২৬ৰ নিৰ্বাচনত ৰাজ্যৰ ৩৫ সমষ্টিত অকলে নির্বাচন খেলিব এ আই ইউ ডি এফে

dainik janambhumi July 04, 2025

ডিজিটেল ডেস্ক : কংগ্ৰেছৰ সংগ নালাগে, 'একলা চলো' নীতিৰেই অনাগত বিধানসভা নির্বাচনত অৱতীৰ্ণ হ'ব এ আই ইউ ডি এফ। বৃহস্পতিবাৰে মুম্বাইত অনুষ্ঠিত দলটোৰ এখন গুৰুত্বপূৰ্ণ বৈঠকত এই সিদ্ধান্ত গ্রহণ কৰা হয়। এ আই ইউ ডি এফৰ সভাপতি বদৰুদ্দিন আজমলৰ মুম্বাইস্থিত বাসগৃহত আয়োজিত এই বৈঠকত দলটোৰ বিধায়কসকলৰ উপস্থিতিত কিদৰে ২০২৬ৰ নিৰ্বাচনত অৱতীৰ্ণ হ'ব সেই সন্দৰ্ভত ৰণকৌশল প্রস্তুত কৰা হয়। বৈঠকৰ পাছত বিধায়ক ৰফিকুল ইছলামে সংবাদ মাধ্যমৰ আগত কয়, 'আগন্তুক নির্বাচনত আমাৰ দল শক্তিশালীভাৱে অৱতীৰ্ণ হ'ব। অৱশ্যে আমি গোটেই অসমত নির্বাচন নেখেলোঁ। মাত্র ৩৫খনমান আসনত প্রার্থী থিয় কৰাম।' 

আনহাতে কংগ্ৰেছৰ সৈতে মিত্ৰতা কৰাৰ সন্দৰ্ভত তেওঁ কয়, 'আমি অকলেই নির্বাচনত অৱতীৰ্ণ হ'ম আৰু শক্তিশালীভাবে নির্বাচন খেলিম।' ইফালে এ আই ইউ ডি এফে সাংগঠনিক ভেটি শক্তিশালী কৰি তুলিছে বুলি উল্লেখ কৰি তেওঁ কয় যে ইয়াৰ আগতে চাৰিটা বিধানসভা নির্বাচন আমি খেলিছোঁ আৰু তিনিটা নির্বাচন অকলে খেলিছোঁ। মাত্র ২০২১ চনৰ বিধানসভা নির্বাচনহে একেলগে খেলিছিলোঁ। আমি অকলে খেলি ১৮ জন বিধায়ক পাইছোঁ। এইবাৰ আমি অকলে শক্তিশালীভাবে অৱতীৰ্ণ হ'ম। কোনো দলৰ ওচৰলৈ বুজাবুজিৰ বাবে আমি নাযাওঁ। কোনোবা দলে প্রয়োজনত আমাৰ ওচৰত আহিলে আমি বিষয়টো বিবেচনা কৰি চাম।' ইফালে বি টি আৰ নিৰ্বাচনৰ সন্দৰ্ভতো বৈঠকত আলোচনা হোৱাৰ কথা উল্লেখ কৰি তেওঁ কয় যে বি টি আৰত এ আই ইউ ডি এফৰ অৱস্থা যথেষ্ট ভাল। বহু সমষ্টিত যথেষ্টসংখ্যক প্রার্থীয়ে টিকট বিচাৰিছে। সকলো চালি-জাৰি চাই আমি প্রার্থী থিয় কৰাম। 

মন কৰিব লগীয়া কথা যে আগন্তুক নির্বাচনত এ আই ইউ ডি এফে বিজেপিক পৰাভূত কৰাৰ স্বাৰ্থত কংগ্ৰেছৰ সৈতে মিত্রতা স্থাপন কৰাৰ পোষকতা কৰি আহিছে। কিন্তু কংগ্রেছে এই মুহূর্তলৈকে এ আই ইউ ডি এফৰ সৈতে মিত্ৰতা কৰিব খোজা নাই। এনে পৰিস্থিতিত অৱশেষত দলটোৱে 'একলা চলো' নীতিৰেই আগবঢ়াৰ সিদ্ধান্ত লৈছে। ইফালে অনাগত নিৰ্বাচনত দলটোৰ মুৰব্বী বদৰুদ্দিন আজমলে মুখ্য ভূমিকা গ্রহণ কৰিব পাৰিব নে নোৱাৰে তাক লৈ প্রশ্ন উত্থাপন হৈছে। কিয়নো শাৰীৰিক অসুস্থতাৰ বাবে দীৰ্ঘদিন ধৰি তেওঁ মুম্বাইত চিকিৎসাধীন হৈ আছে। যাৰ বাবে নিৰ্বাচনৰ ৰণ কৌশল প্ৰস্তুত কৰা উক্ত বৈঠকো মুম্বাইতে অনুষ্ঠিত কৰিব লগীয়া হৈছে।

Share This