চিঙৰা-জেলেপি

dainik janambhumi July 21, 2025

ডিজিটেল ডেস্ক : এনেকুৱা ভাৰতীয় বৰ কমেই ওলাব, যাৰ প্রিয় মুখৰোচকৰ তালিকাত চিঙৰা-জেলেপি নাই! আচলতে বৈচিত্র্যৰ মাজত ঐক্যৰ সুন্দৰ নিদৰ্শন এই ভাৰতবৰ্ষত চিঙৰা-জেলেপিও এক ঐক্যৰে প্রতীক। অসমৰ পৰা গুজৰাট, কাশ্মীৰৰ পৰা কন্যাকুমাৰী- ভাষা, ধর্ম, সংস্কৃতি বিভিন্ন হ'ব পাৰে। কিন্তু জেলেপি-চিঙৰাৰ 'ফেন ফল'ৱাৰ'ৰ কোনো ভেদাভেদ নাই। আছে যদি মাত্ৰ নামৰ পাৰ্থক্য, পার্থক্য সামান্য ৰূপ-ৰং, জুতিৰ। ক'ৰবাত যদি চামোচা, জালেবি, ক'ৰবাত শিঙড়া-জিলেপি, ক'ৰবাত আকৌ শিঙৰা-জেলেপি! 'থোড়া নমকিন, থোড়া মিঠা'ৰ এই বহুল সমাদৃত দুর্দান্ত যুটি কিন্তু শেহতীয়াকৈ বাতৰিৰ শিৰোনামত।

'বিধিসন্মত সতর্কীকৰণ'- ইমানদিনে এই শব্দকেইটা সাধাৰণতে চিগাৰেট বা ধঁপাতজাতীয় সামগ্ৰীৰ যোগেদিহে পৰিচিত আছিল। কিন্তু সম্ভৱ অতি সোনকালেই চিঙৰা, জেলেপি বা গোলাপ জামু উপলব্ধ দোকান-ষ্ট'ৰটো ওলমিব এই 'বিধিসন্মত সতৰ্কীকৰণ'। তাত লিখা থাকিব দেশজুৰি অতি জনপ্রিয় এই মুখৰোচক খাদ্যসমূহৰ উপাদানৰ তালিকা, এক কথাত 'অইল এণ্ড ছুগাৰ ব'ৰ্ড'। এতিয়া এই ধৰণৰ খাদ্যৰ বিক্রেতাসকলে চিঙৰা আৰু জেলেপিৰ দৰে খাদ্যই মানৱ শৰীৰত কেনেধৰণৰ অনিষ্ট সাধন কৰে বা কেনেধৰণৰ প্ৰভাৱ পেলায় আৰু ইয়াক প্রস্তুত কৰোঁতে কিমান তেল আৰু চেনি ব্যৱহাৰ কৰা হৈছে, সেই কথা গ্রাহকক ৰাজহুৱাকৈ জনাব লাগিব।

আচলতে এই কথাৰ আৰম্ভ হয় কেন্দ্ৰীয় স্বাস্থ্য সচিব পুণ্যসলিলা শ্রীবাস্তৱে সকলো মন্ত্রালয়লৈ লিখা এখন চিঠিক কেন্দ্ৰ কৰি। চিঠিখনত তেওঁ কেন্দ্রীয় চৰকাৰৰ সকলো কার্যালয় আৰু শিক্ষা প্রতিষ্ঠানৰ কেন্টিনত জনপ্রিয় খাদ্য আৰু স্নেকছত থকা চেনি আৰু ফেটৰ পৰিমাণ উল্লেখ কৰি ৰাজহুৱা প্ৰদৰ্শনৰ ব্যৱস্থা কৰাৰ পৰামৰ্শ দিয়ে। সেইখনকে কোৱা হৈছে 'অইল এণ্ড ছুগাৰ ব'ৰ্ড'। দেশৰ ক্রমবর্ধমান মেদবহুলতা আৰু জীৱনশৈলীজনিত ৰোগ নিয়ন্ত্ৰণৰ বাবে জনসচেতনতা বৃদ্ধিৰ বাবেই এই প্রচেষ্টা গ্রহণ কৰা হৈছে বুলি প্রকাশ। চিঠিত আৰু কোৱা হৈছে স্থানীয় মুখৰোচক খাদ্যত থকা চেনি, নিমখ আৰু চৰ্বীৰ পৰিমাণ যেন এই ব'ৰ্ডত জৰুৰ উল্লেখ থাকে। তদুপৰি দৈনিক এইবোৰ কিমান পৰিমাণে খোৱা উচিত, তাকো উল্লেখ থাকিব লাগিব ব'ৰ্ডত। এই কৰ্মসূচীৰ নাম দিয়া হৈছে 'ফিট-ইণ্ডিয়া ইনিচিয়েটিভ'। এই কথা ঠিক যে জিভাই জুতি পালেও চিঙৰা-জেলেপিৰ দৰে তেল-মছলা আৰু চেনিৰে পৰিপূৰ্ণ খাদ্যই দেহলৈ বিভিন্ন ৰোগক আমন্ত্রণ জনায়। সেয়েহে চিগাৰেট আৰু ধঁপাতৰ পেকেটত যেনেকৈ কেঞ্চাৰৰ দৰে ৰোগৰ বাবে সতর্কবাণী দিয়া থাকে, ঠিক সেইদৰে চিঙৰা আৰু জেলেপিক লৈয়ো সতর্কবাণী দিয়াটো এতিয়া একপ্ৰকাৰৰ সময়ৰ দাবী। প্রকৃততে জাংক ফুডক চিগাৰেটৰ সমগোত্রীয় স্বাস্থ্যৰ ক্ষতিকাৰক সামগ্ৰী বুলি পতিয়ন যাবৰ হ'ল। চিকিৎসকসকলে কয়, ছুগাৰ, প্ৰেছাৰ, কলেষ্টৰেল, ওবেচিটি- এই আটাইবোৰ মেটাবলিক ছিনড্রম বা বিপাকজনিত সমস্যা। এটা সমস্যা আনটোৰ সৈতে জড়িত। এটাই লগ ল'লে আনটো পিছে পিছে আগবাঢ়ি অহাৰ শংকা প্রবল। আৰু এই সকলোৰে নেপথ্যত
থাকে অনিয়ন্ত্রিত চেনি, ফেট আৰু অতিৰিক্ত নিমখ খোৱাৰ প্ৰৱণতা। সেয়ে চিকিৎসকসকলৰ সতর্কবাণী- এইবোৰ খোৱাৰ সময়ত মাত্রাজ্ঞান মানি চলা উচিত। চৰকাৰে সম্ভৱ এইবোৰ দিশ চালি-জাৰি চায়েই 'অইল এণ্ড ছুগাৰ ব'ৰ্ড'ৰ কথা বিবেচনা কৰিছে। ইতিমধ্যেই এইমছ নাগপুৰে এই নতুন নিয়ম নিজৰ চৌহদত আৰম্ভ কৰিছে।

আনকি নাগপুৰৰ বিভিন্ন ৰেস্তোৰাঁ আৰু ভেণ্ডৰেও এনেধৰণৰ সতৰ্কীকৰণৰ ফলক আঁৰিবলৈ লৈছে। এই প্ৰসংগত নাগপুৰৰ কার্ডিঅ'লজিকেল ছ'চাইটি অব ইণ্ডিয়াৰ সভাপতি ডাঃ অমৰ আমালে কৈছে, 'চিগাৰেটৰ পেকেটত যেনেকৈ সতৰ্কীকৰণ থাকে, এইবাৰ খাদ্য সামগ্ৰীতো সতৰ্কীকৰণৰ বিষয়টো সূচনা হ'ল। খোৱাত কিমান চেনি আৰু ট্রান্স ফেট আছে, সেয়া জনাটো অতি জৰুৰী। ক্ষতিৰ নিৰিখৰ পৰা এইবোৰ নতুন ধঁপাত। মানুহে জনা প্রয়োজন তেওঁ কি খাইছে।' 'অইল এণ্ড ফেট ব'র্ড'লৈ দেশৰ চিকিৎসক সমাজৰ এটা বৃহৎ অংশই সমর্থন জনালেও দেশজুৰি বিষয়টোৱে কিন্তু বিতৰ্কৰো সূচনা কৰিছে। পশ্চিম বংগৰ মুখ্যমন্ত্রী মমতা বেনার্জীয়ে স্পষ্টভাৱে জনাই দিছে, পশ্চিম বংগত এই নির্দেশ কাৰ্যকৰী নহ'ব। কোনে কি খাব, সেয়া এজনৰ একান্তই ব্যক্তিগত সিদ্ধান্ত। দেশজুৰি হোৱা বিতৰ্কৰ ৰূপ দেখি স্বাস্থ্য মন্ত্র্যালয়ে স্পষ্ট কৰি দিয়ে চিঙৰা, জেলেপিৰ দৰে খাদ্যক লৈ সতর্ক কৰাহে হৈছে। এই খাদ্যসমূহক লৈ কোনো নির্দেশনা জাৰি কৰা হোৱা নাই। স্বাস্থ্য মন্ত্ৰ্যালয়ৰ ব্যাখ্যা এনে উদ্যোগৰ মূল কাৰণ হ'ল দেশৰ নাগৰিকৰ মাজত মেদবহুলতা আৰু স্থূলতা দিনক দিনে বাঢ়িছে। সমীক্ষা অনুসৰিয়েই ২০৫০ চনৰ ভিতৰত স্থূলতা আৰু অতিৰিক্ত ওজনৰ চিকাৰ হ'ব ৪৫ কোটি ভাৰতীয়। সেয়ে এই 'অইল এণ্ড ফেট ব'ৰ্ড'ৰ সমৰ্থক চিকিৎসকসকলে কৈছে এয়া খাদ্যৰ সম্পর্কত নিষেধাজ্ঞা নহয়, মাত্র কোনোবাই যদি চিঙৰা, জেলেপি খাইছে তেওঁ জনা উচিত কিমান পৰিমাণৰ চেনি আৰু নিমখ তেওঁৰ শৰীৰত সোমাইছে। কাৰণ জিভাৰ জুতিত মজি এই খাদ্যৰ যোগেদি এজন লোকে স্থূলতাৰ লগে লগে হৃদৰোগ আৰু ডায়েবেটিছ ৰোগকো আমন্ত্রণ জনাইছে। সেয়ে এই ব'ৰ্ডৰ দৰাচলতে মূল উদ্দেশ্য- 'খাওক, কিন্তু ভাবি-চিন্তি খাওক।' প্রস্তাৱটো বেয়া নহয় নেকি?

Share This