১১৪ বছৰীয়া দৌৰবিদ ফৌজা সিঙৰ দেহাৱসান

dainik janambhumi July 16, 2025

ডিজিটেল ডেস্ক : পঞ্জাবৰ জলন্ধৰত সংঘটিত হোৱা এক পথ দুৰ্ঘটনাত প্রাণ হেৰুৱায় কিংবদন্তি মাৰাথন দৌৰবিদ ফৌজা সিঙে। সিঙৰ বয়স আছিল ১১৪ বছৰ। সোমবাৰে জলন্ধৰস্থিত বাসভৱনৰ সমীপত সিঙক অচিনাক্ত বাহনে খুন্দিয়ায়।

লগে লগে তেওঁক হস্পিটেলত ভর্তি কৰোৱা হয় যদিও চিকিৎসাধীন অৱস্থাতেই তেওঁৰ মৃত্যু হয়। ১৯১১ চনৰ ১ এপ্ৰিলত পঞ্জাবৰ জলন্ধৰ জিলাৰ বিয়াছ পিণ্ডত ফৌজা সিঙৰ জন্ম হৈছিল। ৯০ বছৰ বয়সত তেওঁ আন্তঃৰাষ্ট্ৰীয় পৰ্যায়ত মাৰাথন দৌৰ আৰম্ভ কৰিছিল। সাহস আৰু অধ্যৱসায়ৰ বাবে ফৌজা সিং 'টার্বানড টর্নেডো' নামেৰে জনপ্ৰিয় হৈ পৰে। ২০০৪ চনত, ৯৩ বছৰ বয়সত তেওঁ লণ্ডন মাৰাথন দৌৰ সম্পূৰ্ণ কৰিছিল।

২০১১ চনত ১০০ বছৰ পূৰ্ণ হোৱাৰ দিনটোত সিঙে টৰণ্টো মাৰাথন সফলভাৱে সম্পূৰ্ণ কৰি ১০০+ বছৰীয়া শাখাত এক নতুন বিশ্ব অভিলেখ গঢ়ে। এই অভিলেখে তেওঁক বিশ্বৰ আটাইতকৈ বয়সীয়া মাৰাথন দৌৰবিদৰ স্বীকৃতি প্ৰদান কৰে। তেওঁৰ মৃত্যুত প্রধানমন্ত্রী নৰেন্দ্ৰ মোদীয়ে গভীৰ শোক প্ৰকাশ কৰে।

Share This