উৰিয়ামঘাটত তৃতীয় দিনা ৭০০টা ঘৰ ধ্বংস

dainik janambhumi August 01, 2025

ডিজিটেল ডেস্ক : উৰিয়ামঘাট সীমান্তৰ ৰেংমা বনাঞ্চলত বৃহস্পতিবাৰে তৃতীয় দিনা উচ্ছেদ অভিযান শান্তিপূর্ণভাৱে সামৰণি পৰে। বৃহস্পতিবাৰে মুঠ পাঁচখন গাঁৱৰ প্ৰায় ৭০০টা পৰিয়ালত উচ্ছেদ চলোৱা হয়। বৃহস্পতিবাৰে উচ্ছেদ চলোৱা গাঁওকেইখন হ'ল ক্রমে ২নং দয়ালপুৰ, ৩নং দয়ালপুৰ, ৩নং দলনিপথাৰ, খেৰবাৰী আৰু আনন্দপুৰ। ৰাজ্যখনৰ ভিতৰতে সৰ্ববৃহৎ এই অভিযানত প্রায় ৮ হাজাৰ বিঘা ভূমি বেদখলমুক্ত কৰা হৈছে বুলি অনুমান কৰা হৈছে। 

আগন্তুক দুই/তিনি দিনৰ ভিতৰতে হাতত লোৱা ১২খন গাঁৱৰ ১১ হাজাৰ বিঘা মাটি বেদখলমুক্ত কৰিব পৰা যাব বুলি প্রশাসনে আশা কৰিছে। জানিব পৰা গৈছে যে বৃহস্পতিবাৰে উচ্ছেদ চলোৱা খেৰবাৰী গাঁওখনত তিনি শতাধিক বেদখলকাৰী পৰিয়াল থকাৰ লগতে নগাবস্তিৰ গাতে লাগি থকাৰ বাবে গাঁওখনত বৃহস্পতিবাৰে উচ্ছেদ সম্পূর্ণকৈ কৰিব পৰা নগ'ল। 

উল্লেখযোগ্য যে কাজিৰঙাৰ গঁড় চিকাৰীক ৰক্ষণাবেক্ষণ দিয়া, অবৈধ মাৰণাস্ত্ৰ, ড্ৰাগছ সৰবৰাহ কৰাৰ দৰে গোচৰত অভিযোগত বুধবাৰে গ্ৰেপ্তাৰ হোৱা নেৱাজ আলী, চৰিফাদ আলী আৰু হাবিবুৰ আলীৰ ঘৰত বৃহস্পতিবাৰে বুলড 'জাৰৰ কোব পৰে। দৈয়াং নদীৰ শিলৰ ব্যৱসায় এই খেৰবাৰীৰ পৰায়েই চলি আছিল। শিল ব্যৱসায়ৰ লগত জড়িত এইসকল সন্দেহজনক লোকে বাহৰ পাতিছিল খেৰবাৰী অঞ্চলত। দুই/তিনি মহলৰ অত্যাধুনিক ঘৰসমূহ বৃহস্পতিবাৰে চৰকাৰী বুলড 'জাৰৰ আঁচোৰত খহি পৰে। ঠিক একেদৰে ৩নং দলনিপথাৰ, ২নং দয়ালপুৰ, ৩নং দয়ালপুৰ গাঁওসমূহত আছিল তামোল-পাণ, শাক-পাচলিৰ খেতি। ইয়াতো অর্ধ শতাধিক বুলড 'জাৰে উচ্ছেদ চলাই বেদখলকাৰীৰ ঘৰ-বাৰী ধ্বংস কৰে।

Share This