জেহাদীৰ আক্ৰমণত নাইজাৰত ৪৪জন নিহত

dainik janambhumi March 23, 2025

ডিজিটেল ডেস্ক : নাইজাৰৰ পশ্চিম প্রান্তৰ এখন গাঁৱত এটা জেহাদীৰ দলে আক্ৰমণ কৰাৰ ফলত ৪৪গৰাকী অসামৰিক লোক নিহত হয়। দেশখনৰ অভ্যন্তৰীণ মন্ত্ৰ্যালয়ে সদৰী কৰা অনুসৰি, কক'ৰৌ গ্রামাঞ্চলৰ ফামৰিটা গাঁৱত শুকুৰবাৰে বিয়লি আক্রমণ সংঘটিত কৰে। নাইজাৰৰ মালি আৰু বুৰকিনা ফাছ'ৰ সৈতে থকা সীমান্তৰ সমীপত এই আক্রমণ কৰে জেহাদীৰ দলটোৱে। 

এই আক্ৰমণৰ সৈতে গ্রেট চাহাৰাত থকা ইছলামিক গোট ই আই জি এছ জড়িত আছে বুলি দেশখনৰ চৰকাৰী কৰ্তৃপক্ষই প্ৰকাশ কৰিছে। এই আক্ৰমণৰ দায়িত্ব ই আই জি এছে এতিয়ালৈকে স্বীকাৰ কৰা নাই। 

ঘটনাৰ বিৱৰণি মতে, বিয়লি প্রায় ২ বজাত মুছলমান লোকসকলে শুকুৰবাৰৰ নামাজৰ বাবে মছজিদত সমৱেত হৈছিল। ইয়াৰ পাছতেই সশস্ত্র সন্ত্রাসবাদীৰ দলটোৱে মছজিদত প্ৰৱেশ কৰি জধে-মধে গুলীয়াবলৈ ধৰে। বন্দুকধাৰীবোৰে এখন বজাৰ আৰু ঘৰসমূহতো অগ্নিসংযোগ কৰে। অসমর্থিত সূত্ৰৰ মতে, কমেও ৪৪জন অসামৰিক লোক নিহত হোৱাৰ লগতে ১৩জন গুৰুতৰভাৱে আহত হয়। দেশখনে এই নির্দয় ঘটনাত শোকাহত হৈ তিনিদিনীয়া ৰাষ্ট্ৰীয় শোক পালন কৰাৰ বিষয়ে ঘোষণা কৰিছে।

Share This