দৈনিক কিমান পানী খাব লাগে জানেনে ?

Rashmi March 16, 2025

ডিজিটেল ডেস্ক : আমাৰ শৰীৰত যিকোনো কামৰ বাবে নিতান্তই প্ৰয়োজনীয় এক উপাদান হ’ল পানী। এজন ব্যক্তিয়ে বহু সময় খাদ্য নোখোৱাকৈ থাকিব পাৰিলেও কিন্তু পানীৰ অবিহনে দীঘলীয়া সময় ধৰি জীয়াই থকাটো সম্ভৱ নহয়। পৰ্যাপ্ত পৰিমাণৰ পানী খোৱাটো সকলো মানুহৰ বাবে প্ৰয়োজনীয়। বয়স, লিংগ, শৰীৰৰ ওজন আৰু জলবায়ুৰ ওপৰত নিৰ্ভৰ কৰি প্ৰতিজন ব্যক্তিৰ পানীৰ প্ৰয়োজনীয়তা বেলেগ বেলেগ হয়। শৰীৰক সুস্থ কৰি ৰাখিবলৈ পৰ্যাপ্ত পৰিমাণৰ পানীৰ প্ৰয়োজন। 

শৰীৰক সুস্থ কৰি ৰখাত যিমান স্বাস্থ্যকৰ আহাৰৰ প্ৰয়োজন, সিমানেই প্ৰয়োজন পানীৰ ।যদি আমি প্ৰতিদিনে পৰ্যাপ্ত পৰিমাণৰ পানী সেৱন নকৰোঁ, তেতিয়াহ’লে আমি যিমানেই স্বাস্থ্যসন্মত খাদ্যাভ্যাস পালন নকৰোঁ কিয় আমাৰ স্বাস্থ্য কেতিয়াও ভাল নহ’ব । শৰীৰত পানীৰ অভাৱৰ বাবে ডিহাইড্ৰেচনৰ সমস্যা আৰম্ভ হয় । ইয়াৰ লগতে পানীৰ অভাৱৰ প্ৰভাৱ আমাৰ ছালতো দেখা দিয়ে ।পানী শৰীৰৰ বাবে অতি আৱশ্যক হোৱাৰ বাবেই এই পানী খোৱাৰ নিয়ম পালন কৰা অতি আৱশ্যক। জানো আহক দৈনিক কিমান পানী খাব লাগে।

পূৱা শুই উঠাৰ পাছত চাহ আৰু কফিৰ পৰিৰ্ৱতে পানীৰে দিনটো আৰম্ভ কৰা উচিত। পিয়াহ নালাগিলেও সদায় পুৱা উঠি ১ ৰ পৰা ২ গিলাছ অৰ্থ্যাৎ ৫০০ মিলিলিটাৰ পানী খোৱাৰ দৰকাৰ। 

এজন সুস্থ ব্যক্তিয়ে দিনে ২.৫ ৰ পৰা ৩.৫ লিটাৰ পানী খোৱা উচিত। আনহাতে মহিলাসকলে দিনে ২ ৰ পৰা ৩ লিটাৰ পানী খোৱাটো শৰীৰৰ বাবে যথেষ্ট উপকাৰী। গৰমৰ দিনত এই পানীৰ পৰিমাণ বঢ়াই দিয়া উচিত।

ৰাতি খাদ্য খোৱাৰ ৪০ মিনিট আগত ১ গিলাছ আৰু ৪০ মিনিটৰ পিছত ১ গিলাছ পানী খাব লাগে।উল্লেখযোগ্য যে পানী খোৱাৰ নিয়ম নজনাৰ বাবেই শৰীৰত গাঁঠিৰ বিষ, কৌষ্ঠকাঠিন্য, চুলি সৰা, ছাল শুকাই যোৱা , শৰীৰৰ ওজন বৃদ্ধি , কিডনী সম্বন্ধীয় বিভিন্ন ৰোগে দেখা দিয়া পৰিলক্ষিত হয়।

Share This