উত্তৰাখণ্ডত বান আক্রান্ত অঞ্চলৰ পৰা এহেজাৰ লোকক নিৰাপদে উদ্ধাৰ

dainik janambhumi August 11, 2025

ডিজিটেল ডেস্কঃ যোৱা ৫ আগষ্টত হঠাতে অহা প্রলয়ংকৰী বানত ক্ষতিগ্রস্ত উত্তৰাখণ্ডৰ উত্তৰকাশী জিলাৰ পৰিস্থিতি আজি পঞ্চম দিনাও উন্নত হোৱা নাই। ইতিমধ্যে চৰকাৰীভাৱে প্ৰকাশ কৰা অনুসৰি বানত আক্রান্ত অঞ্চলৰ ৫৬৬ জন লোকক সেই অঞ্চলৰ পৰা উদ্ধাৰ কৰি অন্য ঠাইলৈ স্থানান্তৰ কৰা হৈছে আৰু এই প্রাকৃতিক দুর্যোগত সহস্রাধিক লোকক নিৰাপদে উদ্ধাৰ কৰা হৈছে।

উল্লেখযোগ্য যে বিগত ৫ আগষ্টত ডাৱৰ বিস্ফোৰণৰ ফলত আকস্মিক বানে কম সময়তে প্রবল ৰূপ ধাৰণ কৰি বহু সংখ্যক ঘৰ-দুৱাৰ, গাড়ী-মটৰ উটুৱাই লৈ যোৱাৰ উপৰি সমগ্র এলেকাটো বালি-বোকাৰে পুতি পেলায়। ইতিমধ্যে এই ঘটনাত বহু লোক সন্ধানহীন হোৱাৰ লগতে ৫ জন লোকৰ মৃতদেহ উদ্ধাৰ কৰা হৈছে। ভাৰতীয় সেনাই উত্তৰ কাশীৰ এই বান-বিধ্বস্ত অঞ্চলত প্ৰথমৰে পৰাই ডগ স্কোৱাড, ড্ৰ'ন আৰু স্থল অভিযানৰ জৰিয়তে এই দুৰ্গতসকলক উদ্ধাৰ অভিযান চলাই গৈছে। 

চৰকাৰী সূত্ৰৰ মতে, শনিবাৰ পৰ্যন্ত এই অভিযান অব্যাহত আছে আৰু দুৰ্গতসকলক নিৰাপদ স্থানলৈ স্থানান্তৰ কৰি পৰিস্থিতি স্বাভাৱিক কৰাৰ বাবে প্রচেষ্টা অব্যাহত ৰাখিছে। 

ইতিমধ্যে ৰাজ্যখনৰ আৰক্ষী সঞ্চালকপ্রধান দীপম শেথে উত্তৰকাশীৰ বান-বিধ্বস্ত এলেকা পৰিদৰ্শন কৰি ঘটনাৰ বুজ লোৱাৰ লগতে নিৰাপদ উদ্ধাৰ অভিযান আৰু দুৰ্গতসকলক সকলো প্ৰকাৰৰ সাহায্য প্ৰদানৰ দিশটো নিৰীক্ষণ কৰিছে। আনহাতে, পাহাৰীয়া ৰাজ্যখনত বৰ্তমানেও বৰষুণৰ তাণ্ডৱ অব্যাহত আছে। ভাৰতীয় বতৰ বিজ্ঞান বিভাগে ৰাজ্যখনৰ পাউৰী গাৰোৱাল, তেহৰী, উত্তৰকাশী, ডেৰাড়ুন, চম্পাৱাত আদি জিলাত ১২ আগষ্টলৈকে প্রৱল বৰষুণৰ আগজাননী দিছে। ইতিমধ্যে চৰকাৰী কৰ্তৃপক্ষই ৰাজ্যখনত স্কুলসমূহ বন্ধ ৰখাৰ নিৰ্দেশ দিছে আৰু বাসিন্দাসকলক ঘৰৰ ভিতৰতে থাকিবলৈ পৰামৰ্শ দিছে।

Share This