অশ্লীলতাৰ পোহাৰ

dainik janambhumi February 14, 2025

ডিজিটেল ডেস্ক: আমাৰ সামাজিক জীৱনত নিত্য নতুন বিষয়ৰ সংযোজন ঘটিবলৈ ধৰিছে। ধন উপাৰ্জনৰ অতি সহজ মাধ্যম হৈ পৰিছে ফে'চবুক, ইনষ্টাগ্রাম, ইউটিউব আদি সামাজিক মাধ্যমসমূহ।কোনোধৰণৰ বাধা-নিষেধ নোহোৱাকৈয়ে যিকোনো বিষয় এটাৰ ভিডিঅ' প্রস্তুত কৰি এৰি দিয়া হয় ছ'চিয়েল মিডিয়াত। মুহূর্ততে ভাইৰেল হৈ সর্বত্র তোলপাৰ লাগে। বহু সময়ত সৰু সৰু বিষয় এটিও সামাজিক মাধ্যমত এনেধৰণে প্ৰচাৰ হ'বলৈ ধৰে যে সমস্যাৰে জৰ্জৰ সমাজখনৰ কথা আমি পাহৰি পেলাওঁ।

 ইউটিউবাৰ, কণ্টেণ্ট ক্রিয়েটৰ, ভলগাৰ, ছ'চিয়েল ইনফ্লুৱেন্সাৰ আদি আমাৰ বাবে পৰিচিত শব্দ হৈ পৰিছে। পুৱা শুই উঠাৰ পৰা নিশা টোপনি নহা পর্যন্ত এতিয়া কি শিশু, কি বৃদ্ধ সমাজৰ প্ৰায়ভাগ লোকেই এইবোৰত অভ্যস্ত হৈ পৰিছে। হঠাৎ পাণ্ডৱবর্জিত স্থানত কোনো শিশু নাইবা বৃদ্ধও হৈ পৰিছে 'চেলিব্রেটী'। চেলিব্রেটীৰ সংজ্ঞা আজি সলনি হৈ পৰিছে। ফে'চবুক, ইন্‌ষ্টাগ্রাম, ইউটিউবৰ ফল'ৱাৰে নিয়ন্ত্ৰণ কৰিছে এতিয়া চেলিব্রেটীৰ সংজ্ঞা। লক্ষ লক্ষ ফল'ৱাৰ থকা যদু-মধু যিকোনো এজনে প্রকৃত চেলিব্রেটী এজনৰ সৈতে ফেৰ মাৰিব পৰা হৈছে। সমাজত সেইসকল লোকক আগস্থান দিয়া হৈছে, মেলে-মিটিঙে বক্তা হিচাপে আমন্ত্রণ জনোৱা হৈছে। তেনেসকলৰ প'ডকাষ্টত আলহী হৈছে প্রখ্যাত ৰাজনীতিবিদ, চলচ্চিত্ৰ তাৰকাকে ধৰি গণ্য-মান্য ব্যক্তি। অভাৱনীয় মান্যতা পাইছে এইসকল 'চেলিব্রেটী'য়ে। 'চেলিব্রেটী'ৰ এই ভাগ-দৌৰত সেয়ে যিয়ে যেনেকৈ পাৰে অংশ লৈছে। 'ভিউৱাৰ' আৰু 'ফল'ৱাৰ' বিচাৰি যিকোনো বিষয়বস্তু, সেয়া লাগিলে নিজৰ বেডৰূমৰ নিবিড় মুহূর্তই হওক, নাইবা টয়লেটৰ কথাই হওক সমাজৰ আগত উপস্থাপন কৰা হৈছে। মুঠতে ব্যক্তিগত জীৱন আৰু সামাজিক জীৱনৰ মাজৰ পাৰ্থক্য সাম্প্ৰতিক সময়ত নোহোৱা হৈ পৰিছে।

অতি শেহতীয়াভাৱে সংঘটিত এক নির্লজ্জ কাণ্ডই সমগ্র দেশত জোকাৰণিৰ সৃষ্টি কৰিছে। 'ইণ্ডিয়াজ গট লেটেন্ট' নামৰ ইউটিউবৰ এক অনুষ্ঠানত কেইগৰাকীমান প্রতিযোগীক সোধা প্রশ্নই অশ্লীলতাৰ সকলো সীমা অতিক্রম কৰিছে। সময় ৰাইনা নামৰ ইউটিউবাৰগৰাকীৰ অনুষ্ঠানটোত প্রতিযোগীক চৰম অশ্লীল প্রশ্ন কৰাৰ লগতে যৌনগন্ধী আৰু অশ্লীল বাৰ্তালাপৰ ঘটনাক একেমুখে ধিক্কাৰ দিছে দেশৰ ৰাজনীতি, কলা-সংস্কৃতিৰ ক্ষেত্ৰখনৰ লগতে প্ৰতিটো ক্ষেত্ৰৰ লোকে। অনলাইন কমেডি শ্ব'টোৰ জৰিয়তে ধেমালিৰ নামত সীমা চেৰাই যোৱাকৈ অশ্লীল আৰু যৌনগন্ধী বাৰ্তালাপ কৰি সমগ্র দেশজুৰি নিন্দিত হৈছে। সৰ্বভাৰতীয় চিনে ৱৰ্কাৰ্ছ সংস্থাই ৫ ইউটিউৱাৰ আৰু শ্ব'টোৰ প্ৰযোজক তুষাৰ পূজাৰী, সৌৰভ বোথ্ৰাৰ বিৰুদ্ধে কঠোৰ শাস্তিৰ দাবী তোলাৰ লগতে শ্ব'টো বন্ধ কৰি দিয়াৰ বাবেও কেন্দ্রীয় গৃহ মন্ত্রীলৈ পত্ৰ প্ৰেৰণ কৰিছে। সামাজিক মাধ্যম তথা অ'টি টি প্লেটফর্মত অশ্লীলতা বিয়পোৱা আশিস চাঞ্চলানি, যশপ্রীত সিং, অপূর্ব মাখিজা, ৰণবীৰ এলাহাবাদীয়া আৰু সময় ৰাইনাসহ মুঠ পাঁচোজন ইউটিউবাৰৰ বিৰুদ্ধে অসম আৰক্ষীয়েও ৰুজু কৰিছে গোচৰ। এগৰাকী অসমীয়া প্রতিযোগীকো চৰম অশ্লীল প্রশ্ন কৰাৰ লগতে যৌনগন্ধী আৰু অশ্লীল বাৰ্তালাপ কৰিছিল এইসকলে। অসম আৰু অসমীয়াক কৰা অপমানৰ বাবে মুখ্যমন্ত্রী ড° হিমন্ত বিশ্ব শৰ্মাৰ নিৰ্দেশত তেওঁলোকৰ বিৰুদ্ধে অসম আৰক্ষীৰ ক্রাইম ব্রাঞ্চে গোচৰ ৰুজু কৰি তদন্ত আৰম্ভ কৰিছে। ৰাষ্ট্ৰীয় মহিলা আয়োগ আৰু মুম্বাই আৰক্ষীয়েও অনলাইন শ্ব'টোৰ সৈতে জড়িত আটাইকেইজন অভিযুক্তলৈ জাননী প্ৰেৰণ কৰিছে। গালি অবিহনে মুখৰ পৰা এটা শব্দও নোলায় এওঁলোকৰ। অনুষ্ঠানটোত যৌনতা, গোপন অংগক লৈ হাঁহি হাঁহি যিবোৰ প্ৰশ্ন কৰা হৈছিল সেয়াই সমগ্র বিশ্বকে লজ্জানত কৰিছে। প্রণিধানযোগ্য যে ইয়াৰে ৰণবীৰ এলাহাবাদীয়া হৈছে পুৰস্কাৰপ্ৰাপ্ত ইউটিউবাৰ। খোদ প্রধানমন্ত্রী নৰেন্দ্ৰ মোদী তেওঁৰ প্ৰশংসাত পঞ্চমুখ হৈছিল। কেইবাগৰাকীও কেন্দ্ৰীয় মন্ত্ৰীকে ধৰি নামী-দামী শিল্পীয়ে তেওঁৰ পডকাষ্টত অংশ লয়। লক্ষ লক্ষ অনুৰাগী আছে তেওঁৰ। কোটিৰ ঘৰত উপাৰ্জন কৰে। দেশৰ বিখ্যাত বিখ্যাত ব্যক্তি তেওঁৰ চেনেলৰ ছাবস্ক্রাইবাৰ। আনহাতে কাশ্মীৰৰ পৰা অহা সময় ৰাইনাৰ পিতৃ ৰাজেশ ৰাইনা দেশৰ এগৰাকী আগশাৰীৰ সাংবাদিক।

'ডার্ক কমেডি'ৰ নামত ইমান নির্লজ্জ কাণ্ড সংঘটিত হয় এইখন দেশত, য'ত মাতৃ-পিতৃক ঈশ্বৰ হিচাপে পূজা কৰা হয়। শিষ্টাচাৰ, বিনয় আৰু নৈতিকতাৰ ওপৰত গুৰুত্ব দিয়া আমাৰ দেশ সেইখন দেশ নহয়, য'ত পৰিয়ালৰ কোনো মূল্য নাই। বিদেশী অনুষ্ঠানৰ নকল কৰি কেৱল অর্থ উপাৰ্জনৰ বাবেই 'কণ্টেণ্ট'ৰ নামত সস্তীয়া কাৰবাৰ চলোৱা হয় এইখন দেশত, মহিলাৰ সন্মানক লৈ সমাজ, সংবিধানে কঠোৰ বিধি-বিধান আৰোপ কৰাৰ পাছতো এইখন দেশতেই ধেমালিৰ নামত কেৱল গালি-শপনি, মত প্রকাশৰ অধিকাৰৰ নামত দৰ্শকৰ সন্মুখত এগৰাকী মহিলাৰ কাপোৰ কাটি দিয়াৰ দৰে জঘন্য ঘটনা সঁচাকৈয়ে নিন্দনীয়। অৱশ্যে এই কথাও সঁচা যে এইখন দেশতেই হাজাৰ হাজাৰ যুৱক-যুৱতীয়ে ছ'চিয়েল মিডিয়াৰ সদ্বব্যৱহাৰ কৰিও ধন উপাৰ্জন কৰি আছে। অসমৰ ক্ষেত্ৰতেই সময় গগৈৰ দৰে ইউটিউবাৰ ইয়াৰ এক অন্যতম উদাহৰণ। যিখন দেশত এগৰাকী মহিলাৰ প্রতি দুই-তিনি ছেকেণ্ড সময় চাই থাকিলে হয়তো এজন লোকৰ বিৰুদ্ধে এটা গোচৰ ৰুজু হৈ এজন ব্যক্তি জে'ললৈ যাবলগীয়া হ'ব পাৰে সেইখন দেশৰ এটা অনুষ্ঠানত এইধৰণৰ নাৰীৰ প্ৰতি খোদ এগৰাকী নাৰীয়েও অপমানজনক মন্তব্য কৰাটো অকল্পনীয়। যিখন দেশত প্ৰতিদিনে হাজাৰ হাজাৰ নাৰীৰ শ্লীলতা হানিৰ দৰে ঘটনা সংঘটিত হৈছে, শ্রদ্ধা ৱাকাৰৰ দৰে এগৰাকী যুৱতীক টুকুৰা-টুকুৰ কৰি কাটি পেলোৱাৰ ঘটনা ঘটিছে সেইখন দেশতে এতিয়া সামাজিক মাধ্যমসমূহ অশ্লীলতা, ব্যাভিচাৰৰ প্ৰসাৰৰ নতুন মাধ্যম হৈ পৰিছে। এনে মাধ্যমৰ সুযোগ লৈ দৰ্শকৰ সন্মুখত এগৰাকী মহিলাক অশ্লীল প্রশ্ন সোধা আৰু দৰ্শকে হাঁহিত কিৰিলি পৰা সেইখন দেশৰ ভৱিষ্যৎ প্রজন্ম আজি কোন দিশে? ইয়াকেই যদি উত্থান বুলি ভবা হয় তেতিয়াহ'লে কি হ'ব? এইমুহূর্তত এটাই প্রশ্ন সকলোৰে মনত উত্থাপিত হৈছে, সেয়া হৈছে ছ'চিয়েল মিডিয়াত চৰকাৰে চেন্সৰশ্বিপৰ ব্যৱস্থা হাতত কেতিয়া ল'ব? কিন্তু ইয়াৰ পৰা আন এটা প্রশ্নও উত্থাপন হয় যে নিবনুৱা সমস্যাই ভয়ংকৰ ৰূপ ধাৰণ কৰাৰ সময়ত এইদৰে স্বাধীনভাৱে উপাৰ্জনৰ বাট মোকলোৱা আন বহু ভাল 'কণ্টেণ্ট ক্রিয়েটৰ'ৰ বাট এনে একাংশ কুলাংগাৰৰ বাবেই বন্ধ হ'ব নেকি?

Share This