পি অ' কেত পহলগাম-কাণ্ডৰে জড়িত সন্ত্রাসবাদীৰ প্ৰতীকী জানাজা

dainik janambhumi August 04, 2025

ডিজিটেল ডেস্কঃ কাশ্মীৰৰ পহলগামত সন্ত্রাসবাদীৰ বৰ্বৰ আক্ৰমণ আৰু সীমাৰ সিপাৰৰ পৰা ভাৰতত সন্ত্রাসবাদৰ কাৰ্য চলোৱাৰ আঁৰত যে পাকিস্তান জড়িত আছে, সেই তথ্য পুনৰ প্ৰমাণিত হ'ল শেহতীয়াকৈ সংঘটিত হোৱা এটা ঘটনাৰ পৰা। 

২২ এপ্রিলত পহলগামত সন্ত্রাসবাদীৰ আক্ৰমণৰ লগত জড়িত তথা জম্মু-কাশ্মীৰত শেহতীয়াকৈ নিৰাপত্তা বাহিনীয়ে হত্যা কৰা টি আৰ এফৰ সন্ত্রাসবাদী হাবিব তাহিৰৰ প্ৰতীকী ৰূপত শেষকৃত্য যোৱা সপ্তাহত পাকিস্তান-অধিকৃত কাশ্মীৰৰ (পি অ'কে) এখন গাঁৱত সম্পন্ন কৰা হয়।

 পি অ' কেৰ কুইয়ান গাঁৱত স্থানীয় বাসিন্দাসকলে ৩০ জুলাইত সমৰেত হৈ মৃত সন্ত্রাসবাদী তাহিৰৰ প্ৰতীকী ৰূপত শেষকৃত্য সম্পন্ন কৰাৰ বাবে শেষ জানাজাত অংশ লোৱাৰ দৃশ্য ইতিমধ্যে ভিডিঅ' আৰু ফটো সামাজিক মাধ্যমত প্ৰচাৰ হৈছে। ইয়াৰ পূৰ্বে, 'অপাৰেশ্যন সেন্দূৰ'ৰ সময়ত ভাৰতীয় সামৰিক বাহিনীয়ে হত্যা কৰা সন্ত্রাসবাদীবোৰৰ জানাজাত অংশ লৈছিল পাকিস্তানী সেনাৰ শীর্ষ বিষয়াসকলে। 

'অপাৰেশ্যন সেন্দুৰ'ত নিহত হোৱা সন্ত্রাসবাদীকেইটা আছিল সন্ত্রাসবাদী হাফিজ ছয়ীদৰ নেতৃত্বাধীন এটা নিষিদ্ধ সংগঠন, জামাত-উড-ডাৱাৰ (জে ইউ ডি)। সূত্ৰসমূহে প্রকাশ কৰা মতে, পাকিস্তান-ভিত্তিক লস্কৰ-এ-টয়বা (এলইটি) সন্ত্রাসবাদী গোটে হাবিব তাহিৰক নিযুক্তি দি প্রশিক্ষণ প্রদান কৰিছিল। দ্য ৰেজিছটেন্স ফ্রণ্ট (টি আৰ এফ) হৈছে লস্কৰ-এ-টয়বাৰ সহযোগী সন্ত্রাসবাদী সংগঠন। এই টি আৰ এফেই পহলগামত আক্ৰমণৰ দায়িত্ব স্বীকাৰ কৰিছিল আৰু শেহতীয়াকৈ আমেৰিকাই টি আৰ এফক এটা সন্ত্রাসবাদী সংগঠন হিচাপে ঘোষণা কৰিছে। 

উল্লেখযোগ্য যে যোৱা ২৮ জুলাই ত শ্রীনগৰৰ হৰৱানত নিৰাপত্তা বাহিনীৰে হোৱা সংঘৰ্ষত নিহত হোৱা পহলগাম-কাণ্ডৰে জড়িত তিনিটা সন্ত্রাসবাদীৰ ভিতৰত হাবিব তাহিৰো আছিল। শ্রীনগৰ আৰক্ষীৰ জ্যেষ্ঠ অধীক্ষক জি ভি সন্দীপ চক্ৰৱৰ্তীয়ে নিশ্চিত কৰিছিল যে 'অপাৰেশ্যন মহাদেৱ'ত নিহত হোৱা তিনিটা সন্ত্রাসবাদী পহলগাম-কাণ্ডৰে জড়িত আছিল। ৩০ জুলাইত পি অ' কেৰ গাঁওখনত অনুষ্ঠিত হোৱা মৃত তাহিৰৰ প্রতীকী শেষকৃত্য অনুষ্ঠানত স্থানীয় এল ই টিৰ কমাণ্ডাৰ ৰিজৱান হানিফো উপস্থিত থাকি তাহিৰৰ পৰিয়ালক সান্ত্বনা দিবলৈ লওঁতেই সমৱেত ৰাইজৰ মাজত উত্তপ্ত পৰিস্থিতিৰ সৃষ্টি হয়। ইয়াৰ পাছতেই হানিফ আৰু তেওঁৰ সংগীসকলে সেই স্থান পৰিত্যাগ কৰে।

Share This