ধনখড়ৰ পদত্যাগৰ পাছত ৫ বছৰৰ বাবে নির্বাচিত হ'ব নতুন উপ-ৰাষ্ট্ৰপতি

dainik janambhumi July 24, 2025

ডিজিটেল ডেস্কঃ জগদীপ ধনখড়ে পদত্যাগ কৰাৰ পাছত দেশৰ উপ-ৰাষ্ট্ৰপতিৰ পদটো ৰিক্ত হৈ পৰে। নির্বাচন আয়োগে এই পদটো পূৰণৰ বাবে প্ৰক্ৰিয়া আৰম্ভ কৰিছে। 

এই সম্পর্কত আয়োগে বুধবাৰে এখন জাননী জাৰি কৰে। আয়োগে উপ-ৰাষ্ট্ৰপতি পদৰ নির্বাচনী প্ৰক্ৰিয়া আৰম্ভ কৰি নিৰ্বাচক মণ্ডলী গঠনৰ প্ৰক্ৰিয়া আৰম্ভ কৰে। নির্বাচন আয়োগে কয় যে উপ-ৰাষ্ট্ৰপতিৰ নিৰ্বাচনৰ কাৰণে নির্বাচনী বিষয়াৰ তালিকাৰ চূড়ান্ত ৰূপ দি থকা হৈছে। প্রস্তুতি সম্পূৰ্ণ হোৱাৰ পাছত যথা সম্ভৱ সোনকালে উপ-ৰাষ্ট্ৰপতিৰ নিৰ্বাচনৰ সূচী ঘোষণা কৰা হ'ব বুলি আয়োগে প্রকাশ কৰে। 

উল্লেখযোগ্য যে যোৱা সোমবাৰে নিশা ধনখড়ে আচম্বিতে পদত্যাগ কৰে। উল্লেখযোগ্য যে নতুন উপ-ৰাষ্ট্ৰপতিক পাঁচ বছৰীয়া এটা কাৰ্যকালৰ বাবে নিৰ্বাচিত কৰা হ'ব। লোক সভা আৰু ৰাজ্য সভাৰ সদস্যসকলে গোপন ভোটদানৰ জৰিয়তে উপ-ৰাষ্ট্ৰপতি নির্বাচন কৰে। বৰ্তমান উভয় সদন বিজেপিৰ নেতৃত্বাধীন এন ডি এই সংখ্যাগৰিষ্ঠতা লাভ কৰি আছে। সেয়েহে চৰকাৰৰ প্ৰাৰ্থীয়ে জয়লাভ কৰাটো নিশ্চিত। অৱশ্যে প্রার্থী ঘোষণা কৰাৰ আগতে কেন্দ্ৰত শাসনত থকা বিজেপিৰ নেতৃত্বাধীন এন ডি এই বিৰোধী পক্ষৰ সৈতে আলোচনা কৰাৰ সম্ভাৱনা আছে। ইফালে চৰকাৰৰ সৈতে ঐকমত্যত উপনীত নহ'লে কংগ্ৰেছে বিৰোধীৰ প্ৰাৰ্থী থিয় কৰোৱাৰ ইংগিত দিয়ে। বিৰোধী পক্ষৰ দলসমূহৰ সৈতে ইতিমধ্যে অনানুষ্ঠানিকভাবে আলোচনা আৰম্ভ কৰা হৈছে। সূত্ৰসমূহে প্রকাশ কৰা মতে, কংগ্ৰেছে বিৰোধী পক্ষৰ পৰা এজন শক্তিশালী নেতাক এই পদৰ প্ৰাৰ্থীৰূপে থিয় কৰোৱাৰ কথা ভাবিছে।

Share This