এক ৰাষ্ট্ৰ, এক সময় আৰু অসম

Dainik janambhumi February 10, 2025

ডিজিটেল ডেস্ক: কেন্দ্ৰীয় চৰকাৰে 'এক ৰাষ্ট্ৰ, এক সময়'ৰ লক্ষ্যৰে দেশৰ সময় মণ্ডল সংশোধনীৰ এক উদ্যোগ লৈছে। এই অনুসৰি কেন্দ্ৰীয় চৰকাৰৰ উপভোক্তা মন্ত্র্যালয়ে নেশ্যনেল ফিজিকেল লেবৰেটৰী (এন পি এল) আৰু ইছৰ'ৰ সহযোগত এক বিস্তৃত খচৰা প্ৰস্তুত কৰিছে। দ্য লিগেল মেট্ৰ'লজি (ইণ্ডিয়ান ষ্টেণ্ডার্ড টাইম) ৰুল-২০২৫ খচৰাৰ প্ৰধান উদ্দেশ্য হৈছে ভাৰতীয় মান সময় (আই এছ টি) মিলি ছেকেণ্ড আৰু মাইক্ৰ'ছেকেণ্ড পর্যায়ত নিখুঁতকৈ ৰূপায়ণ কৰা আৰু দেশৰ সময় নির্ধাৰণ ব্যৱস্থাৰ বাবে প্রয়োজনীয় আইনী প্রক্রিয়া প্রস্তুত কৰা। সেই অনুসৰি আইনগত, প্রশাসনিক, ব্যাৱসায়িক বা চৰকাৰী সকলো কাম-কাজ এই আইন বলৱৎ হোৱাৰ পাছৰ পৰা ভাৰতীয় ষ্টেণ্ডাৰ্ড টাইম অনুসৰি পৰিচালিত হ'ব। যোৱা ১৫ জানুৱাৰীত উপভোক্তা মন্ত্ৰ্যালয়ৰ ৱেবছাইটত এই খচৰা ৰাইজৰ বাবে প্রকাশ হৈছে আৰু এই সম্পর্কত কিবা মতামত, পৰামৰ্শ থাকিলে ১৪ ফেব্ৰুৱাৰীৰ ভিতৰত জনাবলৈ কৈছে।

জানিব পৰা মতে, এই এক ৰাষ্ট্ৰ, এক সময় ব্যৱস্থা বলৱৎ হ'লে বিত্তীয়, বাণিজ্য, আইন, পৰিবহণ, প্রশাসন আদি সকলো ক্ষেত্রত 'আই এছ টি' ব্যৱহাৰ বাধ্যতামূলক হ'ব আৰু ই চাইবাৰ সুৰক্ষাকে ধৰি বিভিন্ন ক্ষেত্ৰত অধিক বিশ্বাসযোগ্য হ'ব। দূৰ সংযোগ, বেংকিং, প্ৰতিৰক্ষা, পৰিবহণ আদিৰ দৰে ক্ষেত্ৰসমূহত প্রযুক্তি ব্যৱহাৰত সঠিক সময়ৰ অতি গুৰুত্বপূৰ্ণ। এনে ক্ষেত্ৰসমূহত সময়ৰ সামান্য হেৰ-ফেৰত বৃহৎ লোকচান আৰু দুৰ্ঘটনাৰো আশংকা থাকে। এই নীতিৰ সমৰ্থকসকলৰ মতে যি দেশত এটাতকৈ অধিক সময় মণ্ডল থাকে, তেনেক্ষেত্ৰত মানৱীয় ভুলৰ বাবে ৰে'ল আৰু বিমানৰ ভয়াৱহ দুৰ্ঘটনা হোৱাৰ আশংকা থাকে। আপাত দৃষ্টিত এইখিনিলৈকে কথাখিনি ঠিকেই। কিন্তু উল্লেখযোগ্য কথাটো হ'ল অসমকে ধৰি উত্তৰ-পূৰ্বাঞ্চলৰ কেইবাখনো ৰাজ্যই দীর্ঘদিন ধৰি পৃথক সময় মণ্ডলৰ দাবী তুলি আহিছে। এই দাবী কোনো বিচ্ছিন্নতাবাদী বা ৰাজনৈতিক দাবী নহয়, এই দাবী সম্পূর্ণৰূপে বিজ্ঞানসন্মত আৰু বাস্তৱ ভিত্তিসম্পন্ন। এই দাবীৰ মূল ভিত্তি হ'ল দেশৰ আন অংশৰ তুলনাত পূর্বাঞ্চলত সূর্যোদয় আৰু সূর্যাস্ত সোনকালে হয়। সেয়ে স্থানীয় পৰিৱেশৰ ওপৰত ভিত্তি কৰি সময় নির্ধাৰণ হোৱা উচিত। ইয়াৰ ফলত এই অঞ্চলৰ মানুহৰ কৰ্মৰ সময়, দক্ষতা বৃদ্ধি হোৱাৰ লগতে বিদ্যুতৰ ব্যৱহাৰো ৰাহি হ'ব। 

কিন্তু বাস্তৱিকতে সমগ্ৰ ভাৰতে গ্ৰহণ কৰাৰ দৰে এলাহাবাদ টাইম জ'ন অনুসৰণ কৰাৰ ফলত অসম তথা উত্তৰ-পূৰ্বাঞ্চলত পুৱাৰ কৰ্মৰ সময় বহুখিনি অপচয় হৈছে। শীতকালৰ কোনোবা এটা দিনত গুৱাহাটীত যদি সূর্যোদয় হৈছে পুৱা ৬ বজাত, তেনেহ'লে সেই একেই দিনত প্রায় ৩ হাজাৰ কিল'মিটাৰ আঁতৰত থকা পশ্চিম প্রান্তৰ আহমেদাবাদত সূর্যোদয় হৈছে ৭ বাজি ২০ মিনিটত। সেইদৰে আহমেদাবাদত ৬ বাজি ২০ মিনিটত সূর্যাস্ত হোৱাৰ দিনা গুৱাহাটীত সূর্যাস্ত হ'ব প্রায় ৫ বজাত। অর্থাৎ পুৱা সূর্যোদয় হোৱাৰ পৰা অফিচ-কাছাৰী খোলালৈ আমি বহু সময় ৰ'ব লাগিব আৰু বিপৰীতক্রমে সন্ধিয়া হোৱাৰ পাছতো অফিচ-কাছাৰীৰ কাম চলি থাকে। এই ছবিখনে স্পষ্ট কৰি দিয়ে ভাৰতীয় মান সময় অনুসৰণ কৰাৰ বাবে প্রতিদিনে আমি কিমান কর্ম সময় অপচয় কৰোঁ। সেয়ে হয়তো তাহানিৰ ইংৰাজসকলে চাহ বাগিচাত 'বাগান টাইম' প্রচলন কৰি কৰ্মৰ সময় সঠিক ৰূপত ব্যৱহাৰ কৰিছিল। 

২০১২ চনত নেশ্যনেল ইনষ্টিটিউট অব্ এডভান্স ষ্টাডিছৰ এক প্রতিবেদনত উল্লেখ কৰা হৈছিল যে পূর্বাঞ্চলৰ বাবে ৩০ মিনিট সময় আগুৱাই দিলেই বছৰি ২.৭ বিলিয়ন ইউনিট বিদ্যুৎ ৰাহি কৰিব পৰা যাব। প্রধানতঃ এই যুক্তিৰ ভিত্তিতে প্রথিতযশা চলচ্চিত্র নির্মাতা জাহ্নু বৰুৱা, অসমৰ প্ৰাক্তন মুখ্যমন্ত্ৰী তৰুণ গগৈ, অসমৰ বৰ্তমানৰ মুখ্যমন্ত্রী ড° হিমন্ত বিশ্ব শর্মা, অৰুণাচলৰ মুখ্যমন্ত্ৰী পেমা খাণ্ডুকে আদি কৰি বহু বিশিষ্ট ব্যক্তিয়ে বিভিন্ন সময়ত অসম তথা উত্তৰ-পূৰ্বাঞ্চলৰ বাবে সুকীয়া সময় মণ্ডলৰ দাবী তুলি আহিছে। কেন্দ্ৰীয় চৰকাৰেও কেতিয়াবা বিষয়টো একেবাৰে অগ্রাহ্য কৰিছিল আৰু কেতিয়াবা বিষয়টোৰ প্ৰতি মোলায়ম হৈছিল যদিও কাৰ্যকৰী নহ'ল। বিষয়টো কাৰ্যকৰী নকৰাৰ সপক্ষে অজুহাত অনেক আছে বা থাকিব পাৰে। কিন্তু একে সময়তে আমি পাহৰি গ'লে নহ'ব আমি সততে উন্নত ৰাষ্ট্ৰ বুলি আগ্ৰহেৰে লক্ষ্য কৰা আমেৰিকাত কিন্তু সময় মণ্ডল ১১টা। ফ্রান্স আৰু এখোপ চৰা, ফ্ৰান্সত ১২টা। ৰাছিয়াতো ১১টা। অষ্ট্ৰেলিয়াত আছে ৮টা মণ্ডল। কানাডাত ৬টা। বিশ্বৰ আন কেইবাখনো দেশতো আছে সূর্যোদয় আৰু সূর্যাস্তৰ পার্থক্য অনুসৰি ভিন ভিন সময় মণ্ডল। আমেৰিকাৰ চিনেটে ২০২২ চনত ছান ছাইন প্রটেকশ্যন এক্ট গ্রহণ কৰি দিনৰ সময় অধিক ব্যৱহাৰ কৰিবলৈ বছৰত দুবাৰ ঘড়ীৰ সময় সলনি কৰাতো আনকি অনুমতি দিছে।

এই কথাও ঠিক যে বিশ্বৰ অধিকাংশ দেশতে এটা সময় মণ্ডলেই অনুসৰণ কৰা হয়। কিন্তু কথা হ'ল বিশ্বৰ অধিকাংশ দেশেই আমাৰ দেশৰ দৰে ভৌগোলিকভাৱে বৃহৎ নহয়। বহু দেশৰ বাবে প্রয়োজনীয় নহ'লেও ভাৰতৰ দৰে ভৌগোলিকভাৱে বৃহৎ দেশ এখনত একাধিক সময় মণ্ডল প্রয়োজনীয় যেন অনুভৱ হয়। একাধিক সময় মণ্ডলৰ নিশ্চয় কিছু অসুবিধা আছে, কিন্তু বিশ্বৰ বহু উন্নত দেশে যদি সেই অসুবিধাসমূহ দূৰ কৰি ইয়াৰ সুবিধাসমূহ গ্ৰহণ কৰিব পাৰিছে আমিনো নোৱাৰিম কিয়? বিশেষকৈ বিদ্যুৎ ৰাহি আৰু সূৰ্যৰ পোহৰৰ অধিক ব্যৱহাৰ এতিয়া পৃথিৱীজুৰি এটা প্ৰাসংগিক বিষয়।সেয়ে উত্তৰ-পূবৰ বাবে পৃথক সময় মণ্ডলৰ দাবীটো দিল্লীৰ একাধিপত্য চলাবৰ চেষ্টাৰ দৰে ৰাজনৈতিক বিষয় নহৈ বিজ্ঞানসন্মত কাৰ্যকৰী বিষয় হওক।আমাৰ দল-সংগঠনসমূহেও বিষয়টোত গুৰুত্ব দি ১৪ ফেব্ৰুৱাৰীৰ পূৰ্বে মতামত আগবঢ়োৱাৰ সুবিধা গ্ৰহণ কৰক।

Share This