ভয়ংকৰ ব্যাধি

Dainik janambhumi February 22, 2025

ডিজিটেল ডেস্ক: ভাৰতবৰ্ষত প্রতিদিনে উদ্বেগজনকভাৱে বৃদ্ধি পাইছে আত্মহননৰ ঘটনা। কোনোৱে যদি পৰীক্ষাত আশানুৰূপ ফল নোপোৱাৰ আশংকাত, আন কোনোবাই প্রেমত ব্যর্থতা, পাৰিবাৰিক অশান্তি, আর্থিক দীনতাকে ধৰি বিভিন্ন কাৰণত আত্মহননৰ পথ বাছি লৈছে। ২০২২ বৰ্ষত আমাৰ দেশত ১,৭১,০০০ টা আত্মহত্যাৰ ঘটনা সংঘটিত হৈছে। ২০২১ বর্ষতকৈ এই সংখ্যা ৪.২ শতাংশ অধিক। ২০২০ বর্ষত ভাৰতত ১,৫৩,০০০টা আত্মহত্যাৰ ঘটনা সংঘটিত হৈছিল আৰু ২০২১ বর্ষত এই সংখ্যা ৭.২ শতাংশ বৃদ্ধি পায়। 

ৰাষ্ট্ৰীয় অপৰাধ ৰেকৰ্ড ব্যুৰ' (এন চি আৰ বি)ৰ তথ্য অনুসৰি ২০১৮ বৰ্ষৰ তুলনাত ২০২২ বৰ্ষত ভাৰতত আত্মহননৰ ঘটনা ২৭শতাংশ বৃদ্ধি পায় আৰু ই হৈছে বিশ্বৰ ভিতৰতে সৰ্বাধিক। ২০২২ বৰ্ষত দেশৰ ভিতৰতে সৰ্বাধিক আত্মহত্যাৰ ঘটনা সংঘটিত হোৱা ৰাজ্য আছিল ছিকিম। উক্ত বৰ্ষত ৰাজ্যখনত ২৯৩টা আত্মহত্যাৰ ঘটনা সংঘটিত হয়। ৪২.৮ শতাংশ আত্মহত্যাৰ ঘটনাৰে আন্দামান নিকোবৰ দ্বিতীয় স্থানত, ২৯.৭ শতাংশৰে পণ্ডিচেৰী তৃতীয় স্থানত থাকে। শেহতীয়াভাৱে ৰাজস্থান বিধানসভাত সদৰী হোৱা এক তথ্য অনুসৰি ৰাজ্যখনত এটা বৰ্ষত ক'চিং কৰি থকা ১৯ গৰাকী শিক্ষার্থীয়ে আত্মহত্যা কৰিছে। উল্লেখযোগ্য যে 'কোচিং কেপিটেল' অভিহিত ৰাজ্যখনৰ কোটা চহৰলৈ প্ৰতি বছৰে দেশৰ লাখ লাখ শিক্ষার্থী যায়। 'নীট', 'জে ই ই'ৰ দৰে প্ৰতিযোগিতামূলক পৰীক্ষাত অৱতীৰ্ণ হোৱাৰ বাবে ক'চিং কৰি থকা বহু শিক্ষার্থীয়ে বিগত বছৰসমূহত আত্মহত্যাৰ দৰে পন্থা বাছি লোৱা ঘটনাই এক ভয়ংকৰ দিশ উন্মোচন কৰিছে। শেহতীয়াভাৱে চলিত বৰ্ষৰ প্ৰথমটো মাহৰ ২২টা দিনত চহৰখনত অধ্যয়নৰত ৬জনকৈ শিক্ষার্থীয়ে আত্মহত্যা কৰা ঘটনাই সকলোকে চিন্তিত কৰিছে। ইয়াৰে মাজত অসমৰ এগৰাকী শিক্ষার্থীও আছে। ২০২৩ বর্ষত কোটাত ২৮ গৰাকী শিক্ষার্থী আৰু ২০২৪ চনত ১৬গৰাকীয়ে আত্মহননৰ পথ বাছি লৈছিল। আমাৰ ৰাজ্যতো আত্মহননৰ ঘটনাই প্রতিদিনে সংবাদ মাধ্যমৰ শিৰোনাম দখল কৰিছে। এন চি আৰ বিৰ প্ৰতিবেদনত প্রকাশিত তথ্য অনুসৰি বিগত কেইটামান বর্ষত অসমত উদ্বেগজনকভাৱে আত্মহত্যাৰ ঘটনা বৃদ্ধি হৈছে। ২০১৯ চনত ২৩৭০ টা আত্মহত্যাৰ ঘটনাৰ বিপৰীতে ২০২০ চনত এই সংখ্যা ৩২৪৩ লৈ বৃদ্ধি পায়। অর্থাৎ এটা বছৰত আত্মহত্যাৰ ঘটনা বৃদ্ধি পালে ৩৬.৮ শতাংশ। 

২০২১ বর্ষত এই সংখ্যা আছিল ৩৩০২ টা। এন চি আৰ বিয়ে প্রকাশ কৰা অনুসৰি পাৰিবাৰিক সমস্যা, শাৰীৰিক-মানসিক নির্যাতন, নিঃসংগতা, কেৰিয়াৰ তথা বৃত্তিৰ ক্ষেত্ৰত সন্মুখীন হোৱা সমস্যা, মানসিক উচ্ছৃংখলতা, ড্ৰাগছ-সুৰা আদিৰ প্ৰতি আসক্তি, আর্থিক লোকচান, দৰিদ্ৰতা, দুৰাৰোগ্য ব্যাধি, মানসিক চাপ, পৰীক্ষাত ব্যর্থতা, ব্যর্থ প্রেম আদি বিভিন্ন কাৰণত ভাৰতীয় লোকে আত্মহত্যা কৰে। দৰিদ্ৰতা, ঋণৰ বোজা আদিৰ বাবে দেশৰ ভিন্ন প্রান্তত আত্মহননৰ পথ বাছি লৈছে কৃষকসকলে। তথ্যসমূহৰ পৰা এইকথা পৰিলক্ষিত হৈছে যে কিশোৰ-কিশোৰী তথা যুৱক-যুৱতীসকলৰ মাজত আত্মহত্যাৰ প্ৰৱণতা অধিক। পঢ়া আৰু পৰীক্ষাৰ হেঁচা, পৰীক্ষাত সফল হ'ব নোৱৰা আদি কাৰণত ছাত্ৰ-ছাত্ৰীৰ মাজত এনেধৰণৰ ঘটনা অধিক হোৱা দেখা গৈছে। শিক্ষা ব্যৱস্থা পৰীক্ষাকেন্দ্ৰিক অথবা নম্বৰকেন্দ্ৰিক হোৱাৰ ফলত ছাত্ৰ-ছাত্ৰীৰ মাজত হতাশা বৃদ্ধি পাইছে। পৰীক্ষা আৰু নম্বৰক লৈ এক বৃহৎ অঘোষিত প্রতিযোগিতা অব্যাহত আছে আৰু এনে প্রতিযোগিতাৰ বলি হৈছে একাংশ শিক্ষার্থী। অতি শেহতীয়াভাৱে ১৮ ফেব্ৰুৱাৰীত এজন মেট্রিক পৰীক্ষার্থীয়ে আত্মহত্যা কৰে। ইয়াৰ কিছুদিন পূর্বে ২৫ জানুৱাৰীত মৰিগাঁৱত অষ্টম শ্ৰেণীৰ ছাত্ৰী এগৰাকীয়ে, ১৬ জানুৱাৰীত আৰ্য্য বিদ্যাপীঠ মহাবিদ্যালয়ত অধ্যয়নৰত গোলাঘাটৰ কাকডোঙাৰ এগৰাকী ছাত্ৰই গুৱাহাটীৰ ভাৰাঘৰত আত্মহত্যা কৰে। ১৯ ফেব্ৰুৱাৰীতো বিশ্বনাথ চাৰিআলিৰ এগৰাকী শিক্ষার্থীয়ে গুৱাহাটীত আত্মহত্যা কৰা ঘটনাই ৰাজ্য চৰকাৰকো উদ্বিগ্ন কৰি তুলিছে। চলিত বিধানসভাৰ অধিৱেশনতো সেয়ে আত্মহত্যাৰ বিষয়টোৱে স্থান লাভ কৰে। 

বিজেপি বিধায়ক মৃণাল শইকীয়াই আত্মহত্যাৰ বিষয়টোক লৈ বিশেষ প্রসংগ উত্থাপন কৰে। বিষয়টো সন্দৰ্ভত ৰাজ্যৰ স্বাস্থ্য মন্ত্রী অশোক সিংহলে দাঙি ধৰা তথ্য অনুসৰি আত্মহননৰ ঘটনাৰ ৩৫ শতাংশই হৈছে পৰিয়ালজনিত সমস্যাৰ কাৰণে, ১২ শতাংশ বিবাহ-সম্পর্কীয় কাৰণত, ১০ শতাংশ প্রেমজনিত কাৰণত সংঘটিত হৈছে। সম্পত্তিজনিত কাৰণত ৮ শতাংশ এনে ঘটনা সংঘটিত হোৱা বুলিও স্বাস্থ্য মন্ত্ৰীগৰাকীয়ে তথ্য দাঙি ধৰে। আত্মহত্যা প্ৰতিৰোধৰ উপায় হিচাপে চৰকাৰে দুটাকৈ হেল্পলাইন নম্বৰযোগে কাউন্সেলিঙৰ ব্যৱস্থা হাতত লোৱা বুলি মন্ত্ৰীগৰাকীয়ে জানিবলৈ দিয়ে। ইয়াৰ বাবে সমাজৰ প্ৰতিগৰাকী ব্যক্তিৰ সহযোেগ লাগিব বুলি তেওঁ দোহাৰে। আত্মহননৰ দৰে মানসিক ব্যাধিৰ পৰা পৰিত্ৰাণ পাবলৈ হ'লে চৰকাৰ- প্ৰশাসনৰ তৰফৰ পৰা যিমানেই ব্যৱস্থা গ্রহণ কৰা নহওক কিয়, সমাজৰ প্ৰতিগৰাকী ব্যক্তি এইক্ষেত্ৰত সজাগ-সচেতন হ'ব লাগিব। প্ৰতিগৰাকী অভিভাৱক, শিক্ষক-শিক্ষয়িত্ৰীয়ে ছাত্ৰ-ছাত্ৰীসকলৰ মানসিক অৱস্থাৰ প্ৰতি প্ৰতিদিনে চকু দিব লাগিব। বিষয়টোক যথেষ্ট গুৰুত্ব সহকাৰে লৈ ইয়াক মষিমূৰ কৰাৰ প্ৰচেষ্টা হাতত ল'ব নোৱাৰিলে এই ব্যধিয়ে ভয়ংকৰ ৰূপ ধাৰণ কৰি সমাজ ছানি ধৰিব আৰু ই নিয়ন্ত্ৰণৰ বাহিৰলৈ যাব।

Share This