একলা চল

dainik janambhumi March 05, 2025

ডিজিটেল ডেস্কঃ কবিগুৰু ৰবীন্দ্ৰ নাথ ঠাকুৰে মানৱ জাতিক দি থৈ যোৱা এটা বহু চৰ্চিত গীতৰ পংক্তি হৈছে- যদি তোৰ ডাক শুনে কেউ না আসে, তবে একলা চল ৰে। একলা চল, একলা চল, একলা চল ৰে। এই গীতে অকলশৰীয়া হৈ পৰা মানুহক নিজৰ ভৰিৰ শকতিৰে আগবঢ়াৰ শক্তি দিয়ে, সাহস দিয়ে। কোনোবা গহন পথত যাত্ৰা কৰাৰ সময়ত যদি কোনেও এবাৰ মূৰ তুলি নাচায়, তেতিয়া বাটৰ কাঁইটে বিন্ধা ভৰিৰ তেজ ওলোৱা তলুৱাৰে অকলেই আগবাঢ়া।

কেনিও পোহৰ নোহোৱা, ধুমুহা-বৰষুণৰ আন্ধাৰ নিশা যদি আনে দুৱাৰ বন্ধ কৰি দিয়ে তেতিয়া বজ্ৰৰ জুইৰে আপোন বুকুৰ হাড় জ্বলাই অকলেই আগবাঢ়া- কবিগুৰুৱে গীতটোৰ মাজেৰে এনেকৈয়ে দিছে একাকীত্বত ভোগা মানুহক জীৱন যুদ্ধত যুঁজি থকাৰ প্ৰেৰণা। গীতটোৰ গভীৰ অৰ্থ, ই নিঃসংগ মানুহক দিয়া প্ৰেৰণাৰ দিশটো বেলেগ কথা, কিন্তু ৰাজনৈতিক দলৰ নেতাসকলে আজিকালি এই গীতৰ উল্লিখিত পংক্তিক প্রায়ে ব্যৱহাৰ কৰা দেখা যায়। 

বিশেষকৈ দেশৰ সাম্প্রতিক 'কোৱালিশ্যন' ৰাজনীতিত সংঘবদ্ধ হ'ব খোজা বাকী দলবোৰৰ পৰা আশা কৰা ধৰণে সঁহাৰি নাপালেই আজিকালি কোনো কোনো নেতাই এই গীতেৰে আপোন সামর্থ্যক ব্যক্ত কৰাৰ চেষ্টা কৰা পৰিলক্ষিত হয়। অসম প্রদেশ কংগ্ৰেছৰ সভাপতি ভূপেন বৰায়ো অলপতে সামাজিক মাধ্যমৰ 'প'ষ্ট'ত এই গীতৰ কলিটো উল্লেখ কৰাক লৈ ভিন্নসুৰী চৰ্চাই ৰাজ্যৰ ৰাজনীতি উত্তাল কৰিছে। পশ্চিম বংগৰ নিৰ্বাচনৰ আগত মমতা বেনার্জীয়েও গাইছিল- 'একলা চল ৰে'! কিন্তু ৰাজনৈতিক নেতা কিছুমানে যে এই 'একলা চল' পংক্তিক ব্যৱহাৰ কৰে, তাত কবিগুৰুৰ গীতৰ আচল ভাবটো প্রযোজ্য হয় জানো? 

তুমি যদি অসহায়, গভীৰ বিপদতো যদি তুমি কাৰো পৰা এধানিমান সহায় নোপোৱা, তেতিয়া তোমাৰ সন্মুখত একমাত্র বিকল্প হ'ল- নিজৰ ভিতৰৰ ইচ্ছা শক্তিক ব্যৱহাৰ কৰি সেই বিপদ অতিক্রম কৰা। কিন্তু এই ৰাজনৈতিক নেতাসকলৰ অৱস্থাতো তেনে নহয়। মমতা বেনার্জীয়ে এটা সময়ত 'একলা চল ৰে' গাইছিল এইবাবেই যে এয়া আছিল কংগ্রেছ, চি পি আই (এম)ক দিয়া সকীয়নি- তোমালোকে যদি মই বিচৰামতে মোক সহায় নকৰা, তেনেহ'লে মই অকলেই নির্বাচন খেলিম! এতিয়া আমি যদি অসম প্রদেশ কংগ্ৰেছ কমিটীৰ সভাপতিগৰাকীৰ 'একলা চল'ৰ পৃষ্ঠভূমিলৈ চাওঁ, তেতিয়া দেখা পাম এখন হাস্যস্পদ ছবি। অসমৰ বিজেপি-বিৰোধী দলবিলাকৰ অৱস্থা শোচনীয়। প্রধান বিৰোধী দল কংগ্রেছেই আনকি নিজেই নাজানে ২০২৬ৰ বিধানসভাৰ নিৰ্বাচনত তেওঁলোকৰ আপোন শক্তিৰে জিকিব পৰা সমষ্টি কেইটা। লোক সভাৰ নিৰ্বাচনত কৰিমগঞ্জৰ দৰে তেওঁলোকৰ বাবে অতি সহজ যেন লগা সমষ্টিও বিজেপিয়ে কাঢ়ি নিলে। আক্ষৰিক অৰ্থতে ৰাজ্যৰ প্ৰতিটো বিৰোধী দল ধুমুহা-শিলাবৃষ্টি-বৰষুণৰ গ্ৰাসত পৰি জুৰুলা। কিন্তু এনে অৱস্থাতো আনে দুৱাৰ বন্ধ কৰাৰ পৰিৱৰ্তে তেওঁলোকে নিজেই নিজৰ দুৱাৰ বন্ধ কৰি চিঞৰিবলৈ ধৰিছে 'একলা চল ৰে'। ড° হীৰেন গোহাঁই, হৰেকৃষ্ণ ডেকাৰ দৰে বিশিষ্ট ব্যক্তিয়ে ওলাই আহি দলবিলাকক খাটনি ধৰিছে- তোমালোক একেলগ হোৱা, নহ'লে বিজেপিক প্রতিহত কৰিব নোৱাৰিবা। নিজৰ মাজৰ খাম-খেয়ালিবোৰ পৰিহাৰ কৰা। কিন্তু গালো বালো খোলাকতিৰ তাল! হাস্যস্পদ বুলি এইবাবেই কোৱা হৈছে যে ৰাজ্যৰ প্ৰতিটো দলেই কৈ আছে ঐক্যবদ্ধ হ'ব লাগে, কিন্তু বাস্তৱত তেওঁলোক লগ লাগিব নোৱাৰে। আচলতে 'কোৱালিশ্যন' ৰাজনীতিৰ যিটো ধৰ্ম
তাক পালন কৰিব পৰাৰ ইচ্ছা বা মানসিকতা কোনোটো বিৰোধী দলৰ নাই। সকলোৱেই কেৱল নিজৰ নিজৰ সমষ্টি, আসনৰ অংকক প্রাধান্য দিয়ে। এইক্ষেত্রত বিৰোধী দলে বিজেপিৰ পৰা শিকিবলগীয়া আছে।

বিজেপিয়ে নির্বাচনত জিকিবলৈ সক্ষমতা নথকা দল কিছুমানকো যথেষ্ট মর্যাদা দি এন ডি এৰ অংশীদাৰ কৰি ৰাখিছে। এনেকুৱা দলৰ নেতাক আনকি কেন্দ্ৰীয় মন্ত্রিত্বও দিছে। 'ৰিপাব্লিকান পার্টি অব্ ইণ্ডিয়া' তাৰ প্ৰকৃষ্ট উদাহৰণ। কেৱল অসমতে নহয়, সমগ্র দেশৰ বিজেপি-বিৰোধী শক্তিবোৰৰ ক্ষেত্ৰত একেই অৱস্থা। দিল্লীৰ নিৰ্বাচনত 'আপ'ৰ আৰু কেইখনমান আসন বাঢ়িলহেঁতেন, যদিহে কংগ্ৰেছৰ লগত বুজাবুজিৰে নির্বাচনত অৱতীৰ্ণ হ'ব পাৰিলেহেঁতেন। হাৰিয়ানাতো তেনেকুৱা মানসিকতাৰ পৰিণামেই ভুগিলে বিৰোধীয়ে। লগ হ'লেই যে জিকিব তেনেকুৱা কথাও নির্বাচনত নেখাটে। কিন্তু ঐক্যবদ্ধ হৈ যুঁজিব পাৰিলে বেলেগ ধৰণৰ বাৰ্তা এটা জনসাধাৰণৰ মাজলৈ যায়।

'কোৱালিশ্যন' অথবা ঐক্যৰ ৰাজনীতি কৰাটো বাধ্যতামূলক নহয়। দলবোৰে নিজস্বভাৱে নিৰ্বাচন আয়োগত নাম পঞ্জীয়ন কৰিছে, নিজা আদর্শ আছে, উদ্দেশ্য আছে, লক্ষ্য আছে; গতিকে নিজা নিজাকৈ নির্বাচন খেলিবই পাৰে। কিন্তু হাঁহি উঠা কথাটো হ'ল 'ঐক্য'ৰ কথা এই ৰাজনৈতিক দলবোৰে নিজেই কৈ থাকে, নিজেই মাজে মাজে সভা-সমিতি পাতি ঐক্যৰ নাটক মঞ্চস্থ কৰে। তাৰ পাছত যদি নিজে ভবামতে কথাবোৰ আগনাবাঢ়ে তেতিয়া 'একলা চল ৰে'ৰ বিননি তোলে! এই নাটকবোৰ দেখি দেখি সাধাৰণ মানুহৰ মনত স্বাভাৱিকভাৱেই সন্দেহৰ উদ্রেক ঘটে- কাৰ 'ডাইৰেকশ্যন'ত বা এওঁলোকে ভাও দি আছে!

Share This