বিলাহী টক এনেদৰে প্ৰস্তুত কৰক

Rashmi February 14, 2025

ডিজিটেল ডেস্ক: বিলাহী হৈছে এবিধ পুষ্টিকৰ উপাদান।বিলাহীত এনে বহু পুষ্টিকৰ উপাদান পোৱা যায়, যিবোৰ স্বাস্থ্যৰ বাবে অতি উপকাৰী ৷ বিলাহীত ভিটামিন-এ আৰু ভিটামিন-চি, ফাইবাৰ, ফ'লেট আৰু কেলচিয়ামৰ দৰে বহুতো উপকাৰী উপাদান থাকে ৷ ই শৰীৰত এণ্টি-অক্সিডেন্ট হিচাপে কাম কৰে ৷ আলুৰ পিছতে সৰ্বাধিক প্ৰচলিত পাচলি বিধেই হৈছে বিলাহী।বিলাহীৰ বহুতো ঔষধি গুণ আছে। ঔষধি গুণেৰে পৰিপূৰ্ণ এই বিলাহী আমাৰ শৰীৰৰ বাবে অতি উপকাৰী। আপুনি বিলাহী কেনেদৰে প্ৰস্তুত কৰি খাইছে।অধিক পকিবলৈ ধৰা বিলাহী পেলাই দিয়ে নেকি।বিলাহী বিভিন্ন ধৰনে প্ৰস্তুত কৰিব পাৰি।আজি জানো আহক সুস্বাদু টেঙা-মিঠা বিলাহী টক কেনেদৰে প্ৰস্তুত কৰিব

বিলাহী টক প্ৰস্তুতৰ‌ বাবে প্ৰথমতে লাগিব

প্ৰথমতে বিলাহীকেইটা ভালদৰে দুই সমান টুকুৰাকৈ কাটি ল'ব।

লগতে ল'ব ৮-১০টা খেজুৰ আৰু এডোখৰ তেঁতেলী

দুখিলা তেজপাত,এটা‌ ইলাচী,এটা শুকান জলকীয়া ,আধা চামুচ কালজিৰা অথবা পাছফোৰণ, আধাকাপ চেনি (সোৱাদ অনুসৰি),এডোখৰ গুৰ, আধা চামুচ নিমখ

কেনেদৰে প্ৰস্তুত কৰিব

প্ৰথমতে খেজুৰৰ গুটিখিনি উলিয়াই সৰু সৰুকৈ কাটি ল'ব।

কেৰাহীত সৰু চামুচেৰে তিনি চামুচ তেল গৰম কৰি তেজপাত,ইলাচী, শুকান জলকীয়া,হালধি আৰু কালজিৰা দি দিব।

এতিয়া বিলাহীখিনি দি অলপ সময় ভাজি থাকিব। বিলাহীখিনি দুই মিনিট মান ভাজি লোৱাৰ পিছত আধা চামুচ নিমখ দিব।তাৰ পিছত অলপ সময়ৰ কাৰণে ঢাকি দিব।

পাঁচ মিনিট মানৰ পাছত ঢাকোন উদঙাই সিজা বিলাহীখিনি হেতাৰে অলপ হেঁচি ভাঙি ল'ব তাৰ পিছত খেজুৰখিনি দি আকৌ পাঁচমিনিটৰ বাবে ঢাকি দিব।

তাৰ পিছত গুৰডোখৰ আৰু সোৱাদ অনুসৰি লোৱা চেনিখিনি দি দিব।চেনিখিনি ভালকৈ গলি যোৱাৰ পিছত তেঁতেলীখিনি দি অলপ সময়ৰ বাবে সিজিবলৈ দিব। তাৰ পিছত ভালদৰে বিলাহী টকখিনি হেতাৰে লৰাই কাঢ়ি দিব। এতিয়া পৰিৱেশন কৰিব পাৰে।