মনীষীক স্মৰণ

dainik janambhumi June 20, 2025

ডিজিটেল ডেস্কঃ অসমীয়া জাতিয়ে আজি আকৌ এবাৰ বিষ্ণুপ্ৰসাদ ৰাভাক সোঁৱৰণ কৰিব। ৰজাঘৰ-প্ৰজাঘৰৰ মঞ্চ ৰাভাৰ আদৰ্শৰ স্মৰণেৰে মুখৰ হ'ব। নতুন প্ৰজন্মৰ কণ্ঠই কণ্ঠই নিগৰিব ৰাভাৰ গীত-কবিতাৰ ছন্দোময় ধ্বনি। যোৱাটো শতিকাৰ সংঘাতপূর্ণ সময়বোৰত সৃষ্টি, কৰ্ম আৰু সংগ্রামেৰে যিসকল ব্যক্তিয়ে অসমৰ জাতীয় জীৱনক নৱৰূপ দিয়াৰ চেষ্টা কৰিছিল, যিসকলৰ চিন্তা-কর্ম আৰু আদর্শই আধুনিক অসমীয়া সমাজ জীৱনৰ ভেটি টনকিয়াল কৰিছিল, সেইসকলৰ মাজত ধ্ৰুৱতৰাৰ দৰে জিলিকি থকা জ্যোতিপ্ৰসাদ আগৰৱালা আৰু বিষ্ণুপ্ৰসাদ ৰাভাক বছৰি বছৰি বিশেষভাৱে স্মৰণ কৰাৰ যি ধাৰা যোৱা চাৰিটা দশকত অব্যাহত আছে সেয়া আদৰণীয় এইবাবেই যে এওঁলোকৰ স্মৰণৰ মাধ্যমেৰে কুৰি শতিকাৰ সংঘাতপূর্ণ সময়ছোৱাক নতুন প্ৰজন্মই জনাৰ, বুজাৰ আৰু হৃদয়ংগম কৰাৰ সুবিধা পায়।

পৰিৱৰ্তিত সময়ৰ পৰিৱৰ্তিত ৰাজনীতিয়ে অসমৰ সামাজিক পটভূমি সলনি কৰি পেলোৱাৰ ফলত কিছুমান চিন্তা, কিছুমান আদর্শ অবাস্তৰ যেন গণ্য হ'বলৈ ধৰা পৰিলক্ষিত হৈছে। মুক্ত অর্থনীতিয়ে সৃষ্টি কৰা চমকনিৰ লগতে পৰিৱৰ্তিত ৰাজনীতিয়েও ৰচনা কৰা এক সন্মোহনৰ পৰিৱেশে বহু কথাই পাহৰাই পেলোৱাৰ উপক্ৰম ঘটাইছে। আমাৰ চৌদিশৰ জন-গাঁথনি বৈচিত্র্যময় ৰূপটোক অনুধাৱন কৰাৰ, ঐতিহ্য আৰু পৰম্পৰাৰ আধাৰত বিকাশ ঘটা সমাজখনৰ প্ৰাণটোক উপলব্ধি কৰাৰ ধ্যান-ধাৰণা সলনি হ'বলৈ ধৰিছে। এনে সময়ত জ্যোতিপ্ৰসাদ আগৰৱালা বা বিষ্ণুপ্ৰসাদ ৰাভাৰ জীৱনাদর্শক স্মৰণৰ অনুষ্ঠানবোৰে আমাৰ অতীতক উভতি চাবলৈ সুযোগ দিয়ে, যি অতীতত নিহিত হৈ আছে মূল্যবোধক গুৰুত্ব দি, ত্যাগৰ ধাৰণাক হৃদয়ত স্থাপন কৰি, সমাজৰ হকে নিজক উৎসর্গা কৰাৰ ব্ৰত লৈ, দায়বদ্ধভাৱে কাম কৰাৰ এক সামাজিক পৰিৱেশ। 

ৰাজনীতিক প্রাচুর্য, উপভোগৰ আহিলা হিচাপে ব্যৱহাৰ কৰাৰ চিন্তা-চেতনা সেই অতীতত নিহিত হৈ থকা নাছিল। ৰাজনৈতিক চিন্তাৰ বৈচিত্র্য থাকিলেও সেই বৈচিত্র্যক বিদ্বেষলৈ ৰূপান্তৰ কৰি মুনাফা অৰ্জনৰ প্ৰৱণতা সেই অতীতত নাছিল। প্রাচুর্য বা ভোগৰ পয়োভৰ নাথাকিলেও সেই ৰাজনীতিয়ে, সেই সমাজনীতিয়ে জাগ্রত কৰিব পাৰিছিল আশাবাদ। জ্যোতিপ্ৰসাদ আগৰৱালা আৰু বিষ্ণুপ্ৰসাদ ৰাভাৰ জীৱন দুটা হৈছে সেই পৰিৱেশৰ পৰা উদ্ভৱ হোৱা দুটা চিৰ উজ্জ্বল নক্ষত্র সদৃশ ব্যক্তিত্ব। দুয়োজনেই দুটা অতি সম্পদশালী, প্রতিপত্তিশীল পৰিয়ালৰ সন্তান হৈও ভোগৰ পথ পৰিহাৰ কৰি, সুখ-স্বাচ্ছন্দ্য বিসর্জন দি জঁপিয়াই পৰিছিল জাতিৰ মুক্তিৰ সংগ্ৰামত, শোষিত-নিষ্পেষিত জনতাৰ অধিকাৰ প্ৰতিষ্ঠাৰ সংগ্ৰামত। 

সংগ্রামী জীৱনৰ মাজে মাজে দুয়োজনেই জাতীয় কৃষ্টি-সংস্কৃতি মন্থন কৰি তাৰ আধাৰত কৰা যুগমীয়া সৃষ্টিৰে নিৰ্মাণ কৰিছিল আধুনিক জাতীয় সংস্কৃতিৰ বৰভেটি। জ্যোতিপ্রসাদে জীৱনৰ ৰোগাক্রান্ত শেষ বয়সতো গণ নাট্য সংঘৰ জৰিয়তে শোষিত-নিষ্পেষিতজনৰ মুক্তিৰ সংগ্ৰামৰ ধ্বজা উৰুওৱাৰ দৰে বিষ্ণু ৰাভায়ো ভুৱা স্বাধীনতাত ভোেল নগৈ কৃষকৰ মুক্তিৰ বাবে গ্রহণ কৰিছিল বিপ্লবী কমিউনিষ্টৰ সশস্ত্ৰ সংগ্ৰামৰ কণ্টকাকীর্ণ পথ। ইয়াৰ বাবে জীৱনৰ সকলো সম্পদ বিলাই দিছিল জনতাৰ মাজত। পুলিচে পঘাৰে বান্ধি তেজপুৰৰ ৰাজপথেৰে চোঁচৰাই লৈ গৈছিল, পাৰিবাৰিক জীৱন আছিল অবর্ণনীয় দুর্ভোগৰ, তথাপি বিষ্ণু ৰাভাই অবিচলিত হৈ সমগ্ৰ জীৱন পাত কৰিছিল সৰ্বহাৰাৰ অধিকাৰ প্ৰতিষ্ঠাৰ সংগ্ৰামৰ আদৰ্শ হৃদয়ত লৈয়ে। জ্যোতিপ্রসাদ আৰু বিষ্ণু ৰাভাক স্মৰণৰ অনুষ্ঠানে সেই অধ্যায়বোৰকে ৰোমন্থনৰ সুযোগ জাতিক দিয়ে।

 কুৰি শতিকাৰ মধ্য ভাগত, দেশে স্বাধীনতা লাভ কৰাৰ পাছত 'নাঙল যাৰ মাটি তাৰ' শ্ল'গানেৰে যিটো কমিউনিষ্ট বিপ্লৱে অসমৰ গ্ৰাম্য সমাজ জীৱনটোকো ব্যাপক ৰূপত প্ৰভাৱিত কৰিছিল, সেই কাহিনীবোৰৰ আজিৰ তাৰিখত মূল্য নাই; কিন্তু সেই সংগ্রামে অজস্ৰজনৰ হৃদয়ত কেনেকৈ বৈপ্লৱিক চেতনা জাগ্ৰত কৰিছিল আৰু তাৰ আধাৰত কেনেকৈ আমাৰ জাতীয় জীৱনেও অন্যায়, অসাম্যৰ বিৰুদ্ধে যুদ্ধ কৰাৰ এক অকল্পনীয় চেতনা লাভ কৰিছিল সেই কথাবোৰ এনেকুৱা দিৱসৰ জৰিয়তেই নতুন প্রজন্মই জনাৰ সুযোগ পায়। দুর্নীতি সর্বস্ব চিন্তা-কর্ম, ক্ষমতা সৰ্বস্ব ৰাজনীতিৰে বেয়াকৈ প্ৰদূষিত হোৱা আজিৰ সমাজ ব্যৱস্থাত এক ৰূপান্তৰৰ চেতনাৰ প্ৰয়োজনীয়তা বহুতেই উপলব্ধি কৰে। সেই ৰূপান্তৰৰ বজা নিশ্চিতভাৱে নতুন প্রজন্ময়েই উৰুৱাব লাগিব। নতুন প্রজন্মক সেই প্ৰেৰণা দিব জ্যোতিপ্রসাদ-বিষ্ণু ৰাভাৰ দৰে ৰূপান্তৰৰ জয়গান গোৱা মনীষীসকলৰ সংগ্রামী জীৱনৰ আদৰ্শই। আজিৰ সন্ধিক্ষণত সেইসকলক স্মৰণৰ ব্যাপক আয়োজন কৰাটো সেইবাবেই অতি প্রয়োজন।

Share This