আদানি, আম্বানিক ভূমি দিবলৈ উচ্ছেদ চলাইছে

dainik janambhumi July 27, 2025

ডিজিটেল ডেস্ক : চাপৰ ৰাজহ চক্ৰৰ কাৰ্যালয়ৰ সন্মুখত উচ্ছেদিত পৰিয়ালক পুনৰ সংস্থাপনৰ দাবীত বিগত এঘাৰ দিন ধৰি চলি থকা কৃষক মুক্তি সংগ্ৰাম সমিতি আৰু ছাত্র মুক্তি সংগ্ৰাম সমিতিৰ অনির্দিষ্টকালীন ধর্মঘটত শনিবাৰে উপস্থিত হয় ৰাইজৰ দলৰ সভাপতি তথা বিধায়ক অখিল গগৈ। ৰাইজৰ দলৰ সভাপতিগৰাকীয়ে শনিবাৰে বিজেপি চৰকাৰৰ লগতে কংগ্ৰেছ দলক সমালোচনা কৰে। অখিল গগৈয়ে কয় যে এইখন পৃথিৱীত বিজেপি চৰকাৰৰ দৰে বেয়া চৰকাৰৰ কেতিয়াও জন্ম হোৱা নাই। বিজেপি নেতৃত্বাধীন ৰাজ্য চৰকাৰখনে অকল বাছি বাছি ধর্মীয় সংখ্যালঘু ৰাইজৰ ঘৰ ভাঙিছে। অসমৰ সংখ্যালঘু ৰাইজৰ শত্রু হ'ল বিজেপি, আৰ এছ এছ আৰু হিমন্ত বিশ্ব শর্মা। যেতিয়ালৈকে অসমত বিজেপি চৰকাৰ থাকিব, তেতিয়ালৈকে সংখ্যালঘু মানুহৰ শান্তি অসমত নাই। অসমৰ পৰা বিজেপি চৰকাৰখনক উৎখাত কৰিবলৈ সকলোৱে একলগ হ'ব লাগিব। কিন্তু একলগ হ'বলৈ কংগ্ৰেছে বিচৰা নাই। মই আজি উজনি অসমৰ বিধায়ক তথা ৰাইজৰ দলৰ সভাপতি হৈ আপোনালোকৰ খবৰ ল'বলৈ আহিছোঁ। তাত মোক বহুতে বেয়া পাইছে। কিন্তু মই দুখীয়া ৰাইজৰ পক্ষত। জাতি, বর্ণ, ধর্ম নির্বিশেষে দুখীয়া ৰাইজৰ সৈতে আছোঁ। কিন্তু মই বিদেশীৰ সৈতে নাই। ১৯৭১ চনৰ পাছত অহা মানুহৰ লগত নাই। 

ইপিনে কংগ্রেছক সমালোচনা কৰি কয়- কংগ্রেছে সংখ্যালঘুক ভালপাওঁ বুলি কৈ থাকে। কিন্তু স্বাধীনতাৰ ৭৮ বছৰৰ ভিতৰত ৬০ বছৰ অকল কংগ্ৰেছেই শাসন কৰিছিল অসমক। মুছলমান ৰাইজে কংগ্ৰেছক ভোট দিলে। কিন্তু কংগ্রেছে ভূমিৰ পট্টা নিদিলে। অকল সংখ্যালঘু ৰাইজক ভোট বেংকৰ স্বাৰ্থত ব্যৱহাৰ কৰিলে বুলি কটাক্ষ কৰে। আনপিনে অসমৰ সৰ্ববৃহৎ উচ্ছেদ হোৱাৰ পাছত তেওঁ মুখ্যমন্ত্রীক সাক্ষাৎ কৰি উচ্ছেদিত ভূমিহীন লোকক ভূমি প্রদানৰ বাবে আহ্বান জনাইছিল। আৰু মুখ্যমন্ত্ৰীগৰাকীয়ে প্রকৃত ভূমি নথকা মানুহখিনিক ভূমি প্ৰদান কৰাৰ কথাও উল্লেখ কৰিছিল বুলি জানিবলৈ দিয়ে। কিন্তু তাৰ এখন বিপৰীত প্রতিচ্ছবি প্ৰতিফলিত হৈছে উচ্ছেদিত ৰাইজৰ সৈতে। খহনীয়াত বিধ্বস্ত হৈ সকলো হেৰুওৱা ৰাইজে উচ্ছেদ হোৱাৰ পাছত ৰাজপথত তিপাল টানি আছে যদিও ধুবুৰী জিলা প্রশাসনে তিপালবোৰ ভাঙি দিয়াৰ লগতে ৰন্ধা-বঢ়া সামগ্ৰীবোৰো ভাঙি দিছে। আজি সংখ্যালঘু মুছলমানৰ ওপৰত মানৰ অত্যাচাৰ চলিছে। এই অত্যাচাৰ বন্ধ কৰাৰ দাবী জনায় বিধায়কগৰাকীয়ে। লগতে ৰাইজৰ দলৰ সভাপতিগৰাকীয়ে উল্লেখ কৰে যে অসমৰ খিলঞ্জীয়া ৰাইজক ভূমি প্ৰদানৰ বাবে উচ্ছেদ চলোৱা নাই। কেৱল আদানি আৰু আম্বানিক ভূমি দিয়াৰ বাবে উচ্ছেদ চলিছে বুলি অভিযোগ কৰে। 

বিধায়কগৰাকীয়ে লগতে উল্লেখ কৰে যে অহা ৩০ জুলাইত অসমৰ মুখ্য সচিবক উচ্ছেদিত ৰাইজৰ প্রতিনিধিসহ সাক্ষাৎ কৰিব আৰু চাৰি আগষ্টত এখন গণ সমাৱেশত অংশগ্ৰহণ কৰাৰ লগতে ধুবুৰী জিলা আয়ুক্তৰ লগত সাক্ষাৎ কৰিব। ইপিনে চাপৰ ৰাজহ চক্ৰৰ সন্মুখত চলি থকা কৃষক মুক্তি সংগ্রাম সমিতি আৰু ছাত্ৰ মুক্তি সংগ্ৰাম সমিতিৰ অনির্দিষ্টকালীন অৱস্থান ধর্মঘট বন্ধ কৰিবলৈ আহবান জনায়। ইপিনে অখিল গগৈৰ নিৰ্দেশ মানি লৈ  কাৰ্যকৰী হোৱাকৈ আন্দোলনৰ কাৰ্যসূচী সাময়িকভাৱে প্ৰত্যাহাৰ কৰা বুলি ধুবুৰী জিলা কৃষক মুক্তি সংগ্রাম সমিতিৰ সভাপতি নাজিমূল হক আৰু ছাত্ৰ মুক্তি সংগ্ৰাম সমিতিৰ সহকাৰী সাধাৰণ সম্পাদক আখতাৰ হুছেইনে জানিবলৈ দিয়ে।

Share This