৩খন সফল আই পি এল মেচৰ পাছত গ্ৰাউণ্ড ষ্টাফলৈ এ চি এৰ ২৫ লাখ টকাৰ নগদ পুৰস্কাৰ ঘোষণা

Rashmi April 13, 2026

ডিজিটেল ডেস্কঃ গুৱাহাটীৰ এ চি এ ষ্টেডিয়ামত ইণ্ডিয়ান প্ৰিমিয়াৰ লীগৰ তিনিখন খেলৰ সফল আয়োজনে অসম ক্ৰিকেট সন্থাৰ গ্ৰাউণ্ড ষ্টাফৰ নীৰৱ অথচ গুৰুত্বপূৰ্ণ ভূমিকাক উজ্জ্বল কৰি তুলিছে । তাৰেই পৰিপ্ৰেক্ষিতত সন্থাই আজি সংশ্লিষ্টসকললৈ ২৫ লাখ টকাৰ নগদ ধনৰ পুৰস্কাৰৰ কথা ঘোষণা কৰিছে ।

প্ৰত্যাহ্বানমূলক বতৰৰ পৰিস্থিতিত কাম কৰি কিউৰেটৰ আৰু গ্ৰাউণ্ডমেনে পিটচসমূহ উচ্চতম মানত প্ৰস্তুত আৰু ৰক্ষণাবেক্ষণ নিশ্চিত কৰিছিল। মেচসমূহৰ সুকলম সমাপনৰ পথত তেওঁলোকৰ প্ৰচেষ্টা আছিল অন্যতম কেন্দ্ৰবিন্দু আৰু তেনেদৰেই ৰাষ্ট্ৰীয় মঞ্চত এই স্থানৰ ক্ৰমবৰ্ধমান সুনাম বজাই ৰখাত ই সহায় কৰিছিল । তেওঁলোকৰ অৱদানৰ এক স্বীকৃতি স্বৰূপে সন্থাই কিউৰেটৰ আৰু গ্ৰাউণ্ড মেনৰ বাবে ২৫ লাখ টকাৰ পুৰস্কাৰ ঘোষণা কৰিছে ।

সন্থাৰ সভাপতি তৰংগ গগৈ আৰু সম্পাদক সনাতন দাসে সমগ্ৰ দলটোৰ পেছাদাৰিত্ব আৰু দায়বদ্ধতাক প্ৰশংসা কৰি মেচসমূহৰ নিৰৱচ্ছিন্ন আয়োজনত তেওঁলোকৰ নিষ্ঠাৰ ভূয়সী প্ৰশংসা কৰে । তেওঁলোকে লগতে উল্লেখ কৰে যে গ্ৰাউণ্ড ষ্টাফসকলৰ কাম কেতিয়াবা বহুতৰ চকুত নপৰে যদিও তেওঁলোকৰ ভূমিকা হয় মেৰুদণ্ডৰ দৰে ।

অসম ক্ৰিকেট সন্থাৰ সম্পাদক সনাতন দাসে জাৰি কৰা এক বিজ্ঞপ্তিত এই কথা প্ৰকাশ কৰে ।






উৎস : প্ৰাগ নিউজ ডিজিটেল

Share This