সদনৰ মৰ্যাদা

dainik janambhumi March 26, 2025

ডিজিটেল ডেস্কঃ 'সংসদ গাহৰিৰ গড়াল', 'ৰাজনীতি দুৰ্জনৰ শেষ আশ্রয়' আদি ধৰণৰ মন্তব্যবিলাক বহুদিনৰ পুৰণি। উলা-মুলা মানুহেও এই মন্তব্যবোৰ দিয়া নাছিল। তেওঁলোক একো একোগৰাকী বিশ্ববন্দিত মনীষী। আশ্চর্যজনক কথাটো হ'ল-

বিশ্বৰ প্রান্তে প্রান্তে সংসদীয় মঞ্চবিলাক বিদ্বান, বিচক্ষণ, বৰেণ্য বহু নেতাই যুগ যুগ ধৰি শুৱনি কৰি আহিলেও উল্লিখিত মন্তব্যকেইটা সময়ে সময়ে প্রাসংগিক হৈ উঠা দেখা যায়। সংসদীয় মঞ্চবিলাক যেতিয়া শাসক-বিৰোধী সদস্যৰ বাদানুবাদ-সংঘাতত উচ্ছৃংখল হৈ উঠে, মাননীয় সদস্যসকলে নিজৰ মান-মর্যাদা পাহৰি বজৰুৱা চুপতিত লিপ্ত হয়, শালীনতাৰ সীম চেৰাই কেতিয়াবা মাৰপিটতো লিপ্ত হয়, তেতিয়াই এনেকুৱা মন্তব্যবোৰ প্ৰাসংগিক হৈ পৰে, সঁচাকৈয়ে যেন সংসদ বা অন্য কোনো সাংবিধানিক সদন নহয়, একোটা গাহৰিৰ গড়ালহে! ৰাজনীতিকসকলো মহামান্য জনপ্রতিনিধি নহয়, একো একোজন দুর্জনহে!

এই কথাখিনিৰ অৱতাৰণা এই স্তম্ভত কিয় কৰা হৈছে সেয়া হয়তো পাঠকসকলে ধাৰণা কৰিব পাৰিছে। কেইদিনমান আগতে অসম বিধানসভাত ৰূপজ্যোতি কুর্মি নামৰ শাসকীয় পক্ষৰ বিধায়কজনে প্রতিপক্ষৰ কেইজনমান বিধায়কৰ লগত বাদানুবাদত লিপ্ত হৈ যি অসভ্য ভাষাৰে বজৰুৱা কাজিয়াত লিপ্ত হ'ল বিভিন্ন মাধ্যমত তাৰ ৰূপ দেখি সভ্য সমাজ নিজেই লজ্জানত হৈছে। সেই ঘটনাৰ দুদিন পাছতে নুৰুল হুদা নামৰ কংগ্ৰেছৰ বিধায়ক এজনৰ ঠেলা-হেঁচাত হেনো বিধানসভাৰ উপাধ্যক্ষ নোমল মমিন আঘাতপ্রাপ্ত হ'ল। বিধায়কজনে শপত খাই তেওঁ মমিনক আক্ৰমণ কৰা নাই বুলি কৈছে যদিও বিষয়টো ইতিমধ্যে থানা পাইছেগৈ আৰু পৰৱৰ্তী সময়ত কোন সঁচা কোন মিছা তাৰ বিচাৰ নিশ্চয় হ'ব।

বিৰোধী পক্ষত চি চি টিভিৰ ফুটেজ পৰীক্ষা কৰাৰ দাবী জনাইছে। সেয়া হ'লেও ঘটনাটোৰ সত্যাসত্য পোহৰলৈ আহিব। কিন্তু 'পৱিত্ৰ সদন' বুলি কোৱা সংসদীয় মঞ্চত এনেকুৱা ঘটনাৰ অভিযোগ উঠাটোও অতি লজ্জাজনক। বিশেষাধিকাৰৰ কৱচেৰে সুৰক্ষিত হৈ থকা একাংশ জনপ্রতিনিধিৰ এনেকুৱা অভব্য, উদণ্ড ৰূপ হ'লে প্রজাই ভাল শাসন আশা কৰিব কেনেকৈ? শাসকসকলে যদি ভাবি থাকে যে তেওঁলোকেই শুদ্ধ, 'ৰজাই ভুল নকৰে' উচ্চাত্মিকাৰে তেওঁলোক পৰিচালিত হয় আৰু বিৰোধী মাত্রেই বেয়া, দেশদ্রোহী বুলি গণ্য কৰাৰ অৱস্থা এটাৰ সৃষ্টি হয়, তেনে দেশ বা ৰাজ্যত গণতন্ত্ৰৰ মূল্যই বা ক'ত! কথাবোৰ গভীৰভাৱে চিন্তনীয় আৰু উদ্বেগজনক হৈ গৈ আছে। ৰূপজ্যোতি কুৰ্মিৰ ঊৰ্ধ্বত আচৰণক সভ্য সমাজে গৰিহণা দিছে। তেনেকৈ বিৰোধী পক্ষৰ একাংশ সদস্যৰ সৌজন্যহীন আচৰণকো ৰাইজে ভাল নাপায়। কিন্তু ৰূপজ্যোতি কুৰ্মিৰ আচৰণক ন্যায্যতা প্রদান কৰিবলৈ গৈ মুখ্যমন্ত্রীয়ে দিয়া কিছুমান যুক্তিকহে ৰাইজে সহজভাৱে গ্ৰহণ কৰিব পৰা নাই। মুখ্যমন্ত্রীয়ে কৈছে- এটা নিপীড়িত জনগোষ্ঠীৰ প্ৰতিনিধি হোৱা সূত্রে তেওঁৰ খং উঠাত অস্বাভাৱিকতা নাই। নিপীড়িত জনগোষ্ঠীৰ প্ৰতিনিধি হ'লেই তেওঁ সদনত অভব্য আচৰণ কৰিব সেইটো মানি ল'ব পৰা যুক্তি নহয়। স্বৰাজোত্তৰ সময়ৰে পৰা সেই নিপীড়িত চাহ জনগোষ্ঠীৰ বহু লোক অসম বিধানসভাৰ সদস্য হৈছে, সাংসদ হৈছে, ৰাজ্য তথা দেশৰ মন্ত্ৰীও হৈছে, আজিলৈকে কোনেও সংসদৰ ভিতৰে-বাহিৰে এনেকুৱা আচৰণ কৰাৰ নজিৰ নাই। বৰঞ্চ চাহ জনগোষ্ঠীৰ বহু নেতাৰ মাৰ্জিত আচৰণক ৰাইজে ভূয়সী প্রশংসা কৰাহে দেখা যায়। 

আনহাতে, চাহ জনগোষ্ঠী নিপীড়িত হ'লেও ৰূপজ্যোতি কুর্মিক নিপীড়িত বুলি কোৱাটোও অযুক্তিকৰ। কাৰণ তেওঁ মাতৃগৰ্ভতে ৰাজকীয় ৰাজনীতিৰ সোৱাদ পাইছে। ৰূপজ্যোতি নিজে চাৰিবাৰ অসম বিধানসভালৈ নির্বাচিত হোৱাই নহয়, তেওঁৰ মাতৃ ৰূপম কুর্মি আছিল মৰিয়নি সমষ্টিৰ বিধায়ক তথা পূৰ্বৰ তৰুণ গগৈ চৰকাৰৰ এগৰাকী মন্ত্রী। 

মন্ত্রীৰ সন্তান হোৱা সূত্রে ৰূপজ্যোতিয়ে শৈশৱৰে পৰা পাইছে সচ্ছল জীৱন। যোৰহাট নগৰত তেওঁ ডাঙৰ-দীঘল হৈছে, নগৰতে পঢ়া-শুনাও কৰিছে। গতিকে, নিপীড়িত শব্দটো তেওঁৰ ক্ষেত্রত প্রযোজ্য নহয়। 

তেওঁলোক চাহ জনগোষ্ঠীৰ 'ক্রিমি লেয়াৰ'ৰহে প্রতিনিধি। ৰূপজ্যোতি কুৰ্মিৰ মাতৃ যেনেকৈ অতি বিনয়ী স্বভাৱৰ মহিলা ৰাজনীতিক আছিল তেনেকৈ তেওঁৰ পূৰ্বসুৰী, মৰিয়নি সমষ্টিৰ পূৰ্বৰ কেইবাটাও কাৰ্যকালৰ বিধায়ক তথা অসমৰ চাহ জনগোষ্ঠীৰ প্ৰথমগৰাকী কেবিনেট মন্ত্রী গজেন তাঁতীও আছিল অতি ভদ্ৰ আৰু ত্যাগী জনপ্রতিনিধি। তেনে ধৰণৰ আদৰ্শনীয় ঐতিহ্য থকাৰ পাছতো ৰূপজ্যোতি কুৰ্মিয়ে বিধানসভাৰ ভিতৰে-বাহিৰে অনাকাংক্ষিত আচৰণ কৰাটো তেওঁৰ চাৰিত্ৰিক দোষহে, চাহ জনগোষ্ঠীক ইয়াৰ বাবে জগৰীয়া কৰাটো যুক্তিসংগত ব্যাখ্যা হ'ব নোৱাৰে। যি নহওক, সংসদীয় মঞ্চৰ মৰ্যাদা এনেধৰণৰ কিছুমান জনপ্রতিনিধিয়ে নষ্ট কৰি থকাটো অতি উদ্বেগজনক কথা। তেওঁৰ দোষৰ বাবে যুক্তি বিচৰাতকৈ এনেকুৱা ব্যক্তিক সংসদীয় মঞ্চলৈ আহিবলৈ সুযোগ নিদিয়াটোহে উত্তম কথা হ'ব। অন্যথা এওঁলোকৰ অভব্য কাম-কাজে দলটোৰ গাতো চেকা লগাব। আনহাতে, গণতন্ত্ৰত যিহেতুকে ৰাইজেই সর্বোচ্চ বিচাৰক, সেয়েহে ৰাইজে সঠিকভাৱেই এই কথাবোৰৰ বিচাৰ কৰিব। আমাৰ দেশত তেনেকুৱা বিচাৰৰ অসংখ্য উদাহৰণ আছে

Share This