ইছৰ'ৰ মুখ্য কাৰ্যালয় পৰিদৰ্শনৰ বাবে যাত্ৰা ৰাজ্যৰ ১২ শিক্ষাৰ্থীৰ

dainik janambhumi July 24, 2025

ডিজিটেল ডেস্ক : বাক্সা, চিৰাং, কোকৰাঝাৰ, নলবাৰী আৰু ওদালগুৰি জিলাৰ মুঠ ১২গৰাকী মেধাৱী ছাত্ৰ-ছাত্রীয়ে বেংগালুৰুস্থিত ভাৰতীয় মহাকাশ গৱেষণা সংস্থাৰ মুখ্য কাৰ্যালয় পৰিদৰ্শন কৰাৰ উদ্দেশ্যে যাত্রা কৰিছে। সমগ্র শিক্ষা অসমৰ কার্যালয়ত মিছন সঞ্চালক ডাঃ ওম প্রকাশে নর্থ-ইষ্ট ষ্টুডেন্ট প্রগ্রেম ফৰ এৱেৰনেছ, ৰিচ এণ্ড ন'লেজ অন স্পেচ (NE-SPARKS)ৰ অধীনত তৃতীয় গোটৰ ছাত্ৰ-ছাত্ৰীক ফ্লেগ অফ কৰে। এই ভ্ৰমণৰ লক্ষ্য হৈছে ছাত্ৰ-ছাত্ৰীসকলক ভাৰতৰ মহাকাশ অভিযানৰ গৱেষণা আৰু প্ৰযুক্তিগত কৃতিত্বৰ প্ৰত্যক্ষ পৰিচয় দিয়া। ভাষণত ডাঃ ওম প্রকাশে অংশগ্ৰহণকাৰী ছাত্র-ছাত্রীসকলক শুভেচ্ছা জনায় আৰু ইছৰ' ভ্ৰমণৰ অভিজ্ঞতাসমূহ কেৱল তেওঁলোকৰ স্কুলীয়া সহপাঠীসকলৰ সৈতে নহয়, ওচৰৰ বিদ্যালয়সমূহৰ ছাত্ৰ-ছাত্ৰীসকলৰ সৈতেও ভাগ-বতৰা কৰিবলৈ উৎসাহিত কৰে। ইয়াৰ ফলত মহাকাশ বিজ্ঞান আৰু প্ৰযুক্তিৰ প্ৰতি আন শিক্ষার্থীসকলৰো আগ্রহ জগাই তোলাত সহায়ক হ'ব। বুধবাৰৰ অনুষ্ঠানত সমগ্র শিক্ষা, অসমৰ কার্যবাহী সঞ্চালক সঞ্জয় দত্ত, বিশেষ কৰ্তব্যৰত বিষয়া খনীন্দ্ৰ দাসৰ লগতে আন বিষয়া, কৰ্মচাৰী আৰু জিলাসমূহৰ ন'ডেল শিক্ষকসকল উপস্থিত থাকে।

 বিদ্যালয় শিক্ষা বিভাগ আৰু অসম চৰকাৰৰ ৰূপান্তৰ আৰু উন্নয়ন বিভাগৰ যৌথ পদক্ষেপ এই কাৰ্যসূচী হাতত লোৱা হৈছে। উল্লেখযোগ্য যে উত্তৰ-পূব মহাকাশ প্রয়োগ কেন্দ্র (এন ই এছ এ চি)ৰ দ্বাৰা উত্তৰ-পূৰ্বাঞ্চলৰ ৰাজ্যসমূহৰ প্ৰতিখন ৰাজ্যৰ পৰা ১০০গৰাকী ছাত্ৰ-ছাত্ৰীক আই এছ আৰ ডি, বেংগালুৰুলৈ ভ্ৰমণৰ আয়োজন কৰি মহাকাশ বিজ্ঞান আৰু প্রযুক্তি সম্পর্কে সজাগতা বৃদ্ধিৰ বাবে পর্যায়ক্রমে প্ৰেৰণ কৰাৰ এটা প্রকল্প আৰম্ভ কৰা হৈছে। প্ৰতিটো পর্যায়তে ১২জনীয়া এটা গোটৰ লগতে এজন শিক্ষক সমন্বয়ক থাকিব। 

চৰকাৰী বা প্ৰাদেশীকৃত বিদ্যালয়ৰ নৱম শ্ৰেণীৰ পৰা দ্বাদশ শ্রেণীলৈকে ছাত্র-ছাত্রীসকলক যোগ্যতা আৰু বিজ্ঞান আৰু মহাকাশ অন্বেষণৰ প্ৰতি তীব্ৰ আগ্ৰহৰ ভিত্তিত নির্বাচিত কৰা হয়। এই ভ্ৰমণৰ সময়ত ছাত্ৰ-ছাত্ৰীসকলে ইছৰ' ভ্ৰমণ কৰাই নহয়, ইছৰ'ৰ বিজ্ঞানীসকলৰ সৈতে মত বিনিময় কৰাৰ সুযোগ পাব।

Share This