দেশৰ ৪৫% বিধায়কৰ বিৰুদ্ধে অপৰাধৰ গোচৰ

dainik janambhumi March 19, 2025

ডিজিটেল ডেস্কঃ দেশৰ ৪৫% বিধায়কৰ বিৰুদ্ধে অপৰাধমূলক গোচৰ আছে। এই তথ্য প্রকাশ পাইছে নির্বাচনী সংস্কাৰৰ হকে কাম কৰি থকা বেচৰকাৰী সংগঠন এছ'চিয়েশ্যন অব্ ডেম'ক্রেটিক ৰিফৰ্মছৰ (এ ডি আৰ) এখন প্রতিবেদনত। এ ডি আৰে দেশৰ ২৮খন ৰাজ্য আৰু বিধানসভা থকা তিনিটা কেন্দ্রীয় শাসিত অঞ্চলৰ মুঠ ৪১২৩জন বিধায়কৰ নিৰ্বাচনৰ সময়ত দাখিল কৰা শপতনামা বিশ্লেষণ কৰি এই তথ্য প্রকাশ কৰিছে। 

প্রতিবেদনখনৰ মতে, অন্ধ্র প্রদেশৰ সর্বাধিক আৰু ছিকিমৰ আটাইতকৈ কম সংখ্যক বিধায়কৰ বিৰুদ্ধে অপৰাধমূলক গোচৰ আছে। অন্ধ্র প্রদেশৰ মুঠ ১৭৪জন বিধায়কৰ ভিতৰত ১৩৮জনৰ (৭৯%) বিৰুদ্ধে অপৰাধমূলক গোচৰ আছে। আনহাতে ছিকিমৰ ৩২জন বিধায়ৰ ভিতৰত মাত্ৰ এজনৰ (৩%) বিৰুদ্ধেহে এনে গোচৰ আছে। আনহাতে দেশৰ ভিতৰত শতকৰা হাৰত সৰ্বাধিক অপৰাধমূলক গোচৰ থকা বিধায়ক আছে অন্ধ্র প্রদেশৰ মুখ্যমন্ত্ৰী এন চন্দ্ৰবাবু নাইডুৰ টি ডি পিত। টি ডি পিৰ ১৩৪জন বিধায়কৰ ভিতৰত ১১৫জনৰ (৮৬%) বিৰুদ্ধে অপৰাধমূলক গোচৰ আছে। প্রতিবেদনখনৰ পৰা জানিব পৰা মতে, দেশৰ মুঠ ১৮৬১জন বিধায়কে তেওঁলোকৰ বিৰুদ্ধে অপৰাধমূলক গোচৰ থকা বুলি ঘোষণা কৰে। 

ইয়াৰে ১২০৫জনৰ বিৰুদ্ধে হত্যা, হত্যাৰ প্ৰচেষ্টা চলোৱা, অপহৰণ আৰু মহিলাৰ বিৰুদ্ধে অপৰাধৰ দৰে গুৰুতৰ অভিযোগ আছে। ২৪জন বিধায়কৰ শপতনামা বিশ্লেষণৰ বাবে ল'ব পৰা নগ'ল। আনহাতে সাতখন আসন খালী আছে। অন্ধ্র প্ৰদেশৰ পাছতে শতকৰা হাৰত সৰ্বাধক ৬৯% (৯৩জন) বিধায়কৰ বিৰুদ্ধে অপৰাধমূলক গোচৰ আছে কেৰালাৰ। ইয়াৰ পাছতে ক্রমে তেলেংগানা (৬৯%, ৮২জন), বিহাৰ (৬৬%, ১৫৮জন), মহাৰাষ্ট্ৰই (৬৫%, ১৮৭জন) স্থান লাভ কৰিছে। 

আনহাতে মুঠ ৫২জন বিধায়কৰ বিৰুদ্ধে আই পি চি ৩০২ ধাৰাৰ অধীনত হত্যাৰ গোচৰ আছে। মহিলাৰ বিৰুদ্ধে অপৰাধৰ অভিযোগত গোচৰ থকা বিধায়কৰ সংখ্যা হ'ল ১২৭জন। উল্লেখযোগ্য যে এ ডি আৰে যোৱা ৩০ ডিচেম্বৰত প্ৰকাশ কৰা আন এখন প্রতিবেদনৰ পৰা জানিব পৰা মতে ৯৩১ কোটি টকাতকৈ অধিক সা-সম্পত্তিৰে অন্ধ্র প্রদেশৰ চন্দ্ৰবাবু নাইডু দেশৰ আটাইতকৈ ধনী মুখ্যমন্ত্রী।

Share This