অনুপ্ৰৱেশৰ বিৰুদ্ধে ড'নাল্ড ট্রাম্পৰ অভিযান

Dainik janambhumi February 06, 2025

ডিজিটেল ডেস্ক: আমেৰিকাৰ পৰা বহিষ্কাৰ কৰা ১০৪গৰাকী ভাৰতীয়ক লৈ দেশখনৰ এখন সামৰিক বিমান পঞ্জাবৰ অমৃতসৰৰ গুৰু ৰাম দাস আন্তঃৰাষ্ট্ৰীয় বিমান বন্দৰত অৱতৰণ কৰে। আমেৰিকাৰ সেনাৰ চি-১৭ বিমানখনত ২৫ শিশু-মহিলাৰ লগতে ৭৯জন পুৰুষক লৈ অনা হয়। 

আমেৰিকাৰ পৰা বহিষ্কাৰ কৰা ভাৰতীয় লোকসকলৰ ভিতৰত পঞ্জাবৰ ৩০গৰাকী, ৩৩গৰাকী গুজৰাটৰ, ৩৩গৰাকী হাৰিয়ানাৰ, উত্তৰ প্ৰদেশ আৰু চণ্ডীগড়ৰ দুগৰাকী আছে। আমেৰিকাৰ সামৰিক বিমানখন টেক্সাছৰ ছেইন্ট ওএন্টনিয়'ৰ পৰা যাত্ৰা আৰম্ভ কৰি অমৃতসৰত উপস্থিত হয়। ভাৰতীয় নাগৰিকসকলক গ্ৰহণ কৰাৰ কাৰণে বিমান বন্দৰত আৰক্ষী আৰু প্ৰশাসনৰ লোক উপস্থিত আছিল। আমেৰিকাৰ দূতাৱাসৰ প্ৰতিনিধিও তাত উপস্থিত আছিল। সূত্রসমূহে প্ৰকাশ কৰা অনুসৰি ভাৰতলৈ প্ৰেৰণ কৰা অধিকাংশ ব্যক্তিয়ে মেক্সিকো সীমান্তৰে আমেৰিকাত প্ৰৱেশ কৰিছিল। অৱশ্যে এই লোকসকল ভাৰতত অপৰাধী নহয়। তেওঁলোকে বৈধভাৱে ভাৰত ত্যাগ কৰিছিল কিন্তু তেওঁলোকৰ বিৰুদ্ধে আমেৰিকাত উঠা অভিযোগটো হ'ল এই লোকসকলে অবৈধ পথেৰে আমেৰিকাত প্ৰৱেশ কৰিছিল। 

উল্লেখযোগ্য যে এই বিমানখনত পূর্বতে ২০৪জন লোক অহা বুলি কোৱা হৈছিল, কিন্তু পাছত ১০৪জন লোকক লৈহে বিমানখন আহে। এই লোকসকলৰ কাৰোবাৰ যদি পাছপ'র্ট নাথাকে তেতিয়া বায়'মেট্রিক প্রণালীৰে চিনাক্ত কৰা হ'ব। বিমান বন্দৰ কৰ্তৃপক্ষই জনোৱা মতে প্ৰব্ৰজন আৰু সীমা শুল্ক বিভাগে তেওঁলোকক সোধা-পোছা কৰি সকলো তথ্য লাভ কৰাৰ পাছত পঞ্জাব পুলিচক গতাই দিয়া হ'ব। এই লোকসকল কেনেকৈ আমেৰিকালৈ গ'ল, তেওঁলোকক অবৈধভাৱে আমেৰিকালৈ যোৱাত কিমানজন লোকে সহায় কৰিছিল আদি সকলো তথ্য তেওঁলোকৰ পৰা লাভ কৰাৰ চেষ্টা কৰা হ'ব। ইয়াৰ পাছত তেওঁলোকক নিজ নিজ ঘৰলৈ প্ৰেৰণ কৰা হ'ব। পঞ্জাবৰ দাঁতি-কাষৰৰ ৰাজ্যকেইখনৰ লোকসকলক বাছেৰে আৰু আনসকলক বিশেষ বিমানেৰে প্ৰেৰণ কৰা হ'ব। ইফালে ৰয়টাৰে প্ৰকাশ কৰা অনুসৰি এই লোকসকলক ভাৰতলৈ ঘূৰাই পঠিওৱাত প্রতি ব্যক্তিৰ বাবত ব্যয় হয় প্রায় ৪.০৭ লাখ টকা। ড'নাল্ড ট্রাম্পে দ্বিতীয় বাৰৰ বাবে আমেৰিকাৰ ৰাষ্ট্ৰপতিৰ পদ গ্ৰহণ কৰাৰ পাছতে দেশখনত অবৈধভাৱে বাস কৰা প্ৰব্ৰজনকাৰীসকলক বিতাড়ন কৰাৰ নিৰ্দেশ দিছিল। এই নির্দেশ অনুসৰি এই লোকসকলক আমেৰিকাৰ পৰা ভাৰতলৈ ঘূৰাই পঠিওৱা হয়।

Share This