পথ দুর্ঘটনা-অংগদান

dainik janambhumi August 02, 2025

ডিজিটেল ডেস্ক : শেহতীয়াভাৱে অসমৰ এগৰাকী অভিনেত্ৰীয়ে সংঘটিত কৰা এটা পথ দুর্ঘটনাক লৈ ৰাজ্য তোলপাৰ লাগিছে। দুর্ঘটনা সংঘটিত কৰা অভিনেত্ৰীগৰাকী হত্যাৰ গোচৰত অভিযুক্ত হ'ব বুলি খোদ মুখ্যমন্ত্রীয়ে ইতিমধ্যে সদৰী কৰিছে। অৱশ্যে এইধৰণৰ ঘটনা এয়াই প্রথম নহয়। ইয়াৰ পূৰ্বেও অনেক ঘটনা সংঘটিত হৈছে। দুদিনমান ইয়াৰ চৰ্চাই ছ'চিয়েল মিডিয়া তোলপাৰ লগায় যদিও পাছলৈ ভুক্তভোগী পৰিয়ালে ন্যায় পালে নে নাই সেই সম্পর্কে কোনো অৱগত নহয়। সাম্প্রতিক সময়ত পথ দুর্ঘটনা এক ভয়ংকৰ সমস্যাত পৰিণত হৈছে। অসমতেই নহয়, সমগ্র বিশ্বতে প্রতি মুহূর্তত কিমান দুর্ঘটনা সংঘটিত হৈছে তাৰ লেখ-জোখ নাই। কিমান চিৰদিনলৈ ঘূণীয়া হৈছে, কিমানৰ পৰিয়ালৰ মূল উপাৰ্জনকাৰীজন হঠাৎ নোহোৱা হৈ গৈছে তাৰ তথ্যই প্ৰতিগৰাকী সচেতন ব্যক্তিক চিন্তিত কৰি তোলে। চৰকাৰী তথ্য অনুসৰি, অসমত ২০১৮ চনত পথ দুর্ঘটনাত মৃত্যু হোৱা লোকৰ সংখ্যা ২৯৬৬জন, ২০১৯ চনত এই সংখ্যা হয়গৈ ৩২০৮জন, ২০২০ চনত ২৬২৯জন, ২০২১ চনত ৩০৩৬জন, ২০২২ চনত পথ দুর্ঘটনাত মৃত্যু হোৱা লোকৰ সংখ্যা ২৯৯৪জন। পথ দুর্ঘটনাত সর্বাধিক মৃত্যু হোৱা লোকৰ তালিকাত প্রথম স্থানত আছে উত্তৰ প্ৰদেশ। ২০১৮ চনত ৰাজ্যখনত পথ দুর্ঘটনাত মৃত্যু হোৱা লোকৰ সংখ্যা ২২,২৫৬জন, ২০১৯ চনত ৰাজ্যখনত পথ দুৰ্ঘটনাত মৃত্যু হোৱা লোকৰ সংখ্যা ২২,৬৫৫জন, ২০২০ চনত এই সংখ্যা হয়গৈ ১৯১৪৯জন, ২০২১ চনত ২১২২৭জন, ২০২২ চনত ২২৫৯৫জন। পথ দুর্ঘটনাত সর্বাধিক মৃত্যু হোৱা শীর্ষ দহখন ৰাজ্য হৈছে ক্রমে-উত্তৰ প্রদেশ, তামিলনাডু, মহাৰাষ্ট্ৰ, মধ্য প্রদেশ, কর্ণাটক, ৰাজস্থান, বিহাৰ, অন্ধ্র প্রদেশ, গুজৰাট আৰু তেলেংগানা। 

২০১৮ চনত দেশত সর্বমুঠ ৪,৭০,৪০৩টা পথ দুর্ঘটনা সংঘটিত হয় আৰু মৃত্যু হোৱা লোকৰ সংখ্যা ১,৫৭,৫৯৩জন। ২০১৯ চনত দেশত সর্বমুঠ ৪,৫৬,৯৫৯টা পথ দুর্ঘটনা সংঘটিত হয় আৰু ১,৫৮,৯৮৪জন লোকৰ মৃত্যু হয়। ২০২০ চনত সর্বমুঠ ৩,৭২,১৮১টা পথ দুর্ঘটনা সংঘটিত হয় আৰু ১,৩৮,৩৮৩জন লোকে মৃত্যুমুখত পৰে। ২০২১ চনত ৪,১২,৪৩২টা পথ দুর্ঘটনা সংঘটিত হয় আৰু মৃত্যু হয় ১,৫৩,৯৭২জন লোক। ২০২২ চনত দেশত সর্বমুঠ ৪,৬১,৩১২টাপথ দুর্ঘটনা সংঘটিত হয় আৰু মৃত্যু হোৱা লোকৰ সংখ্যা হৈছে ১,৬৮,৪৯১জন।
বিশ্বৰ ভিতৰতে পথ দুৰ্ঘটনাত সর্বাধিক মৃত্যু হোৱা দেশখনেই হৈছে ভাৰত। প্ৰতি বছৰে ভাৰতত গড়ে ডেৰ লাখ লোকৰ অকাল মৃত্যু ঘটে পথ দুর্ঘটনাত। বিশ্ব স্বাস্থ্য সংস্থাৰ ২০১৮ চনৰ গ্ল'বেল ৰিপ'ৰ্ট অনুসৰি সমগ্ৰ বিশ্বৰ সকলো দুর্ঘটনাজনিত মৃত্যুৰ ১১ শতাংশই ভাৰতৰ। এইসকলৰ ৬৭ শতাংশই ১৮-৪৫ বছৰ বয়সৰ ভিতৰৰ। এই দুর্ঘটনাত প্রাণ হেৰুওৱা লোকজন চিৰদিনৰ বাবে হেৰাই যায় যদিও এনে বহু লোকৰ শৰীৰৰ অংগ আন লোকৰ শৰীৰত সংৰোপণৰ জৰিয়তে এজন অসুস্থ লোকে নৱজীৱন লাভ কৰাটো উজু হৈ পৰে। অৰ্থাৎ প্ৰতি বছৰে দুৰ্ঘটনাত মৃত্যু হোৱা ডেৰ লাখ লোকৰ মাজৰ আধাসংখ্যক লোকৰো যদিহে অংগদান কৰা হয় তেতিয়াহ'লে অকাল মৃত্যুৰ পৰা বাচিব লাখ লাখ লোক। অৱশ্যে 'ব্রেইন ডেড' হোৱা লোক এজনৰহে বৃক্ক, হৃদপিণ্ড, হাঁওফাঁও, যকৃৎ আদি অংগ আনৰ দেহত সংৰোপণ কৰিব পাৰি। দুমাহমান পূর্বে ট্রাক দুর্ঘটনাত পতিত কলকাতাৰ এগৰাকী ২৫ বছৰীয়া যুৱকৰ 'ব্রেইন ডেড' বুলি ঘোষণা হোৱাৰ পাছত তেওঁৰ বৃক্ক, হাঁওফাঁও, যকৃৎ আন চাৰিগৰাকী লোকৰ শৰীৰত সংৰোপণ কৰি তেওঁলোকক নৱজীৱন দিয়া হয়। 

আনহাতে তেওঁৰ চকুযুৰিও আন দুজন লোকক দান কৰা হয়। এনে উদাহৰণ বহু আছে যদিও ভাৰতত আজিৰ তাৰিখতো অংগদানৰ বাবে যিধৰণে ৰাইজ আগবাঢ়ি আহিব লাগিছিল সেয়া হৈ উঠা নাই। যাৰ ফলস্বৰূপে লাখ লাখ জটিল ৰোগত আক্রান্ত ৰোগীয়ে একমাত্র দাতাৰ অভাৱৰ বাবেই অকাল মৃত্যুক সাবটিব লগা হয়। ইয়াৰ বিপৰীতে মার্কিন যুক্তৰাষ্ট্ৰ, জার্মানি, স্পেইন, ক্র'বেছিয়া, নেদাৰলেণ্ড আদি দেশৰ ৩০ৰ পৰা ৪০ শতাংশ লোক (প্রতি নিযুত লোকৰ মাজৰ) অংগদানৰ বাবে আগবাঢ়ি আহে। আমাৰ দেশৰ ভিতৰতে তামিলনাডুত সর্বাধিক মৰণোত্তৰ দেহদান কৰা হয়। একমাত্ৰ সজাগতাৰ অভাৱ আৰু চিকিৎসা আন্তঃগাঁথনিৰ অভাৱৰ বাবেই আমাৰ ৰাজ্যত দেহদানৰ বিষয়টোরে আজিও গুৰুত্ব লাভ কৰা নাই। যাৰ পৰিপ্ৰেক্ষিতত প্রয়োজনীয় অংগৰ অভাৱত জীৱন নাট সামৰে বহু ৰোগীয়ে। দুর্ঘটনাত মৃত্যু হোৱা লোকৰ কিছু সংখ্যকৰো অংগ যদিহে জটিল ৰোগত আক্রান্ত লোকৰ শৰীৰত সংৰোপণ কৰাটো সম্ভৱপৰ হৈ উঠে তেতিয়াহ'লে সেইসকল মৃত ব্যক্তি আন বহু লোকৰ প্ৰাণদাতা হোৱাৰ লগতে তেওঁলোকেও আমাৰ মাজত অন্য এক ধৰণে জীয়াই থাকি এক বিৰল দৃষ্টান্ত দাঙি ধৰিব পাৰে। অংগদানৰ দৰে এক গুৰুত্বপূৰ্ণ বিষয়ক লৈ জনসাধাৰণৰ মাজত সজাগতা সৃষ্টি আৰু এইক্ষেত্ৰত চৰকাৰৰ সদিচ্ছা যথেষ্ট গুৰুত্বপূর্ণ।

Share This