শান্তিৰ প্ৰয়োজন

dainik janambhumi July 16, 2025

ডিজিটেল ডেস্ক : যোৱা প্রায় ৫টা দশকৰ পৰিস্থিতিয়ে অসমৰ আৰ্থ-সামাজিক-ৰাজনৈতিক পৰিৱেশ কেনেকৈ সলনি কৰি পেলাইছে, কেনেকৈ সংঘাতৰ আশংকা আৰু আতংকই মানুহক ভীতিগ্রস্ত কৰি ৰাখিছে, কেনেকৈ ৰাজ্যৰ অৰ্থনৈতিক ভেটিটো থৰক-বৰক হৈ পৰিছে সেই বিষয়বোৰ উল্লিখিত সময়ছোৱাৰ ঘটনা-প্ৰৱাহ দেখি থকা আৰু ইয়াৰ ভুক্তভোগী হোৱাসকলক বহলাই বুজাই কোৱাৰ প্ৰয়োজন নাই। এই সময়ছোৱাৰ বিক্ষিপ্ত সংঘাতবোৰে ৰাজ্যখনৰ জাতি-জনগোষ্ঠীসমূহৰ মাজত যে এক ধৰণৰ বিশ্বাসহীনতাৰ পৰিৱেশো যে গঢ়ি তুলিছে সেই সত্যটোকো অস্বীকাৰ কৰি লাভ নাই।

আজি অসহায়ভাৱে ৰাজ্যবাসীয়ে লক্ষ্য কৰিছে যে ৰাজ্যখনত এতিয়া খিলঞ্জীয়া জাতি-জনগোষ্ঠীৰ নৱ প্ৰজন্মটো সংস্থাপিত হোৱাৰ কোনো অৱলম্বন নোহোৱা হৈ পৰিছে। লাখ লাখ শিক্ষিত নিবনুৱাই হয় ৰাজ্য চৰকাৰৰ সীমিত নিযুক্তিৰ বিজ্ঞাপনকেইটালৈ আশাৰে বাট চাই থাকিব লগা হৈছে অথবা কিবা এটা সুযোগ লাভৰ সন্ধানত ৰাজ্যৰ বাহিৰলৈ দৌৰিব লগা হৈছে। বহিঃৰাজ্যলৈ কৰ্মসংস্থাপনৰ আশাত যোৱা বহু যুৱকৰ ৰহস্যজনক মৃত্যু ঘটাৰ বাতৰিবিলাকো এতিয়া প্রায় প্রাত্যহিক হৈ পৰিছে। এনে অৱস্থাত নতুন সংঘাত সৃষ্টিৰ গোন্ধ পালেই ৰাজ্যবাসী সন্ত্রস্ত হৈ পৰে। নতুন কোনোধৰণৰ সংঘাত ৰাজ্যবাসীয়ে নিবিচাৰে। ৰাজ্যবাসীক শান্তি লাগে আৰু শান্তিপূর্ণ অৱস্থাইহে অর্থনৈতিক ৰূপান্তৰৰ এক পৰিৱেশ ৰচনা কৰিব, অর্থনৈতিক নিৰাপত্তাৰ নতুন সম্ভাৱনাৰ দুৱাৰ মুকলি কৰিব বুলি ৰাজ্যবাসীয়ে বিশ্বাস কৰে।

সেইবাবেই ম্যানমাৰত থকা আলফা (স্বাধীন)ৰ শিবিৰত কেইদিনমান পূর্বে ড্র'ন আৰু ক্ষেপণাস্ত্ৰৰে হোৱা আক্রমণ আৰু এই আক্রমণত ৩জনকৈ আলফাৰ শীর্ষ স্থানীয় নেতাই প্রাণ হেৰুৱাব লগা হোৱা ঘটনাটোৱে ৰাজ্যবাসীৰ মনত এক নতুন শংকাৰ উদ্রেক ঘটাইছে। আলফা (স্বাধীন)ই এই আক্রমণ ভাৰতীয় সেনাই কৰা বুলি দাবী কৰিছে। ইয়াৰ বিপৰীতে চৰকাৰী পক্ষসমূহে এই আক্রমণত জড়িত থকাৰ কথা অস্বীকাৰ কৰিছে। নিজা নিশ্চিত তথ্য নথকাকৈ এই বিষয়ত মন্তব্য কৰা উচিত নহ'ব, কিন্তু সাধাৰণ জ্ঞানেৰে এই ধাৰণা কৰিব পৰা যায় যে আলফা (স্বা)ই নিশ্চয় জ্যেষ্ঠ সতীর্থক হেৰুৱাব লগা হোৱা এই ঘটনাৰ প্ৰতিশোধ লোৱাৰ এটা সুযোগ নিশ্চয় নিবিচৰাকৈ নাথাকিব। এনে পৰিপ্ৰেক্ষিতত যদি স্বাধীনতাকামী সশস্ত্র সংগঠনটোৱে কিবা অভিযান চলায় তেন্তে তাৰ পৰিসীমা নিশ্চয় অসমেই হ'ব।

যদি এনেকুৱাই হয় তেনেহ'লে সংঘাতৰ নতুন অধ্যায় এটা ৰচনা হ'ব। ১৯৯০-ৰ দশকৰ পৰা চলা আলফাৰ সশস্ত্র সংগ্রাম-কেন্দ্রিক সংঘাতৰ ভয়াৱহ ৰূপটোৰ অভিজ্ঞতা ৰাজ্যৰ গৰিষ্ঠ অংশৰ মানুহৰ আছে। ইয়াৰ পৰিণতিত কিমান অসমীয়া ডেকাই প্রাণ হেৰুৱালে, কিমান নিৰীহ মানুহ এই সংঘাতৰ বলি হ'ব লগা হ'ল সেই ইতিহাস মনলৈ আহিলে মনত ক্ষোভ আৰু হতাশাৰ সৃষ্টি হোৱাৰ বাদে জাতিটোৱে ইয়াৰ পৰা একো নাপালে। সেই কাৰণেই ৰাজ্যবাসীয়ে শান্তি বিচাৰে। আলফাৰ এটা অংশই অৰণ্যৰ সংগ্ৰামৰ পৰা ওলাই আহি চৰকাৰৰ লগত শান্তি আলোচনাত বহিছে। ইফালে, সংঘাতৰ পৰিৱেশ ভালেখিনি শাম কটাৰ বাবে সশস্ত্র বাহিনী বিশেষ ক্ষমতা আইনৰ অধীনত 'অশান্ত অঞ্চল'ৰ এলেকা এতিয়া মাত্র উজনিৰ ৩খন জিলা ক্রমে তিনিচুকীয়া, শিৱসাগৰ আৰু চৰাইদেউতহে সীমাবদ্ধ আছে। ফলত ৰাজ্যবাসীৰ মনৰ পৰা শংকা-ভীতিগ্রস্ততাৰ ভাব বহুলাংশে নোহোৱা হৈছে। বজৰংগ, বাইনোৰ দৰে ভয়াৱহ সামৰিক অভিযানবোৰ, আলফা-ছালফাৰ ভাতৃঘাতী সংঘাতৰ বিভীষিকা মানুহে প্রায় পাহৰি পেলাবলৈ ধৰিছে। এনে অৱস্থাত হঠাৎ ম্যানমাৰৰ আলফা (স্বাঃ)ৰ শিবিৰত ড্ৰ'ন আৰু ক্ষেপণাস্ত্ৰৰ আক্ৰমণৰ ঘটনাটো কোনে কিয় কৰিলে, এই ঘটনাই বৰ্তমানৰ শান্তিৰ বাতাৱৰণত কিবা প্রভাৱ পেলাব নেকি সেই প্রশ্ন সাধাৰণ মানুহৰ মনলৈ অহাটো স্বাভাৱিক। ৰাজ্যত বৰ্তমান বিৰাজ কৰি থকা শান্তিপূর্ণ পৰিৱেশৰ সুযোগ লৈ ৰাজ্য চৰকাৰে অনুষ্ঠিত কৰা 'এডভান্টেজ আছাম ২.০'ত অংশগ্ৰহণ কৰা দেশৰ শীর্ষ স্থানীয় ঔদ্যোগিক-ব্যাৱসায়িক গোষ্ঠীবোৰে অসমত সর্বমুঠ ৫,১৮,২০৫ কোটি টকা বিনিয়োগ কৰাৰ প্রতিশ্রুতি দি ৰাজ্য চৰকাৰৰ সৈতে বুজাবুজিৰ চুক্তিত স্বাক্ষৰ কৰিছে।

ইতিমধ্যে জাগীৰোডৰ কাগজ কলৰ স্থানত ২৭ হাজাৰ কোটি টকীয়া ছেমি কণ্ডাক্টৰ উদ্যোগৰ কাম দ্রুত গতিত চলি আছে। বিনিয়োগ কৰিবলৈ আগবাঢ়ি অহা ঔদ্যোগিক-ব্যাৱসায়িক গোষ্ঠীবোৰৰ নিজা স্বার্থ, লাভৰ অংক থাকিব ঠিকে, কিন্তু সমান্তৰালকৈ স্থানীয় যুৱক-যুৱতীৰ বাবেও যে নিযুক্তিৰ এখন বিশাল ক্ষেত্ৰৰ সৃষ্টি হোৱাৰ সম্ভাৱনা থাকিব সেইটো জানো সত্য নহয়? নতুন প্ৰজন্মৰ লাখ লাখ যুৱক-যুৱতীয়ে এনেকুৱা কিছুমান সম্ভাৱনাৰ দুৱাৰ মুকলি হোৱালৈকে আশাৰে বাট চাই আছে। অশান্ত ঠাইত কোনেনো হাজাৰ হাজাৰ কোটি টকা বিনিয়োগ কৰিবলৈ আহিব? গতিকে, শান্তিৰ বাতাৱৰণ ব্যাহত হ'ব পৰা কোনো পৰিবেশ-পৰিস্থিতিৰ যাতে নতুনকৈ সৃষ্টি নহয় তালৈ চৰকাৰৰ লগতে সংশ্লিষ্ট অন্যান্য পক্ষসমূহেও লক্ষ্য ৰখা উচিত।

Share This