অসুস্থ জাতি

dainik janambhumi March 25, 2025

ডিজিটেল ডেস্ক : এখন সুস্থ বিশ্ব গঢ় লৈ উঠে যেতিয়া ৰাষ্ট্ৰসমূহ সুস্থ হৈ থাকে আৰু সুস্থ ৰাষ্ট্ৰ এখন তেতিয়াহে গঢ় লৈ উঠে যেতিয়া পৰিয়ালবিলাক সুস্থ হয়। বিজেপি চৰকাৰ দেশৰ ক্ষমতালৈ অহাৰ পাছত এটা কথাৰ চৰ্চা খুব বেছিকৈ হোৱা দেখা গৈছে যে অমুক চনৰ ভিতৰত ভাৰত বিশ্বৰ শ্ৰেষ্ঠ অৰ্থনীতিৰ দেশ হৈ উঠিব, ভাৰত বিশ্বগুৰু হ'ব ইত্যাদি, ইত্যাদি। একোটা সুৰতে অসমতো চৰকাৰে দাবী কৰি আহিছে যে অহা কিছু বছৰৰ ভিতৰত অসম দেশৰ পাঁচখন শ্রেষ্ঠ ৰাজ্যৰ ভিতৰত এখন হ'ব। কিন্তু কোনেও এই দাবী কৰা নাই যে অমুক বৰ্ষৰ ভিতৰত ভাৰত বিশ্বৰ আটাইতকৈ সুখী আৰু সুস্থ ৰাষ্ট্ৰ হৈ উঠিব। অমুক বছৰৰ ভিতৰত অসম দেশৰ ভিতৰতে সুখী ৰাজ্যত পৰিণত হ'ব! 

ধনী হ'লেই সুখী নহয়, কাৰণ সুখী হ'বলৈ হ'লে জীৱন-যাপনৰ সুস্থ পৰিৱেশো লাগিব। বিশ্বৰ বৃহৎ অৰ্থনীতিৰ দেশৰ তালিকাত ভাৰতে পঞ্চম স্থানলৈ আগুৱাবলৈ সক্ষম হৈছে, অহা দুবছৰমানৰ ভিতৰত আমাৰ দেশখন অৰ্থনীতিৰ ক্ষেত্ৰত তৃতীয় স্থানলৈও আগুৱাব, কিন্তু সুখী দেশৰ তালিকাত ভাৰতৰ স্থান ১৪৩খন দেশৰ ভিতৰত ১১৮ নম্বৰত। কাৰণ সুখী ৰাষ্ট্ৰ নিৰ্বাচনৰ ক্ষেত্ৰত জনমূৰী আয়ৰ লগতে সামাজিক পৰিৱেশ, সুস্থ জীৱনবোধ, মুক্ত জীৱন-যাপনৰ সুবিধা, উদাৰতা, দুর্নীতিৰ পর্যায় আদি বিষয়বিলাকৰ ওপৰত গুৰুত্ব প্ৰদান কৰা হয়। ইতিমধ্যে বিভিন্ন মাধ্যমত প্রকাশ হৈছেই যে বিশ্বৰ আটাইতকৈ সুখী দেশ হৈছে ফিনলেও। তাৰ পাছতে ডেনমাৰ্কৰ স্থান। এই অৰ্হতাবিলাকৰ ক্ষেত্ৰত অৰত বহুত পিছ পৰি আছে। তেনেকৈ আমাৰ দেশৰ ভিতৰত আটাইতকৈ সুখী ৰাজ্য হ'ল মিজোৰাম। সুখী ৰাজ্য সন্দৰ্ভত মেনেজমেন্ট ডেভেল'পমেন্ট ইনষ্টিটিউট অব্ গুৰুগ্ৰামৰ অধ্যাপক ৰাজেশ কে পিল্লানীয়ে চলোৱা এক সমীক্ষাত মিজোৰামে শীৰ্ষত স্থান লাভ কৰিবলৈ সক্ষম হৈছে। এইক্ষেত্রত অসমৰ স্থান শেষৰ ফালেহে আছে। ২০২০ বর্ষত এই সমীক্ষাটো চলোৱা হৈছিল। ইয়াত দেখা গৈছে যে মিজোৰামত সাক্ষৰতাৰ হাৰ এশ শতাংশ। তাত অতি কম বয়সৰ পৰাই ল'ৰা-ছোৱালীবিলাকে স্বাৱলম্বী হ'বলৈ চেষ্টা কৰে, আনৰ ওপৰত আর্থিক বোজা জাপি দিবলৈ ইচ্ছা নকৰে। সামাজিক সম্পর্ক ভাল, ভেদাভেদ নাই। ল'ৰা-ছোৱালীৰ মাজত মৰ্যাদাৰ পাৰ্থক্য নাই আৰু শিক্ষানুষ্ঠানসমূহত শিক্ষক-শিক্ষার্থীৰ মাজত বন্ধুত্বপূৰ্ণ পৰিৱেশ। এনেবিলাক কাৰকৰ বিচাৰৰ পৰাই মিজোৰাম সবাতোকৈ সুখী ৰাজ্য ৰূপে বাছনিত উঠিছে। 

এমুঠিমান মানুহক দেশৰ গৰিষ্ঠ অংশৰ সম্পদ কুক্ষিগত কৰিবলৈ এৰি দি ধনৱান দেশৰ শীৰ্ষত আৰোহণৰ প্ৰতিযোগিতাত নমাৰ বাস্তৱ মূল্য সাধাৰণ নাগৰিকৰ বাবে কিমান, সেয়া বুজাসকলে বুজি পায়। আচলতে মানুহক সুখী কৰি ৰাখি সমৃদ্ধিৰ পথেৰে আগবঢ়াই নিবলৈ হ'লে এটা সুস্থ সামাজিক পৰিৱেশ গঢ়িব পৰাটো প্রাথমিক চর্ত। কেবল কিছুমান 'হিতাধিকাৰীমূলক' আঁচনিৰে সুস্থ-সক্ষম জাতি গঢ় দিব পৰা নাযায়। এনেকুৱা আঁচনিৰ আধিক্যই সমাজত ৰঘুমলাৰ সংখ্যাহে বৃদ্ধি কৰি গৈ থাকিব। তেনেকুৱা কিছুমান চৰ্ত পূৰণ কৰিব পৰাৰ বাবেই যেনেকৈ ফিনলেণ্ড, ডেনমার্ক বিশ্বৰ সবাতোকৈ সুখী ৰাষ্ট্ৰৰূপে পৰিগণিত হৈছে, মিজোৰামেও তেনেকৈ দেশৰ সুখী ৰাজ্যৰ তালিকাৰ শীৰ্ষত আৰোহণ কৰিবলৈ সক্ষম হৈছে। এইক্ষেত্রত আমি কিয় পিছ পৰি আছোঁ তাৰ আত্মসমালোচনা হ'ব লাগিব। আমাৰ জাতীয় জীৱনটো সম্প্রতি ইমানেই অসুস্থ হৈ পৰিছে যে আমি পৰীক্ষা এটাই সুকলমে অনুষ্ঠিত কৰিব নোৱৰা হৈছোঁ। বছৰে বছৰে হৈ থকা পৰীক্ষা একোটাক সুকলমে পাতিব পৰাকৈ এফালে যেনেকৈ সু-নিয়ন্ত্রিত ব্যৱস্থাপনা এটা নাই, তেনেকৈ নাই শিক্ষাৰ্থীৰ কল্যাণৰ বাবে উৎসৰ্গা কৰিব পৰা সৎ মানসিকতা। 

সম্প্রতি ৰাজ্যত হৈ থকা উচ্চতৰ মাধ্যমিক পৰীক্ষাসমূহ বাতিল কৰিব লগা হ'ল এনেকুৱা ব্যৱস্থাপনাহীনতা আৰু অসুস্থ মানসিকতাৰ বাবে। পৰীক্ষাৰ পূৰ্বেই বিদ্যালয়ৰ কৰ্তৃপক্ষই প্রশ্নকাকতৰ টোপোলাৰ 'ছীল' খোলাটো হৈছে চৌর্য মানসিকতা। ভালকৈ নপঢ়োৱা আৰু নপঢ়া কিছুমান বিদ্যালয়ে গোপন পথেৰে পৰীক্ষাৰ ফলাফল ভাল কৰিবলৈ অৱলম্বন কৰা অসাধু মানসিকতাৰ উদাহৰণ এয়া। বক্র পথেৰে স্বাৰ্থ সিদ্ধি কৰা, সহজ-অসাধু পথেৰে ধন ঘটা, অন্যায় পন্থাৰে উপভোগ কৰা, ৰঘুমলা হৈ জীয়াই থাকিব খোজা প্ৰৱণতাবোৰৰ অসুস্থ নেতৃত্বৰ ছত্ৰছায়াত বেছিকৈ বিস্তাৰ ঘটে। এনে মানসিকতাৰ সুস্থ-সবল দেশ বা ৰাজ্য গঢ়াটোতো সম্ভৱ নহয়েই, উৎপাদনক্ষম ধনী দেশ বা ৰাজ্য হোৱাও উজু নহয়।

Share This