ধন-ধান্য

Dainik janambhumi July 23, 2025

দৈনিক জনমভূমি : প্রধানমন্ত্রী নৰেন্দ্ৰ মোদীৰ অধ্যক্ষতাত বহা কেন্দ্রীয় কেবিনেটৰ এখন বৈঠকে কেইদিনমান পূর্বে এখন নতুন অভিলাষী কৃষি আঁচনিত অনুমোদন জনায়। আঁচনিখনৰ নাম 'প্রধানমন্ত্রী ধন-ধান্য কৃষি যোজনা'

 

সমগ্র দেশৰ কৃষি উৎপাদন কম হৈ থকা ১০০খন জিলাত ৰূপায়ণৰ লক্ষ্যৰে অনুমোদন জনোৱা এই আঁচনিখনত বছৰি ২৪ হাজাৰ কোটি টকা খৰচ কৰা হ'ব আৰু এই ব্যয় একেৰাহে ছবছৰ কৰা হ'ব। তাৰ বিপৰীতে আঁচনিখনৰ লক্ষ্য হৈছে দেশত কৃষি উৎপাদন বৃদ্ধি কৰা। ১১টা বিভাগৰ অধীনত ইতিমধ্যে থকা ৩৬খন আঁচনিৰ সমন্বয় সাধন কৰি এই নতুন অভিলাষী আঁচনিখন ৰূপায়ণৰ চিন্তা কৰা হৈছে। ইয়াৰ অধীনত গঠন হ'ব লগা 'জিলা ধন-ধান্য সমিতি'বিলাকে কেন্দ্ৰৰ 'প্রধানমন্ত্রী কৃষি সন্মান নিধি আঁচনি', 'প্রধানমন্ত্রী ফচল বীমা যোজনা'কে ধৰি ৰাজ্যিক পৰ্যায়ৰ অন্যান্য আঁচনিৰো সমন্বয় ঘটাই কৃষি উৎপাদন বৃদ্ধিৰ এক নতুন পৰিৱেশ ৰচনা কৰাই হৈছে কেন্দ্ৰীয় চৰকাৰৰ লক্ষ্য। অহা অক্টোবৰ মাহত ৰবি শস্যৰ বতৰত আৰম্ভ কৰা হ'ব এই আঁচনিখনৰ ৰূপায়ণ। সমগ্র দেশতে যাতে কৃষি উৎপাদনৰ এটা সমতা ৰক্ষা হয় তাৰ বাবে চেষ্টা কৰিব চৰকাৰে।

 

জিলাভিত্তিক আঁচনিৰ জৰিয়তে শস্যাৱর্তন, জল সংৰক্ষণ, শস্য স্বাস্থ্য, কৃষি ক্ষেত্ৰত স্ব-নিৰ্ভৰশীলতা অর্জন তথা আনুষংগিক বিষয়বোৰৰ ৰাষ্ট্ৰীয় লক্ষ্যত উপনীত হ'ব পৰা যায় তাৰ বাবে এই ধন-ধান্য কৃষি আঁচনিখনত ১১৭টা সূচক নির্ধাৰণ কৰা হৈছে। মাহেকৰ মূৰত এই সূচকসমূহত উপনীত হোৱাত জিলা সমিতিসমূহ কিমান সফল হৈছে তাৰ পৰ্যবেক্ষণ কৰি থকা হ'ব।

 

প্রথমাৱস্থাত দেশৰ ১.৭ কোটি কৃষক এই আঁচনিৰ জৰিয়তে উপকৃত হ'ব বুলি ধাৰণা কৰা হৈছে। শস্যৰ উৎপাদন বৃদ্ধিয়েই নহয়, উৎপাদিত শস্য যাতে নষ্ট হৈ নাযায় তাৰ বাবে পঞ্চায়ত আৰু ব্লক পর্যায়ত শস্য সংৰক্ষণ ভঁৰালৰ সুবিধা বৃদ্ধিৰ চিন্তাও আঁচনিখনে কৰিছে। দেশৰ কৃষি ক্ষেত্ৰত নতুন উদ্দীপনা সঞ্চাৰৰ লক্ষ্য থকা এই আঁচনি দেশবাসীৰ বাবে নিশ্চিতভাৱে প্রত্যাশিত, কিন্তু দেখা যায় যে আঁচনিবিলাকৰ ৰূপায়ণত জড়িত কিছুমান পক্ষৰ হেমাহি, চৰকাৰে ধন মুকলি কৰি দিয়াৰ পাছতো কৃষকলৈ উক্ত পুঁজি মোকলাই দিয়াৰ ক্ষেত্ৰত হোৱা অনিয়ম, আন্তঃগাঁথনি শক্তিশালী নকৰাকৈ আঁচনি ৰূপায়ণৰ টোগলকী পদক্ষেপ, সংশ্লিষ্ট বহুতৰ সততা, নিষ্ঠা আৰু দায়বদ্ধতাৰ অভাৱ আদি বিভিন্ন কাৰণে বহু আঁচনিৰ প্রত্যাশিত ফল পোৱা নাযায়। 'প্রধানমন্ত্রী কৃষি সিঁচাই যোজনা', 'ৰাষ্ট্ৰীয় কৃষি বিকাশ যোজনা', 'ৰাষ্ট্ৰীয় কৃষি বজাৰ (ই-এন এ এম)' আদি এসময়ত গুৰুত্ব দি আৰম্ভ কৰা আঁচনি পাছত প্রায় পৰিত্যক্ত হ'ল এনেবোৰ কাৰণতে। 'প্রধানমন্ত্রী কৃষক সন্মান নিধি' আঁচনিখনক লৈ অসমত হোৱা ব্যাপক জালিয়াতিৰ কথা খোদ 'কেগ'ৰ প্ৰতিবেদনতে উন্মোচিত হৈছে। এই আঁচনিত ধন লাভ কৰা ৰাজ্যৰ ৩৫ শতাংশ কৃষকেই আছিল ভুৱা আৰু এওঁলোকক আগবঢ়োৱা ধনৰ ০.২৪ শতাংশহে ওভতাই আনিব পাৰিলে চৰকাৰে।

 

এতিয়া 'প্রধানমন্ত্রী ধন-ধান্য কৃষি যোজনা'খন নিশ্চয় অসমৰো কেইখনমান জিলাত ৰূপায়ণ হ'ব। এই আঁচনিখনৰ ৰূপায়ণ যাতে সঠিকভাৱে হয়, উপযুক্ত কৃষকে ইয়াৰ সুবিধা লাভ কৰে আৰু প্রত্যাশা কৰা মতে কৃষি উৎপাদন বৃদ্ধিত ৰাজ্যখনে সামান্য লাভ কৰিব পাৰে তাক নিশ্চিত কৰাৰ দায়িত্ব থাকিব ৰাজ্য চৰকাৰৰ, বিশেষকৈ কৃষি বিভাগৰ ওপৰত। এইখিনিতে এটা কথা উল্লেখ কৰা প্রয়োজন যে নৰেন্দ্ৰ মোদীয়ে দেশৰ প্ৰধানমন্ত্ৰীৰ দায়িত্ব প্রথমবাৰ গ্ৰহণ কৰাৰ কিছুদিনৰ পাছতে কৈছিল- অসম তথা উঃ-পূর্বাঞ্চল দেশৰ 'অর্গেনিক হাব' হ'ব পাৰে। প্রধানমন্ত্রীয়ে হয়তো সঠিকভাৱেই অনুধাৱন কৰিছিল যে জৈৱিক শস্য উৎপাদনৰ এখন উৰ্বৰা ক্ষেত্ৰ পৰি আছে অসম তথা উঃ-পূবত। প্রধানমন্ত্রীৰ সেই দৃষ্টিভংগীক সামগ্রিকভাৱে বাস্তৱায়িত কৰাৰ ক্ষেত্ৰত ইয়াৰ কৃষকসকলেও কোনো ভূমিকা পালন কৰা পৰিলক্ষিত হোৱা নাই, ৰাজ্য চৰকাৰসমূহেও কোনো আঁচনি গ্রহণ কৰা নাই। আমাৰ মুখ্যমন্ত্ৰীয়েও আচলতে কেন্দ্ৰীয় চৰকাৰৰ অনুৰূপ ধৰণে অসমতো এখন নিজাববীয়া 'ধন-ধান্য কৃষি যোজনা' গ্রহণ কৰি অসমক এখন 'অর্গেনিক হাব'ত পৰিণত কৰাৰ প্ৰধানমন্ত্ৰীৰ আহ্বানক ৰূপায়ণ কৰাৰ লগতে ইয়াত বছৰৰ বেছিভাগ সময় খিলঞ্জীয়া লোকৰ কৃষিভূমিসমূহ অব্যৱহৃত হৈ পৰি থকা পৰম্পৰাটো ৰোধ কৰিবলৈ এক সমন্বিত ব্যৱস্থা গ্রহণ কৰিব পাৰে। সম্প্রতি ৰাজ্যত উচ্ছেদ অভিযান চলি আছে। নিজৰ বসতিস্থলৰ পৰা ৪০০ কিঃমিঃ পর্যন্ত আগবাঢ়ি গৈ বাংলাদেশীমূলৰ লোকে উজনি অসমৰ ভূমি বেদখল কৰা বুলি মুখ্যমন্ত্রীয়েই তথ্য প্রকাশ কৰিছে। এনেদৰে ভূমি আগ্রাসনৰ মূল কথাটোৱেই হ'ল- উন্মুক্ত হৈ থকা কৃষি ভূমি ব্যৱহাৰত স্থানীয় খিলঞ্জীয়া লোকৰ অনীহা। নিজৰ ভূমিৰ ওপৰত খিলঞ্জীয়াৰ কর্তৃত্ব প্রতিষ্ঠা কৰিবলৈও আচলতে জাতীয় কৃষি আন্দোলন এটাৰ প্ৰয়োজন হৈছে। পুলিচ প্রশাসন লগাই খিলঞ্জীয়া ভূমি কিমান দিনলৈ মুখ্যমন্ত্ৰীয়ে ৰক্ষা কৰিব বা পহৰা দি থাকিব পাৰিব! আগতেও বহুবাৰ এই স্তম্ভতে কৈ অহা হৈছে যে অসমৰ খিলঞ্জীয়া জাতি-জনগোষ্ঠীসমূহক ৰক্ষা কৰিবলৈ হ'লে ভেটি-মাটিৰ উপযুক্ত ব্যৱহাৰ কৰিব পাৰিব লাগিব। ইয়াৰ বাবে কৃষিয়েই একমাত্র বিকল্প। 'প্রধানমন্ত্রী ধন-ধান্য কৃষি যোজনা'ত স্থানীয় কৃষি সমবায়সমূহক জড়িত কৰাৰ কথাও কোৱা হৈছে। অসমতো গাঁৱে-ভূঞে কৃষি সমবায় গঠন কৰি জৈৱিক কৃষিৰ এক গণ আন্দোলন গঢ়ি তুলি জাতিটোৰ ৰূপান্তৰৰ এক পথ ৰচনা কৰিব পৰা যায়। অসমৰ অৰ্থনৈতিক বিকাশৰ বাবে 'এডভান্টেজ আছাম'ৰ জৰিয়তে বিশাল বিনিয়োগৰ বাবে দেহেকেহে খাটি থকা মুখ্যমন্ত্রীয়ে এই দিশটোকো গুৰুত্ব দিব বুলি আশা কৰোঁ। সেয়াও 'ধন-ধান্য' অসম গঢ়াৰ পণ হ'ব পাৰে।

Share This