংবাদপত্ৰৰ ইতিহাস চালেও তেনে এখন ছবিয়েই দেখা পোৱা যায়। মফচলৰ বহু সাংবাদিকৰ মূল পেছা বেলেগ হোৱাৰ পাছতো সুদীর্ঘ জীৱন তেওঁলোকে সংবাদসেৱা কৰি গৈছিল। অসমৰ সাংবাদিকতাৰ ইতিহাসত তেনে বহু সাংবাদিকৰ অৱদানৰ কথা সোণালী আখৰেৰে লিপিবদ্ধ হৈ আছে। আনকি আধুনিক অসমীয়া সাংবাদিকতাৰ অন্যতম ভেটি স্বৰূপ 'জোনাকী'ৰ প্ৰথমগৰাকী সম্পাদক তথা 'অসমীয়া'ৰ প্ৰকাশক চন্দ্ৰকুমাৰ আগৰৱালা এগৰাকী ব্যৱসায়ীয়েই আছিল। গতিকে সাংবাদিকতা আৰু অন্য পেছাক সম্পূৰ্ণ পৃথক কৰিব পৰা পৰিৱেশ, অৱস্থা কিম্বা ইতিহাস কোনোটোৱেই অসমৰ সাংবাদিকতাত নাই।

গতিকে এই দৃষ্টিকোণৰ পৰা দিলোৱাৰ হুছেইন মজুমদাৰৰ বিষয়টো চৰ্চা কৰিবলৈ প্ৰয়াস কৰাটো উচিত নহয়। ইতিমধ্যে সাংবাদিকসকলৰ তৰফৰ পৰা কোৱা হৈছেই যে অসম সমবায় এপেক্স বেংকৰ কেতবোৰ অনিয়মৰ তথ্য বিচাৰিছিল দিলোৱাৰ হুছেইন মজুমদাৰে। সেই বিষয়টোক গুৰুত্ব দিহে বিষয়টোৰ বিচাৰ হোৱা উচিত। চৰকাৰৰ তৰফৰ পৰা ক'ব খোজা হৈছে যে তেওঁ ব্যক্তিগত স্বার্থত বেংকটোলৈ গৈছিল। বেংক কর্তৃপক্ষ, আৰক্ষী অথবা চৰকাৰৰ দায়িত্ব হ'ল প্ৰকৃত সত্যটো প্রতিপন্ন কৰা। এইক্ষেত্ৰত বেংকৰ চি চি টিভিৰ ফুটেজ ৰাজহুৱাকৈ প্রকাশ কৰিবলৈও বিভিন্ন পক্ষই দাবী জনাইছে। যিহেতুকে এজন সাংবাদিকক দুবাৰকৈ গ্ৰেপ্তাৰ কৰা হৈছে, সেয়েহে তেওঁৰ বিৰুদ্ধে যদি কিবা প্রত্যয়জনক অভিযোগ আছে তাক প্রতিপন্ন কৰাটো চৰকাৰৰ নৈতিক দায়িত্ব। অন্যথা এপেক্স বেংকৰ দুর্নীতি ঢাকিবলৈ চৰকাৰে সাংবাদিকজনক গ্ৰেপ্তাৰ কৰিছে বুলি ধাৰণা এটা ল'বলৈ জনসাধাৰণ বাধ্য হ'ব।

Share This