'প্ৰমাণৰ 'এটম বোমা' থাকিলে তৎক্ষণাৎ বিস্ফোৰণ ঘটাব লাগে'

dainik janambhumi August 03, 2025

ডিজিটেল ডেস্কঃ লোক সভাৰ বিৰোধী দলপতি তথা কংগ্ৰেছৰ জ্যেষ্ঠ নেতা ৰাহুল গান্ধীয়ে ভাৰতৰ নিৰ্বাচন আয়োগক আক্রমণৰ লক্ষ্য কৰি লোৱাৰ পাছতে শনিবাৰে প্ৰতিৰক্ষা মন্ত্ৰী ৰাজনাথ সিঙে ৰাহুলক উভতি ধৰে। ৰাহুল গান্ধীয়ে নির্বাচন আয়োগ 'ভোট চুৰি'ৰ লগত জড়িত বুলি কৰা দাবীক প্রত্যাহবান জনায় ৰাজনাথ সিঙে।

উল্লেখযোগ্য যে বিজেপিৰ হকে ভোট চুৰিৰ লগত জড়িত বুলি নির্বাচন আয়োগৰ বিৰুদ্ধে প্ৰমাণৰ এটা 'এটম বোমা' কংগ্ৰেছৰ হাতত আছে বুলি আৰু এই 'এটম বোমা' বিস্ফোৰিত কৰি নিৰ্বাচন আয়োগৰ স্বৰূপ উদঙাব বুলি ৰাহুল গান্ধীয়ে দাবী কৰিছিল। এই দাবীৰ প্ৰত্যুত্তৰত বিজেপিৰ প্ৰাক্তন সভাপতিজনে কয় যে যদি ৰাহুল গান্ধীৰ হাতত এটা 'এটম বোমা' আছে, তেনেহ'লে তেওঁ তৎক্ষণাৎ ইয়াৰ বিস্ফোৰণ ঘটাব লাগে।

সিঙে ৰাহুলক বিদ্রূপ কৰি কয় যে এই 'এটম বোমা'ৰ বিস্ফোৰণৰ পৰা ৰাহুলে নিজকে বচাই ৰখাটো সুনিশ্চিত কৰিব লাগে। ৰাজনাথ সিং ইমানতে শান্ত নহ'ল, ৰাহুলে পূৰ্বতে কৰা মন্তব্য এটাৰ বিষয়ত সিঙে কয় যে ৰাহুলে সংসদত এটা 'ভূমিকম্প' আনিব বুলি ভাবুকি দিছিল। কিন্তু যেতিয়া তেওঁ কথাটো ক'লে, তেতিয়া 'ভূমিকম্পটো'ৰ কোনো প্ৰভাৱ নপৰিল। ৰাজনাথ সিঙে ভাৰতৰ নিৰ্বাচন আয়োগক সুৰক্ষা দি কয় যে আয়োগখনৰ এটা খ্যাতি আছে আৰু ইয়াৰ সংহতিৰ ক্ষেত্ৰত কোনো প্রশ্নই উঠিব নোৱাৰে। কংগ্ৰেছৰ নেতা ৰাহুল গান্ধীক ১৯৭৫ চনৰ জৰুৰী অৱস্থাৰ বিষয়ে সোঁৱৰাই দি ৰাজনাথ সিঙে কয় যে কংগ্রেছে সেই সময়ত জৰুৰী অৱস্থা ঘোষণা কৰি গণতন্ত্ৰক হত্যা কৰিছিল।

Share This