চমক আৰু সংশয়

dainik janambhumi February 28, 2025

ডিজিটেল ডেস্ক: বিশ্বায়নৰ অৰ্থনৈতিক ৰাজনীতিৰ সম্প্ৰসাৰণৰ পাছত সমগ্ৰ বিশ্বতে উন্নয়নৰ পৰিভাষা সলনি হৈছে। এতিয়া সমগ্র বিশ্বই এখন গোলকীয় গাঁও। অর্থনীতিৰ বিস্তাৰে দেশৰ ৰাজনৈতিক পৰিসীমাক গুৰুত্বহীন কৰি আনিছে। অর্থনীতিৰ এই বিস্তাৰে বিশ্বজুৰি অবাধ গতিৰ পথ মুকলি কৰিছে। আর্থনৈতিকভাৱে তুলনামূলকভাৱে দুর্বল, কিন্তু সম্পদৰ দিশত শক্তিশালী দেশসমূহক পুঁজিপতিসকলে লক্ষ্য কৰি লৈছে। সমগ্র বিশ্বতে তেনে দেশসমূহত আধিপত্য বিস্তাৰক লৈ ইতিমধ্যে বৃহৎ পুঁজি-বহুজাতিক গোষ্ঠীসমূহৰ মাজত প্রতিযোগিতা আৰম্ভ হৈছে। 'বিনিয়োগ'ৰ নামত সমগ্ৰ বিশ্বজুৰি পুঁজিপতি গোষ্ঠীসমূহে নানা অনুষ্ঠান-উৎসৱৰ আয়োজন কৰাটো এতিয়া এটা পৰম্পৰা হৈ পৰিছে। সেই দেশৰ শাসক-গোষ্ঠীসমূহৰ লগত ভিতৰুৱা বুজাবুজিত উপনীত হৈছে। কিছুমান ৰাজনৈতিক শক্তিৰ লগত সম্পৰ্ক কৰি আনকি নির্বাচনসমূহতো পুঁজি বিনিয়োগ কৰিছে। ইলেক্টৰেল বণ্ড-কাণ্ডই ভাৰততো যে তেনেধৰণৰ খেল এখন (নেপঠ্য) চলি আছিল তাৰ ইংগিত বহন কৰিছে। ইলন মাক্সে ভাৰতলৈ পুঁজি দিয়া বন্ধ কৰাৰ অন্তৰালত আৰু কিছু কথা জড়িত আছে, যিবোৰ এই পর্যন্ত অনালোচিত হৈয়ে আছে। 

ভাৰতীয় শ্বেয়াৰ বজাৰৰ পৰা বিনিয়োগ প্রত্যাহাৰ অবাধ গতিত এতিয়াও চলি আছে। পুঁজিপতি গোষ্ঠীসমূহে আজিকালি নিৰ্ধাৰণ কৰে উন্নয়নৰ সংজ্ঞা। তেওঁলোকে ধাৰ্য কৰা উন্নয়নৰ মডেলত সাধাৰণ জনতাৰ কল্যাণৰ প্ৰশ্নটো গৌণ, বিনিয়োগকাৰীৰ স্বাৰ্থহে মুখ্য। তদুপৰি বিনিয়োগৰ বাবে 'নিমন্ত্রণ' কৰি অনা পুঁজিপতি গোষ্ঠীসমূহৰ ওপৰত কোনো চৰ্ত আৰোপ নকৰাৰ প্ৰতিশ্ৰুতি পূর্বেই দিয়াৰ পাছতহে তেওঁলোক বিনিয়োগৰ বাবে এখন দেশলৈ আহে। যিক্ষেত্ৰত 'উন্নয়ন'ৰ সংজ্ঞাই পুঁজিপতি গোষ্ঠীসমূহে তেওঁলোকৰ সুবিধামতে ঠিক কৰি লয়- সেইবাবেই তেওঁলোকে থলুৱা, খিলঞ্জীয়াৰ অধিকাৰ, জাতি-জনগোষ্ঠীৰ অধিকাৰ আদিক বিশেষ গুৰুত্ব নিদিয়ে। দেশ এখনৰ অভ্যন্তৰীণ ভূমি আইন, শ্রমিক আইন আদিকো তেওঁলোকৰ পচন্দ অনুসৰি সংশোধন কৰি দিব লগা হয়। আজিৰ যি প্রযুক্তিবিদ্যা প্রয়োগেৰে উদ্যোগ আদি স্থাপন কৰা হয় তাত নিয়োগৰ সুবিধা অতি কম। অর্থাৎ তেওঁলোকৰ সুবিধা অনুসৰি ওপৰ স্তৰৰ বিষয়া-কর্মী নিজেই লগত আনে। চৰকাৰে তেওঁলোকৰ তেনে কার্যত বাধা দিব নোৱাৰে। 'এডভাণ্টেজ আছাম-২.০'ৰ নামত বর্তমান অসমত অনুষ্ঠিত হ'ল এটা বর্ণাঢ্য মহোৎসৱ।দেশ-বিদেশৰ পুঁজিপতি গোষ্ঠীৰ লোক আহি বিভিন্ন ক্ষেত্রত হাজাৰ কোটি, লাখ কোটিৰ বিনিয়োগৰ প্রতিশ্রুতি দিলে। সাধাৰণ পাটী গণিতৰ জ্ঞানেৰে এই বৃহৎ পৰিমাণৰ ধনৰ আও-ভাও সাধাৰণ লোকে বিশেষ একো নুবুজে। অৱশ্যে বুজি পোৱাৰ আৱশ্যকো নাই। এইসকল লোক 'হিতাধিকাৰী' হৈ চৰকাৰৰ প্ৰতি কৃতজ্ঞ হৈ আছে আৰু ভৱিষ্যতেও হিতাধিকাৰী হৈ থাকিব। কিন্তু নতুন প্ৰজন্মৰ তৰুণ-তৰুণী স্বাভাৱিকতে মোহগ্রস্ত হ'ব। কাৰণ তেওঁলোকৰ সমুখত ভৱিষ্যতৰ এখন উজ্জ্বল ছবি নাই। আনহাতে এক ধৰণৰ ভোগবাদী বাতাৱৰণৰ মাজত তেওঁলোক ডাঙৰ-দীঘল হৈছে। শিক্ষা
লাভ কৰিছে। অধিকাৰ আৰু বঞ্চনাৰ বিষয়ে তেওঁলোক সিমান সজাগো নহয়। চৰকাৰে বিচাৰে, দেশৰ যুৱক-যুৱতীৰ প্ৰতিবাদী প্ৰৱণতাৰ বিকাশ নহওক। তাৰ বাবেই তেওঁলোকক অনৱৰতে নৃত্য-গীত-খেল আদি অনুষ্ঠানত ব্যস্ত ৰাখি বিনোদনমুখী কৰি তোলা হয়। সেইবাবেই আমাৰ এইসকল তৰুণে এডভাণ্টেজ আছাম-২.০ৰ পৰা বহুত কিবা হোৱাৰ সম্ভাৱনা আৰু সপোনত মত্ত থাকিব পাৰে। কেন্দ্ৰীয় মন্ত্ৰী গডকাৰিয়ে অসম আৰু উত্তৰ-পূবৰ আন্তঃগাঁথনি উন্নয়নৰ বাবে বৃহৎ পৰিমাণৰ পুঁজিৰ আবণ্টনৰ কথা ঘোষণা কৰিছে। আন্তঃগাঁথনিৰ এই বিনিয়োগত পৰোক্ষভাৱে স্থানীয় লোক উপকৃত হ'ব ঠিকেই, কিন্তু মূল উদ্দেশ্য অসমৰ ভিতৰুৱা অঞ্চলৰ ভূমিৰ লগতো যোগাযোগ স্থাপন কৰি বিনিয়োগ ত্বৰান্বিত কৰাহে। কাৰণ অসমৰ অৱশিষ্ট ভূমিৰ ওপৰত, পাহাৰসমূহৰ ওপৰত, নৈ-বিলৰ কাষৰুৱা খালী মাটিৰ ওপৰত পুঁজিপতিৰ চকু।

 'বসুন্ধৰা' ব্যৱস্থাৰ প্ৰয়োগেৰে থলুৱা মানুহৰ মাটিৰ ব্যৱস্থাপনা কিছু কঠোৰ কৰি দিয়া হৈছে। কিন্তু পুঁজিপতিয়ে যেতিয়াই-য'তে-যিমান পৰিমাণৰ মাটি বিচাৰিছে, সেইমতে পাই আছে। 'এডভাণ্টেজ আছাম-২.০ৰ আগৰে পৰাই পুঁজিপতিয়ে সহজ চৰ্তত মাটি পোৱাৰ ব্যৱস্থা অব্যাহত আছে। যদিহে অধিক বিনিয়োগকাৰী ঘোষণা কৰা মতে আহে তেন্তে অধিক ভূমিৰ প্ৰয়োজন হ'ব। ইতিমধ্যে ৰাজধানী এলেকা জাগীৰোডলৈ সম্প্ৰসাৰণৰ নামত জনজাতি এলেকাৰ বৃহৎ মাটি দখলৰ ব্যৱস্থা চলি আছে। একে কাৰণতে শংকিত হৈ আছে ৰাভা স্বায়ত্ত শাসিত এলেকাৰ ৰাইজ। উজনি অসমৰ চাহ বাগিচাসমূহৰ অধীনত বৃহৎ পৰিমাণৰ ভূমি আছে। এইবাৰ এই ভূমিতো চকু পৰাৰ সম্ভাৱনা। ইতিমধ্যে কাছাৰ জিলাৰ ভলু নামৰ বৃহৎ চাহ বাগিচাখনৰ মাটি সেউজ বিমান বন্দৰৰ নামত দখল কৰা হ'ল। চাহ খেতি উচ্ছেদ কৰা হ'ল। ইতিমধ্যে প্রকাশিত এটা বাতৰি অনুসৰি কাজিৰঙাৰ কাষৰীয়া 'মেথনি' নামৰ বাগিচাখনৰ মাটিতো হাজাৰ কোটি টকীয়া প্রকল্প এটাৰ প্রস্তুতি চলি আছে। সাম্প্রতিক সময়ত অর্থনৈতিক বিকাশৰ বাবে ঔদ্যোগিক বিকাশ আৰু এই ক্ষেত্ৰত বহিঃবিনিয়োগৰ প্ৰয়োজনীয়তাক নস্যাৎ কৰাৰ উপায় নাই, কিন্তু ইয়াত খিলঞ্জীয়াৰ স্বাৰ্থ পূৰণ হ'ব লাগিব। খিলঞ্জীয়াৰ ভূমিৰ অধিকাৰ যাতে খর্ব নহয়, তাৰ প্ৰতিও সতৰ্ক হৈ থাকিব লাগিব। উন্নয়ন ৰাইজৰ অধিকাৰহে, এয়া বাহিৰৰ পৰা কোনোবা আহি আমাক দিব খোজা উপহাৰ নহয়। এতিয়া অসম- নগালেণ্ডৰ পৰা বাঁহ নি মধ্য প্রদেশত কাগজ কল চলাই আছে। কিন্তু অসমৰ কল দুটা বচাই ৰাখিব পৰা নগ'ল। এডভান্টেজ আছামৰ নামত যি বিনিয়োগ আৰু উন্নয়নৰ প্রতিশ্রুতি দিব খোজা হৈছে সেই উন্নয়নৰ ফলত অসমৰ থলুৱা লোক যাতে নিজৰ মাটিতে নিজে ভগনীয়া নহয়- ড° ভূপেন হাজৰিকাৰ সতৰ্ক বাণীও আমি স্মৰণ কৰিব লাগিব।

Share This