সম্ভাৱনাৰ দুৱাৰমুখত

dainik janambhumi February 27, 2025

ডিজিটেল ডেস্ক:  বিশ্বৰ ৭৫খন দেশৰ ৰাষ্ট্ৰদূত আৰু প্ৰতিনিধিৰ উপস্থিতিত গুৱাহাটীৰ খানাপাৰাত অনুষ্ঠিত এডভাণ্টেজ আছাম ২.০-ৰ প্ৰথম দিনাই সম্পন্ন হোৱা ১.৮৯ লাখৰো অধিক কোটি টকাৰ বুজাবুজিৰ চুক্তিয়ে অসমৰ সম্ভাৱনাৰ ক্ষেত্ৰখনত একপ্ৰকাৰৰ চমকেই সৃষ্টি কৰিলে। প্ৰথম দিনা ১৫টা খণ্ডৰ কোম্পানীৰ সৈতে ১৬৪খনৰো অধিক বুজাবুজিৰ চুক্তি সম্পাদন কৰা বুলি মুখ্যমন্ত্রী ড° হিমন্ত বিশ্ব শর্মাই প্রকাশ কৰিছে। এই ১.৮৯ লাখ কোটি টকাৰ চুক্তিৰ ভিতৰত ব্যক্তিগত কোম্পানীৰ লগতে ৰাজহুৱা খণ্ডৰ উদ্যোগো আছে। সংবাদ মাধ্যমত প্রকাশিত তথ্য মতে, প্রথম দিনা টাটা পাৱাৰৰ সৈতে ৩০ হাজাৰ কোটি টকাৰ, জে এছ ডব্লিউ গ্ৰুপৰ সৈতে ৭ হাজাৰ কোটি টকাৰ, গ্রীনক' এনার্জিজ প্রাইভেট লিমিটেডৰ সৈতে ৫,৮৫০ কোটি টকাৰ চুক্তিত স্বাক্ষৰ হৈছে। একেদৰে এন বি ইনভেষ্টমেণ্ট ছার্ভিচেছ লিমিটেডৰ সৈতে ৩ হাজাৰ কোটি টকা, এছাৰ গ্ৰুপৰ সৈতে ২,১০০ কোটি টকা আৰু আদানি টোটেল গেছ লিমিটেডৰ সৈতে ৫ হাজাৰ কোটি টকাৰ বুজাবুজিৰ চুক্তিত স্বাক্ষৰ কৰা হৈছে। 

আদানি গ্রুপে অৱশ্যে মুঠ ৫০ হাজাৰ কোটি টকাৰ বিনিয়োগৰ প্রতিশ্রুতি দিছে। গুৰুত্বপূৰ্ণ বুজাবুজি চুক্তি স্বাক্ষৰ কৰা চৰকাৰী উদ্যোগসমূহৰ ভিতৰত আছে অইল আৰু নুমলীগড় শোধনাগাৰ। অইলে ২৩,৩০০ কোটি টকাৰ লগতে নুমলীগড় শোধনাগাৰে ১০,৭১১ কোটি টকাৰ বিনিয়োগৰ প্রতিশ্রুতি দিছে। আনহাতে, বেদান্তা গ্রুপেও দিছে ৫০ হাজাৰ কোটি টকাৰ বিনিয়োগৰ প্ৰতিশ্ৰুতি। প্রধানমন্ত্রী নৰেন্দ্ৰ মোদীয়ে শুভাৰম্ভ কৰা সন্মিলনৰ উদ্বোধনী অনুষ্ঠানত ভাষণ দি বেদান্তা গ্ৰুপৰ অধ্যক্ষ অনিল আগৰৱালাই কয় যে আগন্তুক ৩-৪ বছৰত অসম-ত্ৰিপুৰাৰ তেল আৰু গেছ খণ্ডত তেওঁলোকে ৫০ হাজাৰ কোটি টকা বিনিয়োগ কৰিব আৰু এক লাখ যুৱক-যুৱতীৰ বাবে কর্মসংস্থাপন সৃষ্টি কৰিব। ইতিমধ্যে গ্রুপ ফার্ম কেয়ার্ন অইল এণ্ড গেছে উত্তৰ-পূবৰ দুখন ৰাজ্যত প্রায় ২,৫০০ কোটি টকা বিনিয়োগ কৰিছে। অসমত প্ৰচুৰ প্ৰাকৃতিক সম্পদ থকাৰ কথা উল্লেখ কৰি তেওঁ কয় যে এই প্রাকৃতিক ঐশ্বৰ্যৰ দ্বাৰা অসম বিশ্বৰ মেগা মেচিন হোৱাৰ সম্ভাৱনা আছে। আনহাতে, প্রতিদিনে ১,০০,০০০ বেৰেল তেল আৰু গেছ উৎপাদন কৰি সমগ্ৰ অঞ্চলটোক প্রধান হাইড্ৰ'কাৰ্বন হাবত পৰিণত কৰিব বুলিও তেওঁ ব্যক্ত কৰে। ইফালে, মঙলবাৰে এডভাণ্টেজ আছাম ২.০ শুভাৰম্ভ কৰি প্রধানমন্ত্রী মোদীয়েও অসমৰ সম্ভাৱনাৰ কথাকে ব্যক্ত কৰে। তেওঁ কয় যে ২০১৮ চনত হৈ যোৱা এডভাণ্টেজ আছাম ১.০ত অসমৰ অৰ্থনীতি ৩ লাখ কোটি টকাৰ আছিল। কিন্তু এইবাৰ ই ৬ লাখ কোটি টকালৈ বৃদ্ধি পাইছে। সি যি নহওক, এডভাণ্টেজ আছাম সন্মিলনৰ দ্বাৰা সামগ্রিক উন্নয়নৰ বাবে অসমত বিনিয়োগৰ আহ্বান জনোৱা হৈছিল আৰু দেশী-বিদেশী বিনিয়োগকাৰীৰ পৰা অভূতপূর্ব সঁহাৰি লাভ কৰা হৈছে। এতিয়া এই সঁহাৰি-প্রতিশ্রুতি-চুক্তি প্ৰকৃতাৰ্থতে সাৰ্থকত পৰিণত তেতিয়াহে হ'ব, যেতিয়া ইয়াৰ সঠিক কাৰ্যকৰীকৰণ দেখা যাব। ২০১৮ চনৰ এডভাণ্টেজ আছাম ১.০ত ৰাজ্যখনে মুঠ ৬৮৮৯২.৩৯ কোটি টকাৰ বিনিয়োগ লাভ কৰিছিল। ইয়াৰ ভিতৰত নতুন প্রকল্পত ৯৭০৮.৭৮ কোটি টকা বিনিয়োগ হৈছিল, য'ত ব্যক্তিগত খণ্ডৰ ৭৪৫৪.৯৯ কোটি আৰু চৰকাৰী খণ্ডৰ ২২৫৩.৭৯ কোটি টকাৰ বিনিয়োগ আছিল। এই বিনিয়োগৰ ফল কি হ'ল বা অসমবাসীয়ে কি পালে বুলি মাজে-সময়ে প্রশ্ন উত্থাপন নোহোৱাকৈ থকা নাই। 

কিন্তু ইয়াৰ উত্তৰ আক্ষৰিকভাৱে হিচাপ কৰি দিব পৰা নগ'লেও এই কথা ঠিক যে নুমলীগড় শোধনাগাৰৰ উৎপাদন ক্ষমতা ৩ৰ পৰা ৯ মিলিয়ন মেট্রিকটনলৈ বৃদ্ধিৰ আঁৰত আছিল এডভাণ্টেজ আছাম। সেইদৰে ৰাজ্যত ঠায়ে ঠায়ে আৰম্ভ হোৱা কেন্সাৰ কেয়াৰ হস্পিটেল, ডিগবৈৰ পৰা কুছিজানলৈ গেছ পাইপলাইন, নাহৰকটীয়া-বাৰাউনী তেল পাইপলাইনৰ উন্নীতকৰণ আদিও আছিল এনে বিনিয়োগৰে ফল। এইবোৰৰ উপকাৰ ইতিমধ্যেই জনতাই ভোগ কৰিবলৈ পাইছে। সি যি নহওক, এইবাৰৰ এডভান্টেজ আছাম ২.০ সন্মিলনৰ পৰা আন নহ'লেও কেইটামান বিশেষ দিশত লাভৱান হোৱাৰ কথা ধাৰণা কৰিব পাৰি। সেইকেইটা হৈছে- এইবাৰ বৈদেশিক পৰিক্ৰমাৰ ক্ষেত্ৰত এক নতুন দিগন্তৰ সূচনা হ'ল। একেটা ছাতিৰ তলত সমৱেত হ'লহি ৬১খন দেশৰ ৰাষ্ট্রদূত আৰু প্ৰতিনিধি। যিহেতু অসমৰ সম্পদ আৰু সম্ভাৱনাক বিশ্ববাসীৰ সন্মুখত তুলি ধৰাটোও আছিল এই সন্মিলনৰ অন্যতম উদ্দেশ্য। এইক্ষেত্রত ইয়াকো এক সাফল্য হিচাপেই অভিহিত কৰিব পাৰি। সেইদৰে অসম যে এতিয়া পূৰ্বৰ ভয়াৱহ পৰিস্থিতিৰ পৰা মুক্ত সেই কথাকো এই সন্মিলনে প্ৰমাণ কৰি দিলে। যাৰ বাবে বিদেশী বিনিয়োগকাৰীয়ে মুক্তভাৱে অসমত বিনিয়োগ কৰিবলৈ আগবাঢ়ি আহিবলৈ উৎসাহিত হ'ল। পূর্বতে উগ্রপন্থীৰ অস্ত্ৰৰ ঝনঝননি, দল-সংগঠনৰ আন্দোলন-বন্ধ আদিৰ পৰিৱেশত অসমত বিনিয়োগৰ বাবে বিদেশী বিনিয়োগকাৰীৰ কথা বাদেই, দেশীয় সংস্থা-কোম্পানীসমূহেই আগবাঢ়ি আহিবলৈ কুণ্ঠাবোধ কৰিছিল। কিন্তু এই সন্মিলনৰ দ্বাৰা অসমৰ তেল আৰু চাহৰ পৰম্পৰাগত ক্ষেত্ৰৰ উপৰি ছেমিকণ্ডাক্টৰ, ইলেক্‌ট্রনিক্স, প্ৰতিৰক্ষা, হাইড্র'কার্বন আদিৰ দৰে নতুন নতুন ক্ষেত্ৰত বিনিয়োগৰ অপাৰ সম্ভাৱনাৰ দুৱাৰ মুকলি হ'ল। তদুপৰি সন্মিলনৰ আগদিনা অনুষ্ঠিত 'ঝুমইৰ বিনন্দিনী' অনুষ্ঠানৰ দ্বাৰাও এক বার্তা বিশ্বব্যাপী গ'ল যে অসম কেৱল সম্পদৰেই নহয়, সাংস্কৃতিকভাৱেও চহকী। মুক্ত আৰু সুস্থিৰ পৰিৱেশত যে অসমত সাংস্কৃতিক ঐক্যয়ো ঠন ধৰি উঠিছে সেই বার্তাও বিশ্বৰ প্ৰতিনিধিয়ে পালে। আনহাতে, এই সন্মিলনতে কেন্দ্ৰীয় চৰকাৰৰ তৰফৰ পৰাও অসমে বিশেষ গুৰুত্ব পালে। বিশ্বৰ প্ৰতিনিধিৰ সন্মুখতে কেন্দ্ৰীয় টেলিকম মন্ত্রী জ্যোতিৰাদিত্য সিন্ধিয়াই ঘোষণা কৰিলে যে এছিয়াৰ ভিতৰত সৰ্ববৃহৎ চাৰিটা হাইপাৰস্কেল ডাটা চেন্টাৰ লাভ কৰিব অসমে। ইতিমধ্যেই হাতে-কামে ইয়াৰ কাৰ্যকৰীকৰণ আগবাঢ়িছে। সেইদৰে কেন্দ্রীয় ৰে'ল মন্ত্ৰী অশ্বিনী কুমাৰ বৈষ্ণৱেও অমৃত ভাৰত ৰে'ল, ৰে'ল কাৰখানা, কার্গো টার্মিনেল, এন ই আই এল আই টি বিশ্ববিদ্যালয় আদি অসমলৈ মেতমৰা উপহাৰ ঘোষণা কৰিছে। আনহাতে, এই সন্মিলনতে ৰাজ্যৰ ৪ হাজাৰ 'বনগাঁও'ত (Forest Village) টেলিকম সেৱা নথকাৰ কথা ৰাজহুৱাকৈ কেন্দ্ৰীয় চৰকাৰক ব্যক্ত কৰাৰ সুযোগ লাভ কৰে অসমৰ মুখ্যমন্ত্ৰী ড° শৰ্মাই। তেওঁ কেন্দ্রক নতুন আইন আনি এই সমস্যা দূৰ কৰিবলৈ আহ্বান জনায়। আনহাতে, বংগোপসাগৰৰ পৰা ব্ৰহ্মপুত্ৰৰ মাজেৰে অপ্টিকেল ফাইবাৰ অনাৰ সম্ভাৱনীয়তা অধ্যয়ন কৰিবলৈও মুখ্যমন্ত্রীয়ে যি আহ্বান জনালে, সেই আহ্বানেও অন্য এক দিশ মুকলি কৰিলে। মুঠতে এডভান্টেজ আছাম ২.০ৰ চাৰিওদিশে কেৱল সম্ভাৱনাৰেই সম্ভাৱনা। ৰাজ্য চৰকাৰে কেবিনেট বৈঠকত বাঞ্ছা কৰাতকৈ সন্মিলনৰ সামৰণিৰ দিনলৈ এনে সম্ভাৱনা অধিক হোৱাৰে সম্ভাৱনা আছে। এনেক্ষেত্ৰত ৰাজ্যবাসী নিশ্চয়কৈ অধিক আশাবাদী। ৰাজ্যবাসীয়ে আশা কৰে কেৱল নির্দিষ্ট কিছুমান ক্ষেত্রতেই নহয়, কৃষিকে ধৰি আন আন ক্ষেত্ৰসমূহতো বিনিয়োগকাৰীয়ে দৃষ্টি দিব। তদুপৰি অসমত বিনিয়োগ কৰি কোম্পানী তথা বিনিয়োগকাৰীসকলে সৰ্বসাধাৰণৰ ওপৰত হকে-বিহকে হেঁচা দি শোষণ-লুণ্ঠনেৰে কেৱল লাভ অৰ্জনৰ কথাকে যাতে চিন্তা নকৰে, সেইক্ষেত্ৰতো  সচেষ্ট হ'ব।

Share This