প্রতিবেদনৰ সীমাবদ্ধতা

dainik janambhumi February 21, 2025

ডিজিটেল ডেস্ক: বহুচৰ্চিত বিপ্লৱ কুমাৰ শৰ্মা আয়োগৰ প্ৰতিবেদন অৱশেষত অসম বিধানসভাত উত্থাপন হ'ল। অসম লোকসেৱা আয়োগৰ অধ্যক্ষ ৰাকেশ পালৰ কাৰ্যকালত, লোকসেৱা আয়োগৰ অধীনত বিভিন্ন বিভাগৰ বিষয়াৰ বাবে যি প্রতিযোগিতামূলক পৰীক্ষা অনুষ্ঠিত হয়, সেই পৰীক্ষাত চূড়ান্ত অনিয়ম, দুর্নীতি, স্বজন-তোষণৰ আভিযোগ উঠিছিল। তৎকালীন মুখ্যমন্ত্ৰী তৰুণ গগৈয়ে প্রথমে পালক লোকসেৱা আয়োগৰ সদস্য আৰু পৰৱৰ্তী কালত অধ্যক্ষ নিযুক্তি দিছিল। ৰাকেশ পালে দায়িত্ব লৈয়েই সমগ্র নিযুক্তি প্রক্রিয়াতে সচেতনভাৱেই অনিয়ম সংঘটিত কৰিবলৈ আৰম্ভ কৰে। এটা পর্যায়ত ই চৰমসীমা পায়গৈ। ক্ষমতাত থকা চৰকাৰে ৰাকেশ পালৰ বিৰুদ্ধে উত্থাপিত অভিযোগসমূহক বিশেষ গুৰুত্ব নিদিলে। এই অনিয়মৰ নানা তথ্য-পাতি সংবাদ মাধ্যমেও পোহৰলৈ আনিলে। কৃষক মুক্তি সংগ্ৰাম সমিতিকে ধৰি আন কিছু সংগঠনেও প্রতিবাদ কৰিলে। 

কৃষক মুক্তিৰ ৰাকেশ পাল-বিৰোধী আন্দোলনে তীব্ৰ ৰূপ ল'লে। বিষয়টো অৱশেষত ন্যায়ালয়ৰ মজিয়ালৈ আহিল। দুর্নীতিৰ তথ্য যাতে নষ্ট কৰিব নোৱাৰে সেইবাবে হৈ যোৱা পৰীক্ষাৰ উত্তৰবহীসমূহ নষ্ট নকৰিবলৈ নিৰ্দেশ দিবলৈ কৃষক মুক্তি সংগ্রাম সমিতিয়ে উচ্চ ন্যায়ালয়ৰ পৰা আয়োগলৈ নিৰ্দেশ দিয়াৰ ব্যৱস্থা কৰে। কিছু তথ্য নষ্ট কৰাৰ পাছত এই নির্দেশ জাৰি হোৱাত বাকী তথ্য অক্ষত ৰখাত সহায় কৰে আৰু তদন্ততো বিশেষ গতি দিয়ে। ন্যায়ালয়ৰ পৰামৰ্শৰ ভিত্তিতে সোণোৱাল চৰকাৰৰ দিনত গুৱাহাটী উচ্চ ন্যায়ালয়ৰ অৱসৰপ্ৰাপ্ত মুখ্য ন্যায়াধীশ বিপ্লৱ কুমাৰ শর্মাক লৈ এখন ন্যায়িক আয়োগ গঠন হয়। এ পি এছ চি কেলেংকাৰিৰ বিভিন্ন দিশ অনুসন্ধান কৰি এই আয়োগে চৰকাৰক প্ৰতিবেদন দাখিল কৰে। বৰ্তমানৰ চৰকাৰে এই প্রতিবেদন কোনো অজ্ঞাত কাৰণত ইমানদিনে অসম বিধানসভাত দাখিল কৰা নাছিল। এতিয়া কৰিলে। বহুতো বিস্ফোৰক তথ্য আৰু পৰ্যবেক্ষণত সন্নিৱষ্ট হোবা এই প্রতিবেদন আচলতে বহুক্ষেত্রত অসম্পূর্ণ হৈ ৰ'ল। মূল অভিযুক্তসকলৰ এজন আছিল অধ্যক্ষ ৰাকেশ পালৰ ভ্ৰাতৃ। তেওঁ নিজৰ প্ৰেছত নকলবহী প্রস্তুত কৰি, একাংশ প্রার্থীক পুনৰ লিখনৰ সুবিধা দিছিল। কেৱল সংযুক্ত প্রতিযোগিতামূলক পৰীক্ষাতে নহয়, বিদ্যালয় পৰিদৰ্শক, চিকিৎসক-অভিযন্তা-পশু চিকিৎসক আদি আয়োগৰ পৰিসৰত পৰা সকলোধৰণৰ পদৰ নিযুক্তিতে অনিয়ম সংঘটিত কৰিছিল। ৰাকেশ পালৰ গ্ৰেপ্তাৰৰ পাছতে তেওঁৰ ভ্রাতৃ অন্তর্ধান হ'ল। আৰক্ষীয়ে তেওঁক এই পর্যন্ত গ্ৰেপ্তাৰ কৰিব পৰা নাই বা কোনো সূত্ৰও উদ্ধাৰ কৰিব পৰা নাই। এই কেলেংকাৰিৰ তদন্তৰ ৰাকেশ ভ্রাতৃ এক অবিচ্ছেদ্য অংগ। তেওঁক গ্ৰেপ্তাৰ নকৰাকৈ, জেৰা নকৰাকৈ এই তদন্ত সম্পূৰ্ণ হ'ব নোৱাৰে। আৰক্ষীয়ে কেৱল পলাতক বুলি কৈয়েই দায়িত্ব সামৰিছে। অত বছৰে এটা ডাঙৰ কেলেংকাৰিৰ এজন অভিযুক্ত নিখোজ হৈ থকাটো ৰহস্যজনক হৈ পৰিছে। আন এজন অভিযুক্ত দীর্ঘকাল নিৰুদ্দেশ হৈ থকা ডাঃ মৃগেন শইকীয়াই আত্মপ্রকাশ কৰিছিল। আৰক্ষীৰ আৰু তদন্তৰ আওতাৰ পৰা হাত সাৰিবলৈ তেওঁ এই কেলেংকাৰিৰ ৰাজসাক্ষী হ'বলৈ ইচ্ছা কৰিছিল। কিন্তু ৰাজসাক্ষী হ'বলৈ জনোৱা তেওঁৰ আৱেদন ক্ৰমে উচ্চ আৰু উচ্চতম ন্যায়ালয়ত নাকচ হৈছিল। এতিয়া এই মৃগেন শইকীয়াৰ সাক্ষ্যৰ তদন্তত এটা ভূমিকা দেখা গৈছে। যিটো বহু ক্ষেত্ৰত ৰহস্যজনক হৈ পৰিছে। এই তদন্তৰ পৰিসৰত অন্তৰ্ভুক্ত হ'ব লগা কিছু বিষয় বাদ পৰিছে। সেইফালৰ পৰা এই প্রতিবেদনক কোনোমতেই সম্পূর্ণ তদন্তৰ প্ৰতিবেদন আখ্যা দিবলৈ অসুবিধা। বৰঞ্চ এই প্রতিবেদনে সত্যৰ সন্ধান দিয়াতকৈ ৰাজনৈতিক দলসমূহৰ মাজত পৰস্পৰলৈ দায় ঠেলা-ঠেলিৰ খেল এখনহে খেলাৰ সুযোগ দিলে।

অসমৰ ৰাজনীতিৰ পথাৰখনত যোৱা কিছুবছৰ ধৰি নিৰ্দিষ্ট কেইজনমান লোকেই সকলো পৰিচালনা কৰি আছে। দল লাগে কংগ্রেছেই ক্ষমতাত থাকক নাইবা বিজেপিয়েই থাকক। যি সময়ত ৰাকেশ পালক অসম লোকসেৱা আয়োগৰ সদস্য অধ্যক্ষ পদত নিযুক্তি দিয়া হৈছিল সেই সময়ত কোন মুখ্যমন্ত্ৰীৰ ঘনিষ্ঠ আছিল, কাৰ ৰাকেশ পালৰ লগতো সম্পৰ্ক আছিল, সেইবোৰ বিষয় মানুহৰ মুখে মুখে, কিন্তু তদন্তত সেইবোৰ দিশ লুকাই থাকিল। তদুপৰি ৰাকেশ পালে সেই সময়ত একাংশ বিজেপি নেতা-কর্মীকো সন্তুষ্ট কৰিছিল, তেওঁলোকৰ আত্মীয়কো চাকৰি দিছিল সেই কথাও তৎকালীন সংবাদ-পত্রত প্রকাশ পাইছিল। সেইফালৰ পৰা পাল অতি দ পানীৰ মাছ যেন লাগে। অসম লোকসেৱা আয়োগৰ দৰে এটা সাংবিধানিক মর্যাদাসম্পন্ন প্রতিষ্ঠানক তেওঁ কলংকিত কৰি এৰা নাই, অসমৰ ৰাজনৈতিক দলসমূহৰ মাজত এখন খোৱা-কামোৰা খেল চলাই থকাতো তেওঁ সফল হৈছে। বিপ্লৱ শৰ্মা আয়োগৰ প্ৰতিবেদনত অসম লোকসেৱা আয়োগৰ ২০১৩ আৰু ২০১৪ বৰ্ষৰ বাছনী আৰু নিযুক্তি প্রক্রিয়াত সংঘটিত হোৱা ব্যাপক অনিয়মৰ কথাও কোৱা হৈছে। উল্লিখিত দুটা বৰ্ষৰ প্ৰাৰ্থী নিযুক্তি বাতিল কৰিবলৈ পৰামৰ্শ দিয়া হৈছে। শৰ্মা আয়োগৰ প্ৰতিবেদন বিধানসভাত দাখিল কৰাৰ পাছত এই বিষয়টোৱেও গুৰুত্ব পাব লাগিব। বৰ্তমানৰ চৰকাৰে এই বিষয়তো স্থিতি স্পষ্ট কৰিব লাগিব। তদুপৰি অলপতে ওঠৰজন প্ৰাৰ্থীৰ ক্ষেত্ৰত বিশেষ তদন্ত গোেট গঠন কৰি অনুসন্ধান কৰা, তাৰ পাছত উচ্চ ন্যায়ালয়ৰ তদন্তত স্থগিতাদেশ আদায় কৰাসকলৰ ক্ষেত্ৰতো কেনে ব্যৱস্থা কৰে সেইটো লক্ষণীয় হৈ উঠিব। ৰাকেশ পালে তৎকালীন কংগ্ৰেছ চৰকাৰৰ বহুজনক নানা অনুগ্ৰহ কৰিছিল সেই কথা ঠিক, কিন্তু এজন বিজেপি-নেতাৰ পৰিয়ালৰো পাঁচজনে নিযুক্তি পোৱাৰ তথ্য সংবাদ মাধ্যমত আলোচিত হৈছিল। যিবোৰ বিষয় ইতিমধ্যে অনুসন্ধানৰ অন্তৰ্ভুক্ত নহ'ল- সেইবোৰক সামৰি নল'লে তদন্ত সম্পূৰ্ণ নহ'ব।

Share This