১৯ জুলাইত খৰ্গেৰ বাসভৱনত 'ইণ্ডিয়া' মৰ্চাৰ বৈঠক

Kakali Deka July 18, 2025

ডিজিটেল ডেস্ক : অহা ১৯ জুলাইত নতুন দিল্লীত কংগ্ৰেছৰ সভাপতি মল্লিকার্জুন খৰ্গেৰ বাসভৱনত বিৰোধী ইণ্ডিয়া' মৰ্চাৰ এখন বৈঠক অনুষ্ঠিত হ'ব। আৰ জে ডিৰ নেতা তেজস্বী যাদৱে বৃহস্পতিবাৰে পাটনাত এখন সংবাদমেলত এই কথা জনায়। সংসদৰ আগন্তুক বর্ষাকালীন অধিৱেশনত উত্থাপন কৰিবলগীয়া সমস্যা-বিষয়সমূহ বিৰোধী দলসমূহে এই বৈঠকত আলোচনা কৰাৰ সম্ভাৱনা আছে। 

ইফালে, মুম্বাইত এখন সংবাদমেলত শিৱ সেনা (ইউ বি টি)ৰ সাংসদ সঞ্জয় ৰাউটে কয়, 'দিল্লীত ইণ্ডিয়া মৰ্চাৰ বৈঠক অনুষ্ঠিত হ'ব। কালি আমি কে চি বেণুগোপালে ফ'ন কৰিছিল... উদ্ধৱ থাকৰে ডাঙৰীয়াই কয় যে ইণ্ডিয়া মৰ্চাৰ এখন বৈঠকৰ প্রয়োজন আছে। আমি ১৯ জুলাই তাৰিখটো স্থিৰ কৰিলোঁ।' অন্য এক বাতৰি মতে এই বৈঠকত তৃণমূল কংগ্ৰেছ আৰু আম আদমি পার্টি উপস্থিত নাথাকে। উল্লেখযোগ্য যে সংসদৰ বৰ্ষাকালীন অধিৱেশন ২১ জুলাইত আৰম্ভ হ'ব। আগষ্টৰ ২১ তাৰিখলৈকে সংসদৰ মুঠ ২১খন বৈঠক হ'ব। আনহাতে ৰাখী বন্ধন আৰু স্বাধীনতা দিৱসৰ বাবে ১২ আগষ্টৰ পৰা ১৮ আগষ্টলৈ সংসদৰ কাম-কাজ বন্ধ থাকিব। আনহাতে, ২০ জুলাই, দেওবাৰে কেন্দ্ৰীয় চৰকাৰে এখন সর্বদলীয় বৈঠক অনুষ্ঠিত কৰাৰো সম্ভাৱনা আছে। 

চৰকাৰ আৰু বিৰোধীৰ মাজত সংসদৰ আগন্তুক অধিৱেশনত যুক্তি-তর্ক তথা পৰিস্থিতি উত্তাল হ'ব পৰা বিষয়বোৰৰ ভিতৰত আছে বিধানসভাৰ নিৰ্বাচনৰ আগত বিহাৰত নিৰ্বাচন আয়োগে কৰা ভোটাৰ তালিকাৰ বিশেষ ব্যাপক সংশোধন। ইয়াৰ উপৰি, বিৰোধীয়ে পহলগামৰ সন্ত্রাসবাদী আক্রমণ, অপাৰেশ্যন সেন্দূৰ আৰু আমেৰিকাৰ ৰাষ্ট্ৰপতিয়ে ভাৰত-পাকিস্তানৰ মাজত যুদ্ধ-বিৰতিৰ বাবে মধ্যস্থতাৰ দাবী কৰাক লৈও বিৰোধীয়ে প্রশ্ন উত্থাপন কৰাৰ সম্ভাৱনা আছে।

Share This