প্ৰেমিকাৰ প্ৰতাৰণা! ছুইচাইড নোট লিখি আৰু ভিডিঅ’ কৰি প্ৰেমিকৰ চৰম সিদ্ধান্ত

Kakali Deka March 01, 2025

ডিজিটেল ডেস্কঃ প্ৰেমিকাক জগৰীয়া কৰি প্ৰেমিকৰ চৰম সিদ্ধান্ত৷ প্ৰেমিকাৰ বিশ্বাসঘাতকতাই জীৱনৰ প্ৰতি বিৰাগ জন্মালে এজন যুৱকৰ, সেয়ে তেওঁ পৃথিৱীক চিৰবিদায় দিয়াৰ সিদ্ধান্ত লয়। আগ্ৰাৰ কিৰাৱলীত যুৱকজনে আত্মহত্যা কৰিছিল। শুকুৰবাৰে যুৱকজনৰ ছুইচাইড নোট আৰু ভিডিঅ’ ছ’চিয়েল মিডিয়াত ভাইৰেল হৈ পৰে। আত্মহত্যাৰ বাবে যুৱকজনে নিজৰ প্ৰেমিকা আৰু তেওঁৰ পৰিয়ালক জগৰীয়া কৰিছে।

আগ্ৰাত টি চি এছৰ মেনেজাৰ মানৱ শৰ্মাৰ আত্মহত্যাৰ ভিডিঅ’ ভাইৰেল হোৱাৰ পাছতে শুকুৰবাৰে যুৱকজনৰ ছুইচাইড নোট আৰু ভিডিঅ’ ছ’চিয়েল মিডিয়াত ভাইৰেল হৈ পৰে। পৰিয়ালৰ সদস্যৰ অভিযোগত আৰক্ষীয়ে প্ৰেমিকা আৰু তেওঁৰ পৰিয়ালৰ বিৰুদ্ধে গোচৰ ৰুজু কৰিছে।

ৰাজেন্দ্ৰ সিঙৰ দুগৰাকী কন্যাৰ ভিতৰত জিতেন্দ্ৰ কুমাৰ ওৰফে বাণ্টী বাঘেল আছিল একমাত্ৰ পুত্ৰ। ব্যক্তিগত কোম্পানী এটাত কাম কৰি আছিল জিতেন্দ্ৰই। সন্দেহজনক পৰিস্থিতিত জিতেন্দ্ৰই নিজৰ ঘৰৰ কোঠাত চিপ লৈ আত্মহত্যা কৰে। ঘটনাৰ পাছত পৰিয়ালটোৱে গম পায় যে জিতেন্দ্ৰই নিজৰ ফেচবুক একাউণ্টত ভিডিঅ’ আৰু ছুইচাইড নোট এৰি থৈ গৈছে।

এতিয়া আত্মহত্যাৰ নোটত নাম উল্লেখ কৰাসকলৰ বিৰুদ্ধে আচ্নেৰা আৰক্ষী থানাত এজাহাৰ দাখিল কৰিছে পৰিয়ালৰ লোকে। এই গোচৰত আৰক্ষীয়ে প্ৰেমিকা নীৰু, ভাতৃ মনোজ, সৌৰভ, পিতৃ কমল সিং ফৌজী আৰু মাতৃ মীনা দেৱীৰ বিৰুদ্ধে গোচৰ ৰুজু কৰিছে।

আস্নেৰা আৰক্ষী থানাৰ ভাৰপ্ৰাপ্ত বিষয়া বিনোদ মিশ্ৰই কয় যে এই ঘটনাৰ সকলো তথ্যৰ ওপৰত তদন্ত চলি আছে। মৃতকৰ ম'বাইল ফ'ন আৰু ছ’চিয়েল মিডিয়া একাউণ্টত পোষ্টৰ চি ডি আৰৰ কাৰিকৰী তদন্ত চলি আছে। প্ৰেমিকা, ভাতৃ আৰু পিতৃ-মাতৃৰ বিৰুদ্ধে গোচৰ ৰুজু কৰা হৈছে।

২-২৯ মিনিটৰ ভিডিঅ’টোত মৃত জিতেন্দ্ৰই কৈছে যে তেওঁ প্ৰেমিকাক বিয়া কৰাব বিচাৰিছিল। বিয়াৰ নাম লৈ ছোৱালীজনীয়ে ক্ৰমান্বয়ে প্ৰায় সাত লাখ টকা আত্মসাৎ কৰে। ইয়াৰ পাছতো বিয়া পাতিবলৈ ৰাজী নহয় প্ৰেমিকা। ধন ঘূৰাই বিচৰাত পৰিয়ালৰ লোকৰ সৈতে প্ৰেমিকাই জিতেন্দ্ৰক ভাবুকি দিবলৈ আৰম্ভ কৰে। জিতেন্দ্ৰলৈ প্ৰতিদিনে ভাবুকি আহিবলৈ ধৰিলে। ইয়াৰ পাছত আত্মহত্যাৰ পদক্ষেপ ল’বলৈ বাধ্য হয় যুৱকজনে।

উৎস: প্ৰাগ নিউজ ডিজিটেল
 

Share This