যিকোনো দেশৰ সৈতে সম্বন্ধ ৰখাত ভাৰতে তৃতীয় ৰাষ্ট্ৰৰ দৃষ্টিভংগীক গুৰুত্ব নিদিয়ে

dainik janambhumi August 03, 2025

ডিজিটেল ডেস্কঃ ভাৰত আৰু ৰাছিয়াৰ সম্পৰ্ক দীর্ঘদিনীয়া আৰু সুস্থিৰ। এই সম্পর্কক তৃতীয় দেশৰ দৃষ্টিভংগীৰে চাব নালাগে। বিদেশ মন্ত্ৰ্যালয়ৰ মুখপাত্ৰ ৰন্ধীৰ জয়ছোৱালে আজি এইদৰে কয়। ৰাছিয়াৰ পৰা খাৰুৱা তেল ক্ৰয় কৰাৰ কাৰণে আমেৰিকাৰ ৰাষ্ট্ৰপতি ড'নাল্ড ট্রাম্পে ভাৰতীয় সামগ্ৰীত ২৫% শুল্ক আৰু জৰিমনা আৰোপ কৰা ঘোষণাৰ প্রতিক্রিয়া প্রকাশ কৰি বিদেশ মন্ত্ৰ্যালয়ৰ মুখপাত্ৰগৰাকীয়ে কয়, 'যিকোনো দেশৰ সৈতে ভাৰতৰ সম্পৰ্ক নিজৰ নিজৰ গুণ-দোষৰ ওপৰত নিৰ্ভৰ কৰে আৰু ইয়াক তৃতীয় দেশৰ দৃষ্টিভংগীৰে চাব নালাগে। 

ভাৰত-ৰাছিয়াৰ সম্পৰ্কৰ প্ৰশ্নৰ ক্ষেত্রত ইয়াকে ক'ব পাৰি যে দুয়োখন দেশৰ সম্পৰ্ক সুস্থিৰ আৰু সময়ৰ মাপকাঠীৰ ভিত্তিত টিকি আছে।' জয়ছোৱালে কয় যে ভাৰতে খাৰুৱা তেল ক্ৰয় কৰাটো বজাৰৰ স্থিতি আৰু ৰাষ্ট্ৰীয় স্বাৰ্থৰ ওপৰত নিৰ্ভৰ কৰে। তেওঁ লগতে কয় যে ভাৰতীয় তেল কোম্পানীয়ে ৰাছিয়াৰ পৰা খাৰুৱা তেল আমদানি বন্ধ কৰাৰ কোনো বিশেষ ঘটনাৰ বিষয়ে তেওঁ জ্ঞাত নহয়।

 আনহাতে, ইৰানৰ পৰা পেট্রলজাত সামগ্ৰী ক্ৰয় কৰাৰ কাৰণে আমেৰিকাই  ছটা ভাৰতীয় কোম্পানীক নিষিদ্ধ ঘোষণা কৰাৰ প্ৰসংগত তেওঁ কয় যে এই বিষয়টো পর্যালোচনা কৰি থকা হৈছে। মন কৰিব লগীয়া যে ভাৰতে ট্রাম্পৰ ২৫% শুল্ক আৰু জৰিমনা আৰোপ কৰি কৰা ঘোষণাক উলাই কৰি ভাৰতীয় তেল কোম্পানীসমূহে ৰাছিয়াৰ পৰা খাৰুৱা তেল ক্ৰয় কৰাটো অব্যাহত ৰাখিছে। বাতৰি প্রতিষ্ঠান এ এন আয়ে সূত্ৰসমূহৰ উদ্ধৃতি দি কয় যে ভাৰতৰ সকলো তেল শোধনাগাৰে ৰাছিয়াৰ পৰা খাৰুৱা তেল ক্ৰয় কৰাটো অব্যাহত ৰাখিছে। 

উল্লেখযোগ্য যে কালি ৰয়টাৰে প্ৰকাশ কৰা এটা বাতৰিত এইবুলি দাবী কৰিছিল যে ভাৰতৰ চৰকাৰী খণ্ডৰ তেল প্রতিষ্ঠানসমূহে ৰাছিয়াৰ পৰা খাৰুৱা তেল ক্ৰয় কৰাটো বন্ধ কৰিছে। এই বাতৰিত প্ৰতিক্রিয়া প্রকাশ কৰি ট্রাম্পে এইবুলি দাবী কৰে যে ভাৰতে ৰাছিয়াৰ পৰা খাৰুৱা তেল ক্রয় নকৰাৰ সিদ্ধান্ত লৈছে। ই এটা ডাঙৰ পদক্ষেপ। আজি জয়ছোৱালৰ বিবৃতিৰ লগতে এ এন আয়ে প্রকাশ কৰা বাতৰিয়ে ট্রাম্পৰ দাবীক নস্যাৎ কৰে। এ এন আয়ে চৰকাৰী সূত্ৰৰ উদ্ধৃতি দি বাতৰিটোত কয় যে ভাৰতৰ আগশাৰীৰ তেল কোম্পানী ইণ্ডিয়ান অইল, হিন্দুস্তান পেট্রলিয়াম কৰ্প'ৰেশ্যন, মাংগালোৰ ৰিফাই নেৰী এণ্ড পেট্র'কেমিকেল লিমিটেড, ভাৰত পেট্র 'লিয়াম কৰ্প'ৰেশ্যন লিমিটেডে এতিয়াও ৰাছিয়াৰ পৰা খাৰুৱা তেল আমদানি কৰি আছে। বাতৰিটোত কোৱা হৈছে যে ভাৰতে আন্তঃৰাষ্ট্ৰীয় বজাৰৰ পৰা খাৰুৱা তেল ক্ৰয় কৰাটো নিৰ্ভৰ কৰে দাম, খাৰুৱা তেলৰ মান, ভাণ্ডাৰ, পৰিবহণৰ সুচলতা আৰু আন অর্থনৈতিক কাৰণৰ ওপৰত। 

ভাৰতে ৰাছিয়াৰ পৰা খাৰুৱা তেল ক্ৰয় কৰাৰ কাৰণ হ'ল ৰাছিয়া খাৰুৱা তেলৰ উৎপাদনত বিশ্বৰ ভিতৰত দ্বিতীয় স্থানত থকাটো। ইফালে ৰাষ্ট্ৰপতি ট্রাম্পে চীনকো ৰাছিয়াৰ পৰা খাৰুৱা তেল ক্ৰয় নকৰিবলৈ সকীয়াই দিয়ে। ইয়াত প্রতিক্রিয়া প্ৰকাশ কৰি চীনৰ বিদেশ মন্ত্ৰ্যালয়ে কয় যে চীনে নিজৰ হিচাপ মতে খাৰুৱা তেল ক্ৰয় কৰিব। শুল্ক যুদ্ধত কোনো জয়ী নহয়। চীনৰ বিদেশ মন্ত্ৰ্যালয়ে কয়, 'আমি আমাৰ দেশৰ সুৰক্ষা আৰু স্বার্থক সম্পূৰ্ণ শক্তিৰে ৰক্ষা কৰিম।'

Share This