গাজাত ২৩জন পেলেষ্টাইনীক হত্যা

dainik janambhumi March 26, 2025

ডিজিটেল ডেস্কঃ গাজাত মঙলবাৰে ইজৰাইলী সেনাই আক্রমণ চলাই কমেও ২৩জন পেলেষ্টাইনীক হত্যা কৰে। গাজাৰ চৰকাৰী বিষয়াই এই তথ্য সদৰী কৰি কয় যে ইজৰাইলী সেনাই সমগ্র গাজাত সহস্রাধিক আশ্রয় শিবিৰ খালী কৰিবলৈ পেলেষ্টাইনীসকলক নির্দেশ দিয়ে। এসপ্তাহৰ পূৰ্বৰে পৰা হামাছৰ বিৰুদ্ধে ইজৰাইলে অভিযান আৰম্ভ কৰিছিল।

তেতিয়াৰ পৰা প্ৰায় ৭০০ লোকক হত্যা কৰিছে ইজৰাইলী সেনাই। ইয়াৰে অধিকাংশ শিশু আৰু মহিলা। মঙলবাৰে ইজৰাইলী সেনাই ইয়াৰ উত্তৰ অঞ্চলৰ সীমান্তৱর্তী চহৰৰ পৰা বাসিন্দা সকলক নিজৰ স্থান এৰি যাবলৈ নিৰ্দেশ দিয়ে আৰু কয় যে পেলেষ্টাইনীয়ে ইয়াত ৰকেট আক্ৰমণ কৰিব পাৰে। আনহাতে, জেৰুজালেমৰ পৰা পোৱা বাতৰি অনুসৰি হামাছে সোমবাৰে গাজাত দুজন ইজৰাইলী পণবন্দীক মুকলি কৰি দিয়াৰ ভিডিঅ' প্রকাশ কৰে।

উল্লেখযোগ্য যে এলকানা বহব'ট আৰু যোছেফ হেইম অহানা বুলি চিনাক্ত হোৱা সদ্য মুক্তিপ্রাপ্ত ইজৰাইলী পণবন্দী দুজনক ২০২৩ চনৰ ৭ অক্টোবৰত হামাছে পণবন্দী কৰিছিল।

Share This