মুন্না ভাই আৰু...

dainik janambhumi July 14, 2025

ডিজিটেল ডেস্কঃ ২০০৩ চনতে নির্মিত ৰাজকুমাৰ হিৰানীৰ এখন চিনেমা-নাম মুন্না ভাই এম বি বি এছ। সঞ্জয় দত্ত আৰু আৰচাদ ৱাৰ্ছিৰ অভিনয়েৰে বাণিজ্যিকভাৱে সফল চিনেমাখনৰ বক্তব্য আছিল বেছ জোৰদাৰ। সেয়ে ছবিখন প্ৰচুৰ জনপ্ৰিয় হৈছিল। আৰু সেই তেতিয়াৰ পৰাই ভুৱা চিকিৎসকৰ প্ৰসংগ উত্থাপন হ'লেই অৱধাৰিতভাৱেই আহিছিল এই উপমা-'মুন্না ভাই চিকিৎসক'!

১১ জুলাইৰ 'দৈনিক জনমভূমি'ত প্রকাশ হৈছে দুটা বাতৰি। এটা বাতৰি অনুসৰি, ভুৱা চিকিৎসকৰ অভিযোগত যোৰহাটত দুজনকৈ লোক গ্ৰেপ্তাৰ হৈছে। মন কৰিব লগীয়া কথাটো হ'ল দুয়োজনে দীঘলীয়া সময় ধৰি চহৰৰ মাজমজিয়াত আৰু চহৰৰ উপকণ্ঠত চিকিৎসা 'বৃত্তি' চলাই আহিছিল। আনটো বাতৰি আছিল জুৰীয়াৰ সমীপত দগাঁৱত এজন ভুৱা চিকিৎসকক আৰক্ষীয়ে গ্ৰেপ্তাৰ কৰে। তেৱোঁ শিশু ৰোগ বিশেষজ্ঞৰূপে চিকিৎসা সেৱা আগবঢ়াইছিল। এইকেইটা থাওকতে পোৱা উদাহৰণ। মূল কথাটো হ'ল ৰাজ্যত এনে ভুৱা চিকিৎসক অলেখ, সততে প্রকাশ হৈ থকা এনে বাতৰিবোৰেই এনে ঘটনা বৃদ্ধিৰ সত্যতা প্ৰমাণ কৰে। এই ঘটনাসমূহে প্রধানকৈ দুটা গুৰুতৰ বিষয়ৰ সংকেত দিয়ে। এক, আমাৰ ৰাজ্যত এতিয়াও চিকিৎসক-ৰোগীৰ অনুপাত আশানুৰূপ নহয়, যাৰ বাবে এনে ভুৱা চিকিৎসকসকলে সহজে ৰোগী লাভ কৰে। আন কথাটো আৰু গুৰুত্বপূৰ্ণ। সেয়া হ'ল বিভাগীয় কর্তৃপক্ষৰ দুৰ্বল ভূমিকা। এখন চহৰৰ মাজমজিয়াতেই যদি ভুৱা চিকিৎসক গ্ৰেপ্তাৰ হয়, তেনেহ'লে বুজাত অসুবিধা নহয় যে ছাইনব'র্ড এখন আঁৰি যিকোনো লোকেই নিজকে চিকিৎসক বুলি জাহিৰ কৰি চিকিৎসা বৃত্তি চলাব পৰাকৈ আমাৰ স্বাস্থ্য বিভাগৰ লগতে সংশ্লিষ্ট প্রশাসনীয় কর্তৃপক্ষসমূহ সোপাঢিলা। এনেবোৰ ঘটনা জনস্বাস্থ্যৰ বাবে কিধৰণৰ গুৰুতৰ ভাবুকি, তাক নিশ্চয় বহলাই বুজাই কোৱাৰ প্ৰয়োজন নাই। জনসাধাৰণৰ জীৱনক লৈ হেতালি খেলা এই ভুৱা চিকিৎসকসকলৰ ক্ষেত্ৰত বিভাগ কঠোৰ হ'বই লাগিব আৰু নিয়মীয়া পৰীক্ষা আৰু চোকা নজৰ ৰাখিব লাগিব-চিকিৎসা সেৱাৰ সৈতে জড়িত যিকোনো ব্যক্তি, প্রতিষ্ঠানৰ প্ৰতি।

এই প্রসংগত সম্প্রতি চর্চাত থকা আয়ুর্বেদিক চিকিৎসক এজনৰ প্ৰসংগও উল্লেখযোগ্য। তেওঁৰ তপা মূৰত চুলি গজোৱাৰ দাবী সম্পৰ্কত ভিন্ন মতৰ সৃষ্টি হৈছে। আনকি মুখ্যমন্ত্ৰীয়েও পাতলীয়া ভাবেৰে কৈছে তপা মানুহৰ মূৰত চুলি গজাব পাৰিলে নোবেল বঁটা দিয়া উচিত! ইফালে তেওঁ তপা মানুহক চুলি গজোৱাৰ বাবে বিভিন্ন ঠাইত শিবিৰ অনুষ্ঠিত কৰাৰ বাতৰি পোৱা গৈছিল। স্বাভাৱিকতেই এনেবোৰ স্ব-বিৰোধী কথাই ৰাইজক বিমোৰত পেলায়। কিন্তু স্বাস্থ্য বিভাগৰ এইটো দায়িত্ব আছিল যে বিষয়টোৰ সত্যাসত্য নিৰূপণ কৰি এটা স্পষ্টীকৰণ প্ৰকাশ কৰাৰ। আৰু স্বাস্থ্য বিভাগৰ অজ্ঞাতেই যদি কোনোবাই তপা মানুহে মূৰত চুলি গজোৱাৰ ৰাজহুৱা শিবিৰ অনুষ্ঠিত কৰি থাকিব পাৰিছে, সেয়া জনস্বাস্থ্যৰ প্রতি এক চিন্তাৰ বিষয় নহয় জানো? অলৌকিক দাবী আৰু অপৰীক্ষিত ঔষধে জনসাধাৰণৰ জীৱন আৰু স্বাস্থ্য ধ্বংস কৰিব পাৰে। সেয়ে এই বিষয়ত স্বাস্থ্য বিভাগে স্পষ্ট মন্তব্য আগবঢ়োৱাৰ লগতে সমগ্র বিষয়টোত চোকা নজৰ ৰাখিব লাগিব। এই কথা ঠিক, আয়ুর্বেদ এক প্রাচীন ঐতিহ্যৰে ভৰা চিকিৎসা পদ্ধতি। ঐতিহ্যৰ লগতে এই চিকিৎসাৰ বৈজ্ঞানিক ভিত্তি আছে। অগণন লোকে এই চিকিৎসা পদ্ধতি অৱলম্বন কৰি সুফল লাভ কৰিছে, এয়া কোনো অলৌকিক কাণ্ড নহয়, ই এক প্রণালীবদ্ধ চিকিৎসাৰ ফলহে। কিন্তু এই কথাও ঠিক যে আয়ুৰ্বেদৰ নাম লৈ অনেকেই বহু আজগুবী দাবী আৰু অপৰীক্ষিত ঔষধেৰে চিকিৎসা চলাই আহিছে। এইবোৰ ঔষধৰ ক্ৰিয়া কেনেকুৱা, পার্শ্বক্রিয়া কি পর্যায়ত, সেই সম্পর্কে হোৱা নাই কোনো প্রণালীবদ্ধ গৱেষণা, অনুসন্ধান। সমগ্ৰ দেশতে আয়ুৰ্বেদৰ নামত এনে অলেখ ঠগ-প্ৰৱঞ্চনাৰ কাৰবাৰ চলি আছে, যি গৰিমা আৰু বিশ্বাসযোগ্যতা হ্রাস কৰিছে আয়ুৰ্বেদৰ। দৰাচলতে আয়ুর্বেদ তথা পৰম্পৰাগত থলুৱা চিকিৎসাৰ দৰে গৰিমামণ্ডিত ফলপ্রসূ পদ্ধতিসমূহৰ সম্পৰ্কত বিস্তৰ গৱেষণা আৰু চৰ্চাৰ যথেষ্ট প্রয়োজন আছে।

এনেক্ষেত্ৰত চৰকাৰ তথা স্বাস্থ্য বিভাগৰ দায়িত্ব চিকিৎসাৰ নামত চলা সকলো কাম-কাজৰ প্ৰতি কঠোৰ আৰু তীক্ষ্ণ চকু দিয়া। কোনো কাৰণতেই যেন অর্হতাহীন কোনো লোকেই চিকিৎসাৰ নামত আভুৱা-ভাঁৰাৰ সুযোগ নাপায়, তাৰ প্ৰতি চৰকাৰে কঠোৰ চকু দিবই লাগিব। সেইদৰে, আয়ুর্বেদ বা পৰম্পৰাগত থলুৱা চিকিৎসাৰ নামত অপৰীক্ষিত কোনো ঔষধ বা চিকিৎসা ব্যৱস্থা যেন জনপ্রিয় নহয়, তাৰ প্ৰতিও স্বাস্থ্য বিভাগ সতর্ক থাকিব লাগিব। আৰু সর্বোপৰি সতর্ক থাকিব লাগিব ৰাইজ নিজে। চিকিৎসাৰ নামত কোনেও যাতে আভুৱা-ভাঁৰিব নোৱাৰে, তাৰ বাবে নিজে সজাগ আৰু সতর্ক থকাৰ গত্যন্তৰ নাই। কথাতে কয়- 'সাৱধানীৰ মৰণ নাই'।

Share This